ചിക്കന്‍ ഫ്രീയായി വേണമെന്ന് ചോദിച്ചാല്‍ ഗിന്നസില്‍ ഇടം പിടിക്കാനാകുമോ; പതിനാറുകാരന്റെ കഥ വൈറലാകുന്നു

ഗിന്നസ് ബുക്കില്‍ ഇടം പിടിക്കുകയെന്നത് ഏവരുടേയും സ്വപ്‌നമാണ്. ജീവിതത്തില്‍ അതിനുവേണ്ടി പരിശ്രമിക്കുന്നവരുടെ കഥകള്‍ക്കും ഒട്ടും പഞ്ഞമില്ല. എന്നാല്‍ സൗജന്യമായി ചിക്കന്‍ ലഭിക്കാനുള്ള തത്രപാടിലൂടെ ഗിന്നസ് ബുക്കില്‍ ഇടം പിടിച്ച പതിനാറുകാരന്റെ കഥ ഏവരേയും അമ്പരപ്പെടുത്തുകയാണിപ്പോള്‍.

ചിക്കന്‍ സൗജന്യമായി ലഭിക്കാന്‍ എത്ര റിട്വീറ്റുകള്‍ വേണമെന്ന് ചോദിച്ച് ട്വീറ്റ് ചെയ്താണ് അമേരിക്കക്കാരനായ കാര്‍ട്ടര്‍ വില്‍കേഴ്‌സണ്‍ പുതിയ റെക്കോഡ് സ്ഥാപിച്ചത്. ഏറ്റവും കൂടുതല്‍ റീട്വീറ്റുകള്‍ ലഭിച്ച പോസ്റ്റ് എന്ന ഗിന്നസ് റെക്കോര്‍ഡാണ് ഈ കൗമാരക്കാരന്റെ പേരിലായത്. ടെലിവിഷന്‍ അവതാരക അല്ലെന്‍ ഡീജനറസിന്റെ പ്രശസ്തമായ ഓസ്‌കര്‍ സെല്‍ഫിയുടെ റെക്കോഡാണ് കാര്‍ട്ടര്‍ ‘ചിക്കന്‍ ട്വീറ്റ്’ കൊണ്ട് ചരിത്രമാക്കിയത്.

ഫാസ്റ്റ് ഫുഡ് ശൃംഖലയായ വെന്‍ഡിസിനോട് തന്റെ ഇഷ്ട വിഭവമായ ചിക്കന്‍ നഗ്ഗട്ട് ഒരു വര്‍ഷം സൗജന്യമായി ലഭിക്കാന്‍ എത്ര റിട്വീറ്റുകള്‍ വേണമെന്ന് ചോദിച്ചാണ് കാര്‍ട്ടര്‍ പോസ്റ്റിട്ടത്. 1.8 കോടി റിട്വീറ്റുകള്‍ എന്നായിരുന്നു വെന്‍ഡിസിന്റെ മറുപടി. ചിക്കന്‍ സൗജന്യമായി ലഭിക്കാന്‍ സഹായിക്കണമെന്നാവശ്യപ്പെട്ടുകൊണ്ട് മറുപടി ട്വീറ്റിന്റെ സ്‌ക്രീന്‍ ഷോട്ട് ഉള്‍പ്പെടെ കാര്‍ട്ടര്‍ ട്വീറ്റ് ചെയതതോടെയാണ് പുതിയ ഗിന്നസ് റെക്കോര്‍ഡ് പിറന്നത്

ട്വിറ്ററിനെ പോലും അമ്പരപ്പിച്ച റിട്വീറ്റ് പെരുമഴയാണ് പിന്നീടുണ്ടായത്. എന്തായാലും സൗജന്യമായി ചിക്കന്‍ കഴിക്കാനുള്ള തന്റെ മോഹത്തിന് സഹായം നല്‍കിയ ഏവരോടും കാര്‍ട്ടര്‍ നന്ദിയും കടപ്പാടുമുള്ളവനായിരിക്കും

whatsapp

കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക

Click Here