മലയാള സിനിമയിലെ കാസ്റ്റിങ്ങ് കൗച്ചിങ്ങിനെക്കുറിച്ച് ആദ്യമായി തുറന്നു പറഞ്ഞത് പത്മപ്രിയയായിരുന്നു.മലയാള സിനിമയുടെ മറ്റൊരു മുഖത്തെ വെളിപ്പെടുത്തിയ പത്മപ്രിയയുടെ തുറന്നു പറച്ചില് ഏറെ വിവാദം സൃഷ്ടിച്ചു.
ഇപ്പോള് പുതിയ വെളിപ്പെടുത്തലുമായി പത്മപ്രിയ വീണ്ടും രംഗത്തെത്തി.
സിനിമയില് കാസ്റ്റിങ്ങ് കൗച്ചിങ്ങിനെക്കുറിച്ചും താന് ഇതിന് ഇരയായി എന്നുമുള്ള വാര്ത്ത തെറ്റാണെന്നും അത്തരമൊരു അനുഭവവും തനിക്ക് നേരിടേണ്ടി വന്നിട്ടില്ലെന്നും അവര് വ്യക്തമാക്കി. കേരളവും മലയാളികളും എനിക്ക് എന്നും പ്രിയപ്പെട്ടവരാണ്.
എന്റെ കഴിവിന്റെ അടിസ്ഥാനത്തിലാണ് എനിക്ക് സിനിമയില് വേഷങ്ങള് ലഭിച്ചത്. മറിച്ചുള്ള വാര്ത്തകള് തെറ്റാണ്.
ഇന്ത്യന് സിനിമയിലെ മൊത്തത്തിലുള്ള അവസ്ഥയെക്കുറിച്ചാണ് താന് പറഞ്ഞത്. പത്മപ്രിയ വാര്ത്താക്കുറിപ്പില് പറഞ്ഞു.
വാര്ത്താക്കുറിപ്പിന്റെ പൂര്ണ രൂപം
ഒരു നടിയായി കരിയര് ആരംഭിച്ചതുമുതല് കേരളവും മലയാള സിനിമാരംഗവും എനിക്കെന്റെ സ്വന്തം വീട് പോലെയാണ്. ഇവിടുത്തെ പ്രേക്ഷകരും സര്ക്കാരും സിനിമാരംഗത്തുള്ള സഹപ്രവര്ത്തകരുമെല്ലാം എന്നെ അംഗീകരിക്കുകയും സ്നേഹിക്കുകയും ചെയ്തിട്ടുണ്ട്. ഇതിന് സംസ്ഥാനത്തോടും സിനിമാവ്യവസായത്തോടും എനിക്ക് കടപ്പാടുമുണ്ട്.
ഈ സാഹചര്യത്തില് ഒരു കാര്യം വ്യക്തമാക്കാന് ഞാന് ആഗ്രഹിക്കുകയാണ്. കാസ്റ്റിങ് കൗച്ച് എന്നു വിശേഷിപ്പിക്കാവുന്ന ആ സംഭവത്തിന് ഇതുവരെ എനിക്ക് ഇരയാകേണ്ടിവന്നിട്ടില്ല.
ഒരു അഭിനേത്രി എന്ന നിലയില് എന്റെ കഴിവു കൊണ്ടും സിനിമാരംഗത്തെ സഹപ്രവര്ത്തകരില് നിന്നുള്ള ബഹുമാനവും കൊണ്ട് മാത്രമാണ് എനിക്ക് അവസരങ്ങള് ലഭിച്ചിട്ടുള്ളത്.
ഇത്തരം മാപ്പര്ഹിക്കാത്ത ഒരു അതിക്രമം സഹിക്കേണ്ടിവന്നവര് ആരായാലും ഇതിനെതിരെ ശബ്ദമുയര്ത്തിയേ പറ്റൂ. എന്റേതല്ലാത്ത, ഞാന് അനുഭവിക്കാത്ത ഒരു കാര്യം സാക്ഷ്യപ്പെടുത്താന് എനിക്കാവില്ല.
അതുകൊണ്ട് മാധ്യമങ്ങളില് വന്ന വാര്ത്തയില് പ്രതിഫലിച്ചത് ഈ വിഷയത്തിലുള്ള എന്റെ നിലപാടല്ല. അത് വാസ്തവവിരുദ്ധവും കെട്ടിച്ചമച്ചതുമാണ്. ഇത്തരം വാര്ത്തകള് പ്രചരിപ്പിക്കുന്നവര് അതില് നിന്ന് മാധ്യമപ്രവര്ത്തകര് പിന്തിരിയണമെന്നാണ് എനിക്കുള്ള അപേക്ഷ.
ഇന്ത്യന് സിനിമയിലെ മൊത്തം അവസ്ഥയെക്കുറിച്ചുള്ള പൊതുവായ ഒരു അഭിപ്രായമാണ് ഞാന് നടത്തിയത്.
ഒരു സിനിമാ പ്രവര്ത്തക എന്ന നിലയില് കാസ്റ്റിങ് കൗച്ച് പോലുള്ള പ്രവണതകള്ക്ക് വിധേയരാകേണ്ടിവന്നുവെന്ന് പറയുന്നവര്ക്കും അതിന് വിധേയരാവാന് സാധ്യതയുള്ളവര്ക്കും, അവര് ആണുങ്ങളായാലും പെണ്ണുങ്ങളായാലും ശരി, അവര്ക്ക് പിന്നില് ശക്തമായി തന്നെ നിലയുറപ്പിക്കും ഞാന്.
നമ്മള് ഇവിടെയുള്ളത് ജോലി ചെയ്യാനും ഒരു കലാരൂപം സൃഷ്ടകിക്കാനുമാണ്. അതില് തുല്ല്യതയും സുരക്ഷിതത്വവും ആശ്രയിക്കാവുന്നതുമാക്കാം.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here