സ്ത്രീവിരുദ്ധ പ്രസ്താവന നടത്തിയ കാന്തപുരത്തിനെതിരെ കേരളം; പ്രസ്താവന പിന്‍വലിച്ച് മാപ്പ് പറയണമെന്ന് സോഷ്യല്‍മീഡിയ

സ്ത്രീവിരുദ്ധ പ്രസ്താവന നടത്തിയ കാന്തപുരം എ.പി അബൂബക്കര്‍ മുസ്ലിയാര്‍ക്കെതിരെ വന്‍പ്രതിഷേധം. കാന്തപുരം നടത്തിയ പ്രസ്താവന സ്ത്രീവിരുദ്ധമാണെന്നും അത് പിന്‍വലിച്ച് മാപ്പ് പറയണമെന്നുമാണ് സോഷ്യല്‍മീഡിയയുടെ ആവശ്യം. സ്ത്രീയും പുരുഷനും സമന്‍മാരാണെന്ന് പറയാന്‍ കഴിയില്ലെന്നും സ്ത്രീ പുരുഷ സമത്വം ഒരിക്കലും നടക്കാത്ത കാര്യമാണെന്നും കാന്തപുരം പറഞ്ഞു. സ്ത്രീയേക്കാള്‍ മനക്കരുത്ത് പുരുഷനാണ്. പ്രതിസന്ധിയുണ്ടാകുമ്പോള്‍ സ്ത്രീ വിറച്ചുപോകുമെന്നും കാന്തപുരം പരിഹസിച്ചു.

അരുന്ധതി (നടി)

കാന്തപുരം എ.പി അബൂബക്കര്‍ മുസ്ലിയാരുടെ പ്രസ്താവന കടുത്ത സ്ത്രീവിരുദ്ധമാണ്. എല്ലാ മതങ്ങളിലും സ്ത്രീവിരുദ്ധയുണ്ട്. ഇത്തരം പ്രസ്താവനകള്‍ പൊതുസമൂഹത്തിന്റെ ഏറ്റവും ഉന്നതിയില്‍ നില്‍ക്കുന്ന ആളായാല്‍ പോലും തള്ളിക്കളയണയം. ഇസ്ലാമിനുള്ളില്‍ തന്നെയാണ് സ്ത്രീവിരുദ്ധത അധികവും. കാന്തപുരം മുന്‍പും ഇത്തരം സ്ത്രീവിരുദ്ധ പ്രസ്താവനകള്‍ നടത്തിയിട്ടുണ്ട്. അതുകൊണ്ട് അത്ഭുതമില്ല, നമ്മള്‍ജീവിക്കുന്നത് തന്നെ സ്ത്രീവിരുദ്ധമായ സമൂഹത്തിലാണ്. ജന്മനയുള്ള അത്തരം കാഴ്ച്ചപാടുകള്‍ ജീവിത അനുഭവങ്ങളിലൂടെ മാറ്റിയെടുക്കണം. പുരുഷന്‍ സ്വയം തിരിച്ചറിഞ്ഞ് അത് തള്ളിക്കളയണം.

ചിന്താ ജെറോം (ഡിവൈഎഫ്‌ഐ കൊല്ലം ജില്ലാ കമ്മിറ്റിയംഗം)

മതത്തിന്റെയും മതമേലാധ്യക്ഷന്‍മാരുടെയും പേരില്‍ നടക്കുന്ന ഇത്തരം പ്രസ്താവനകള്‍ ആശങ്കാജനകമാണ്. മതത്തെ ഉപയോഗിച്ച് ലിംഗസമത്വത്തിനെതിരെ സംസാരിക്കുന്നത് ഭയാനകമായ സാഹചര്യമാണ് സൃഷ്ടിക്കുന്നത്. സ്ത്രീ, അടുക്കള, വിധേയത്വം എന്നിവയില്‍ ഒതുക്കിയിട്ടിരിക്കുകയാണ് മതയാഥാത്ഥികര്‍. ശരിക്കും മുഹമ്മദ് നബിയുടെ വചനങ്ങളെ ഇവര്‍ വളച്ചൊടിക്കുകയാണ് ചെയ്യുന്നത്. മാത്രമല്ല, അവയെ ദുര്‍വാഖ്യാനം ചെയ്ത് സ്ത്രീയെ അടിച്ചമര്‍ത്തുകയാണ് ചെയ്യുന്നത്.