തിരുവനന്തപുരം: വികസന കാര്യത്തില്‍ കേരളം 25 വര്‍ഷം പിന്നിലെന്ന് സിപിഐഎം പൊളിറ്റ്ബ്യൂറോ അംഗം പിണറായി വിജയന്‍. വ്യക്തമായ വികസന പരിപ്രേക്ഷ്യത്തോടെയുള്ള ഭരണത്തിനു തുടര്‍ച്ച ഇല്ലാതെപോകുന്നതാണ് ഇതിന് കാരണമെന്നും പിണറായി വിജയന്‍ പറഞ്ഞു. നാലാമത് കേരള അന്താരാഷ്ട്ര കേരളപഠന കോണ്‍ഗ്രസിന്റെ ലോഗോ പ്രകാശനം ചെയ്യുകയ്ത് സംസാരിക്കുകയായിരുന്നു പിണറായി വിജയന്‍.
‘കേരളത്തിന്റെ വികസനത്തിനായി 1956ല്‍ കമ്മ്യുണിസ്റ്റ് പാര്‍ട്ടി സംസ്ഥാന സമ്മേളനം ഒരു രേഖ അംഗീകരിച്ചു. ഈ രേഖയാണ് 1957ല്‍ നിലവില്‍വന്ന ആദ്യ കേരള സര്‍ക്കാരിന്റെ പ്രവര്‍ത്തനങ്ങള്‍ക്ക് മാര്‍ഗദര്‍ശകമായത്. സംസ്ഥാനവികസനത്തെപ്പറ്റി നിരന്തരം ആഴത്തില്‍ പഠിക്കുകയും കൃത്യമായ വികസനകാഴ്ചപ്പാടും പരിപാടിയും ആവിഷ്‌ക്കരിക്കുകയും ചെയ്യുന്ന പാര്‍ട്ടിയാണു സിപിഐഎം. അവ നടപ്പാക്കുകയാണ് ഓരോ ഇടതുപക്ഷസര്‍ക്കാരും ചെയ്യുന്നത്. എന്നാല്‍, അതിനിടെ വരുന്ന യുഡിഎഫ് സര്‍ക്കാരുകള്‍ ആ പരിപാടികളെല്ലാം അട്ടിമറിക്കുന്നു. കേരളത്തിന്റെ അനുസ്യൂതമായ വികസനത്തിന് ഇതു തടസമാകുന്നു.’ – പിണറായി പറഞ്ഞു.
കേരളത്തില്‍ അഭ്യസ്തവിദ്യരായ പതിനായിരക്കണക്കിനു യുവാക്കളാണ് തൊഴിലില്ലാതെ അലയുന്നത്. ഇവര്‍ക്കെല്ലാം യോജിച്ച തൊഴില്‍ നല്‍കാനുള്ള സാധ്യത വിവിധ മേഖലകളിലുണ്ട്. അതു പ്രയോജനപ്പെടുത്താന്‍ കഴിയുന്നില്ല. അതിനുള്ള പരിപാടി യുഡിഎഫിനില്ല. കേരളത്തില്‍ ഉണ്ടായിട്ടുള്ള യഥാര്‍ത്ഥവികസനം എല്‍ഡിഎഫ് സര്‍ക്കാരുകളുടെ സംഭാവനയാണെന്നും പിണറായി വിജയന്‍ പറഞ്ഞു.
ഇഎംഎസിന്റെ നേതൃത്വത്തില്‍ നടന്ന ഒന്നാം പഠനകോണ്‍ഗ്രസ് മുതല്‍ പാര്‍ട്ടി ഇതുവരെ നടത്തിയ പഠന കോണ്‍ഗ്രസുകള്‍ മുന്നോട്ടുവച്ച നിര്‍ദ്ദേശങ്ങളാണ് കേരളത്തെ മുന്നോട്ടു കൊണ്ടുപോയിട്ടുള്ളത്. ഇത്തവണത്തെ പഠന കോണ്‍ഗ്രസില്‍ ഉരുത്തിരിയുന്ന വികസനപരിപാടികളും മുന്‍കാലങ്ങളിലെപ്പോലെ എല്‍ഡിഎഫ് യോഗത്തില്‍ വയ്ക്കുമെന്നും പിണറായി പറഞ്ഞു.
എല്‍ഡിഎഫിനു സ്വീകാര്യമാകുന്ന നിര്‍ദ്ദേശങ്ങളാകും പഠന കോണ്‍ഗ്രസില്‍ ഉണ്ടാവുക. എല്‍ഡിഎഫ് അംഗീകരിച്ചാല്‍ നിര്‍ദ്ദേശങ്ങള്‍ മുന്നണിയുടെ പ്രകടനപത്രികയില്‍ അവ ഉള്‍പ്പെടുത്തും. എല്‍ഡിഎഫ് അധികാരത്തിലെത്തിയാല്‍ ഇവ മുന്‍ഗണന നല്‍കി നടപ്പാക്കുമെന്നു പിണറായി പറഞ്ഞു.
എ.കെ.ജി സെന്ററില്‍ നടന്ന ചടങ്ങില്‍ ദേശാഭിമാനി എഡിറ്റര്‍ പ്രഭാവര്‍മ്മ അദ്ധ്യക്ഷത വഹിച്ചു. ആര്‍.എസ്.ബാബു സ്വാഗതം പറഞ്ഞു.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here
