പെരുന്തച്ചന്‍ കോംപ്ലക്‌സ് അതിരു കടക്കുന്നെന്ന് ആഷിഖ് അബു; ജൂറി ചെയര്‍മാന്റെ വാക്കുകള്‍ ഒരു സംവിധായകനു കൊടുക്കാന്‍ പറ്റിയ ബെസ്റ്റ് പ്രോത്സാഹനമാണെന്നും പരിഹാസം

പ്രേമം സിനിമയില്‍ അല്‍ഫോണ്‍സ് പുത്രന്റേത് ഉഴപ്പന്‍ നയമാണെന്നു പറഞ്ഞ സംസ്ഥാന ചലച്ചിത്ര പുരസ്‌കാര നിര്‍ണയ ജൂറി ചെയര്‍മാന് സംവിധായകന്‍ ആഷിഖ് അബുവിന്റെ മറുപടി. ഒരു സംവിധായകന്‍ ഉഴപ്പി ചെയ്ത സിനിമ കേരളം മുഴുവന്‍ ഉത്സവം പോലെ കൊണ്ടാടിയിട്ടുണ്ടെന്ന് ആഷിഖ് അബു പറയുന്നു. ആ സംവിധായകനു കൊടുക്കാന്‍ പറ്റിയ ബെസ്റ്റ് പ്രോത്സാഹനമാണ് താങ്കളുടെ വാക്കുകളെന്നും ആഷിഖ് അബു പരിഹസിച്ചു. സിനിമയ്ക്കായി അത്രയേറെ കഷ്ടപ്പെട്ട അല്‍ഫോണ്‍സ് പുത്രനെ ഒട്ടും സന്തോഷിപ്പിക്കുന്ന വാക്കുകളല്ല ജൂറി ചെയര്‍മാന്റേതെന്നും ആഷിഖ് അബു പറഞ്ഞു. ഫേസ്ബുക്ക് പോസ്റ്റിലാണ് ആഷിഖ് അബുവിന്റെ പ്രതികരണം.

അല്‍ഫോണ്‍സ് പുത്രന്റേത് ഉഴപ്പന്‍ നയമാണെന്നും പ്രേമത്തെ ഒരു ഘട്ടത്തില്‍ പോലും പുരസ്‌കാരത്തിനായി പരിഗണിച്ചിരുന്നില്ലെന്നും ജൂറി ചെയര്‍മാന്‍ പറഞ്ഞിരുന്നു.