കൊച്ചി: നടി ആക്രമിക്കപ്പെട്ട കേസിലെ കുറ്റപത്രത്തിന്റെ പകര്പ്പ് പീപ്പിള് ടിവിക്ക് ലഭിച്ചു.
നടിയെ ആക്രമിക്കാന് പള്സര് സുനിക്ക് ദിലീപ് ക്വട്ടേഷന് നല്കിയത് 1.5 കോടി രൂപയ്ക്കാണെന്ന് കുറ്റപത്രം വ്യക്തമാക്കുന്നു. പള്സര് സുനിയുടെ അമ്മയുടെ അക്കൗണ്ടിലേക്കാണ് ദിലീപ് പണം കൈമാറിയത്.
നടി ആക്രമിക്കപ്പെടാനുള്ള യഥാര്ത്ഥ കാരണമെന്താണെന്നതടക്കമുള്ള ചോദ്യങ്ങള്ക്കുള്ള ഉത്തരം നല്കുന്നതാണ് കുറ്റപത്രം. നടി ആക്രമിക്കപ്പെടുന്നതിന്റെ ഒരേ ഒരു കാരണം ദിലീപിനുണ്ടായിരുന്ന പകയാണ്.
കാവ്യയുമായുള്ള ബന്ധത്തെക്കുറിച്ച് മഞ്ജുവാര്യരോട് പറഞ്ഞതാണ് നടിയോട് ദിലീപിന് വൈരാഗ്യം തോന്നാന് കാരണമായതെന്നും കുറ്റപത്രം വ്യക്തമാക്കുന്നു.
ക്വട്ടേഷന് ഗൂഢാലോചന നടത്തിയത് മൂന്നു സ്ഥലത്ത് വച്ചാണ്. തോപ്പുംപടി, തൃശൂര്, തൊടുപുഴ എന്നിവടിങ്ങളില് വച്ചാണ് ഗൂഢാലോചന നടന്നത്. കൂട്ടബലാത്സംഗം നടത്തി അശ്ലീലദൃശ്യങ്ങള് ചിത്രീകരിക്കാനായിരുന്നു ദിലീപിന്റെ നിര്ദേശമെന്നും കുറ്റപത്രത്തില് പറയുന്നു.
മലയാള സിനിമയില് നിന്നും നടിയെ മാറ്റി നിര്ത്താന് ദിലീപ് ശ്രമിക്കുകയും ചെയ്തെന്നും കുറ്റപത്രം വ്യക്തമാക്കുന്നു.
പള്സര് സുനിയടക്കമുള്ള മറ്റ് പ്രതികള്ക്ക് നടിയോട് വ്യക്തിപരമായി വൈരാഗ്യമില്ലത്തതും കുറ്റപത്രത്തില് എടുത്തു പറയുന്നു. ദിലീപ് നല്കിയ ബലാത്സംഗക്വട്ടേഷന് ഏറ്റെടുത്താണ് പള്സര് സുനി ആക്രമണം നടത്തിയതെന്നും കുറ്റപത്രം വ്യക്തമാക്കുന്നു.
അങ്കമാലി കോടതിയിലാണ് അന്വേഷണസംഘം കുറ്റപത്രം സമര്പ്പിച്ചത്. 1555 പേജുകളുള്ള കുറ്റപത്രത്തില് മുന്നൂറിലധികം സാക്ഷികളും 450ല് അധികം രേഖകളും പൊലീസ് ഉള്പ്പെടുത്തിയിട്ടുണ്ട്. നടിയും ദിലീപിന്റെ മുന് ഭാര്യയുമായിരുന്ന മഞ്ജുവാര്യര് കേസില് പ്രധാന സാക്ഷിയാണ്.
അന്വേഷണ ഉദ്യോഗസ്ഥന് പെരുമ്പാവൂര് സി.ഐ ബൈജു പൗലോസാണ് അങ്കമാലി കോടതിയില് കുറ്റപത്രം സമര്പ്പിച്ചത്.
ആക്രമണത്തില് നേരിട്ട് പങ്കെടുത്തവരാണ് ഒന്നു മുതല് ഏഴു വരെയുള്ള പ്രതികള്. കേസിലെ 12 പ്രതികളില് ദിലീപ് എട്ടാം പ്രതിയാണ്. കൂട്ടബലാത്സംഗം അടക്കം 17 വകുപ്പുകളാണ് ദിലീപിന് മേല് ചുമത്തിയിട്ടുളളത്.
നടി ആക്രമിക്കപ്പെട്ട കേസില് ജാമ്യത്തിലിറങ്ങിയ ദിലീപ് സാക്ഷികളെ സ്വാധീനിക്കാന് ശ്രമിച്ചുവെന്ന്് അന്വേഷണസംഘത്തിന്റെ കണ്ടെത്തലുകള് ഉണ്ട്. ലക്ഷ്യയിലെ ജീവനക്കാരന് മൊഴി മാറ്റിയതും കേസിലെ ഏഴാം പ്രതി ചാര്ളിയുടെ രഹസ്യമൊഴി നീക്കം തടഞ്ഞതും ദിലീപിന്റെ ഇടപെടല് മൂലമെന്നും പൊലീസ് കണ്ടെത്തിയിട്ടുണ്ട്.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here