നടി അഞ്ജലി അനീഷ് ഉപാസനയുടെ മോര്‍ഫ് ചെയ്ത ഫോട്ടോ സോഷ്യല്‍ മീഡിയ വഴി പ്രചരിപ്പിച്ച സംഭവത്തില്‍ ഒരാള്‍ കസ്റ്റഡിയില്‍. വാട്‌സ്ആപ്പ് വഴി ഫോട്ടോ പ്രചരിപ്പിച്ചെന്ന് സംശയിക്കുന്ന ഒരാളെയാണ് സൈബര്‍ പൊലീസ് കസ്റ്റഡിയിലെടുത്തത്. കൂടുതല്‍ പേരെ നിരീക്ഷിച്ചുവരുകയാണ്. ഫോട്ടോ സൃഷ്ടിച്ചവരെയും പ്രചരിപ്പിക്കുന്നവരെയും അറസ്റ്റ് ചെയ്യാനായി ഫോണ്‍ നമ്പറുകള്‍ കേന്ദ്രീകരിച്ചുള്ള അന്വേഷണം തുടരുകയാണെന്നും പൊലീസ് അറിയിച്ചു.
അഞ്ജലി അനീഷിന്റേതെന്ന പേരില്‍ വാട്‌സ്ആപ്പിലും ഫേസ്ബുക്കിലുമാണ് അശ്ലീല ഫോട്ടോകള്‍ പ്രചരിച്ചത്. സംഭവം ശ്രദ്ധയില്‍പ്പെട്ട ഉടന്‍ തന്നെ നടി പൊലീസില്‍ പരാതി നല്‍കിയിരുന്നു. പ്രചരിക്കുന്നത് വ്യാജ ഫോട്ടോയാണെന്നും പൊലീസില്‍ പരാതി നല്‍കിയെന്നും അഞ്ജലി ഫേസ്ബുക്ക് പേജിലൂടെ പറഞ്ഞിരുന്നു. തന്റെ വ്യാജ ഫോട്ടോ ശ്രദ്ധയില്‍പ്പെടുത്തിയവര്‍ക്ക് നന്ദി, ഇനിയും ഫോട്ടോ പ്രചരിപ്പിച്ചാല്‍ പ്രചരിപ്പിക്കുന്നവര്‍ കുടുങ്ങുമെന്നും നടി അറിയിച്ചു.
Somebody has created a pic of mine sticking their mothers or sisters body with my face on it and is spreading in…
Posted by Anjali Aneesh Upasana on Saturday, March 26, 2016
കഴിഞ്ഞയാഴ്ച്ചയാണ് യുവനടി ജ്യോതി കൃഷ്ണയുടെ മോര്‍ഫ് ചെയ്ത ഫോട്ടോ സോഷ്യല്‍മീഡിയ വഴി പ്രചരിച്ചത്. അതിനെതിരെ ജ്യോതി പ്രതികരിക്കുകയും ചെയ്തിരുന്നു. അതിന് മുന്‍പ് ആശ ശരത്, ശ്രേയ രമേശ് തുടങ്ങിയവരുടെ വ്യാജഫോട്ടോകളും പ്രചരിച്ചിരുന്നു. ഇത്തരം സംഭവങ്ങള്‍ തുടരുന്ന സാഹചര്യത്തില്‍ കുറ്റവാളികള്‍ക്കെതിരെ കര്‍ശന നടപടികള്‍ സ്വീകരിക്കാനാണ് പൊലീസിന്റെ തീരുമാനം.
2010ല്‍ ‘നെല്ല്’ എന്ന തമിഴ് സിനിമയിലൂടെയാണ് അഞ്ജലി സിനിമാ രംഗത്തെത്തുന്നത്. തുടര്‍ന്ന് ഉന്നൈ കാതലിപ്പേന്‍, സീനിയേഴ്‌സ്, സീന്‍ 1 നമ്മുടെ വീട്, വെനീസിലെ വ്യാപാരി, എബിസിഡി തുടങ്ങി നിരവധി ചിത്രങ്ങളിലും വേഷമിട്ടിട്ടുണ്ട്. ‘ബെന്‍’ എന്ന സിനിമയിലെ അഭിനയത്തിലൂടെ 2015ലെ മികച്ച സ്വഭാവനടിക്കുള്ള സംസ്ഥാന സര്‍ക്കാര്‍ പുരസ്‌കാരവും അഞ്ജലിയെ തേടിയെത്തി.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
