ഭക്ഷണത്തില്‍ ശ്രദ്ധിച്ചാല്‍ തൈറോയിഡിനെ അകറ്റാം

ഇന്ന് പലരെയും അലട്ടുന്ന പ്രധാന ആരോഗ്യപ്രശ്നമാണ് തൈറോയ്ഡ്. തൈറോയ്ഡ് ഗ്രന്ഥിയുടെ സുഗമമായ പ്രവര്‍ത്തനങ്ങള്‍ക്ക് ഭംഗം സംഭവിക്കുന്നുവെന്ന് ചുരുക്കം. തൈറോയ്ഡ് ഗ്രന്ഥി ഉല്‍പ്പാദിപ്പിക്കുന്ന തൈറോയ്ഡ് ഹോര്‍മോണുകളില്‍ പ്രധാനിയാണ് ട്രിയോഡോതൈറോനിന്‍ (ടി3), Triodothyronine (ഠ3), തൈറോക്സിന്‍ (ടി4) Thyroxine അല്ലെങ്കില്‍ ടെട്രായ്ഡോതൈറോനിന്‍ Tetraidothyronine. ഭക്ഷണത്തില്‍നിന്നു ലഭിക്കുന്ന അയഡിന്‍ ഉപയോഗിച്ചാണ് തൈറോയ്ഡ് ഗ്രന്ഥി ഹോര്‍മോണ്‍ ഉല്‍പ്പാദനം നടത്തുന്നത്.

തൈറോയ്ഡ് ഗ്രന്ഥിയുടെ പ്രവര്‍ത്തനത്തിന് ഭംഗം വരുമ്പോള്‍ ഗ്രന്ഥി ഉല്‍പ്പാദിപ്പിക്കുന്ന ഹോര്‍മോണുകള്‍ക്ക് ഏറ്റക്കുറച്ചിലുകള്‍ സംഭവിക്കാം. ഏറ്റക്കുറച്ചിലുകള്‍ രണ്ടുതരം തൈറോയ്ഡിലേക്ക് വഴിതിരിക്കാം.

ഗ്രന്ഥി ആവശ്യാനുസരണം ഹോര്‍മോണ്‍ ഉല്‍പ്പാദിപ്പിക്കാതെവരുന്നതു കാരണം ഹൈപ്പോ തൈറോയ്ഡ് (രക്തത്തില്‍ തൈറോയ്ഡ് സ്റ്റിമുലേറ്റിങ് ഹോര്‍മോണിന്റെ -TSH ന്റെ അളവ് കൂടുതലായികാണപ്പെടുന്ന അവസ്ഥ) എന്ന അവസ്ഥ ഉണ്ടാകുന്നു. അതിന്റെ ഫലമായി ശരീരഭാരം ക്രമാതീതമായി വര്‍ധിക്കുന്നു. മന്ദത, അലസത തുടങ്ങിയവ അനുഭവപ്പെടല്‍, ഡിപ്രഷന് കാരണമാകുന്നു. തണുപ്പ് അസഹനീയമാകാം (തണുപ്പ് TSH ന്റെ അളവില്‍ വ്യതിയാനം ചെലുത്താം).

തൈറോയ്ഡ് ഗ്രന്ഥി അമിതമായി തൈറോക്സിന്‍ ഹോര്‍മോണ്‍ ഉല്‍പ്പാദിപ്പിച്ചാല്‍ അത് ഹൈപ്പര്‍ തൈറോയ്ഡിലേക്ക് നയിക്കും. ശരീരഭാരം പെട്ടെന്ന് കുറയുക, ഹൃദയമിടിപ്പ് വ്യതിയാനങ്ങള്‍ വരിക, അമിതമായി വിയര്‍ക്കുക തുടങ്ങിയവയ്ക്ക് കാരണമാകും.

തൈറോയ്ഡ്- പൊതുലക്ഷണങ്ങള്‍
മുടികൊഴിച്ചില്‍, ആര്‍ത്തവപ്രശ്നങ്ങള്‍, ശരീരവേദന, ഞരമ്പുകള്‍ക്ക് വേദന, വന്ധ്യത എന്നിവയ്ക്കും കാരണമാകാം.
രണ്ടുതരം തൈറോയ്ഡുകള്‍ക്കും വ്യത്യസ്തമായ ലക്ഷണങ്ങളും, ആഹാരക്രമീകരണങ്ങളുംഉണ്ട്.സാമ്യമായ ലക്ഷണങ്ങളും കാണാം.

ഹൈപ്പോ തൈറോയ്ഡും ഭക്ഷണക്രമീകരണവും
TSHന്റെ അളവ് കൂടുന്നതാണ് ഹൈപ്പോ തൈറോയ്ഡിന്റെ കാരണം. അതിനാല്‍ ഹൈപ്പോതൈറോയ്ഡ് ഉള്ളവര്‍ തങ്ങളുടെ ഭക്ഷണക്രമീകരണത്തില്‍ കൂടുതല്‍ ശ്രദ്ധകേന്ദ്രീകരിക്കണം.

അയഡിന്‍: ഹൈപ്പോതൈറോയ്ഡ് എങ്കില്‍ കൂടുതല്‍ അയഡിന്‍ അടങ്ങിയ ഭക്ഷണങ്ങളായ അയഡൈസ്ഡ് ഉപ്പ്, കടല്‍മത്സ്യങ്ങള്‍, മുട്ട തുടങ്ങിയവ ഉള്‍പ്പെടുത്താം. ഇങ്ങനെ വരുമ്പോള്‍ ശരീരത്തിലെ സോഡിയത്തിന്റെ അളവില്‍ വ്യതിയാനം സംഭവിച്ച് തൈറോയ്ഡ് ഗ്രന്ഥിയുടെ പ്രവര്‍ത്തനത്തെ സഹായിക്കും.

ഫ്രഷ് ജ്യൂസ്
വിറ്റാമിന്‍ സി അടങ്ങിയ പഴച്ചാറുകള്‍ ശരീരത്തില്‍ പ്രതിരോധശേഷി വര്‍ധിപ്പിച്ച് തൈറോയ്ഡ് ഗ്രന്ഥിയുടെ സുഗമമായ പ്രവര്‍ത്തനത്തിന് സഹായിക്കും.

ഗുണമേകും മസാലകള്‍
കുരുമുളക്, ഇഞ്ചി, കറുവാപ്പട്ട തുടങ്ങിയവ ശരീരതാപനില വര്‍ധിപ്പിച്ച് അപചയപ്രവര്‍ത്തനങ്ങളെ ശക്തിപ്പെടുത്താന്‍ സഹായിക്കും.
പ്രകൃതിയാലുള്ളവ ഉള്‍പ്പെടുത്തുക

അമിതമായ കെമിക്കലുകള്‍ ഉപയോഗിച്ച് ഉണ്ടാക്കുന്നവ വര്‍ജിക്കുക. നമ്മുടെ ചുറ്റുവട്ടത്തുനിന്ന് ലഭിക്കുന്ന വാഴപ്പഴം, ഇലകള്‍, മറ്റ് വിഭവങ്ങള്‍ കൂടുതലായി ഉപയോഗിക്കാം. ഒപ്പം മഞ്ഞള്‍പ്പൊടിയും. ഇവ തൈറോയ്ഡ് പ്രശ്നങ്ങള്‍ പരിഹരിക്കാന്‍ സഹായിക്കും.

വെളിച്ചെണ്ണ
മറ്റു റിഫൈന്‍ഡ് എണ്ണകളെക്കാള്‍ തൈറോയ്ഡ് രോഗികള്‍ക്ക് നല്ലത് ശുദ്ധമായ വെളിച്ചെണ്ണയാണ്. ഇതില്‍ മീഡിയം ചെയിന്‍ ഫാറ്റി ആസിഡ്, Caprylic acid, lauric acid, capric acid എന്നീ മൂന്ന് രൂപത്തില്‍ ഉള്ളതിനാല്‍ ഇത് ശരീരത്തിന്റെ പ്രവര്‍ത്തനത്തെ ത്വരിതപ്പെടുത്തുന്നു. ഒപ്പം പ്രതിരോധശേഷി വര്‍ധിപ്പിക്കാനും തലച്ചോറിന്റെ പ്രവര്‍ത്തനത്തെ വര്‍ധിപ്പിക്കാനും സഹായിക്കും. മിതമായ ഉപയോഗം ഉത്തമം.

മുളപ്പിച്ച വിത്തുകള്‍
ചണപ്പയര്‍, ചീയ വിത്തുകള്‍ തുടങ്ങിയവ മുളപ്പിക്കുകവഴി എഎല്‍എ (ALA) എന്നഒരുതരം ഒമേഗ-3 ഉല്‍പ്പാദിപ്പിക്കുകയും ഇത് ഹോര്‍മോണ്‍ വ്യതിയാനം കുറയ്ക്കാന്‍ സഹായിക്കുകയും ചെയ്യുന്നു.

നാര്
30-40 ഗ്രാം വരെ നാര് ഒരുദിവസം ഭക്ഷണത്തില്‍ ഉള്‍പ്പെടുത്തുന്നതുവഴി ഹൃദയാരോഗ്യം, രക്തത്തിലെ പഞ്ചസാരയുടെ അളവ് നിയന്ത്രിക്കല്‍, ദഹനത്തെ സഹായിക്കല്‍ തുടങ്ങിയ ധാരാളം കര്‍മങ്ങള്‍ നിര്‍വഹിക്കും. അതിനായി ധാരാളം പച്ചക്കറികളും പഴവര്‍ഗങ്ങളും ഭക്ഷണത്തില്‍ ഉള്‍പ്പെടുത്തണം. വിറ്റാമിനുകളുടെയും മിനറലുകളുടെയും, ആന്റി ഓക്സിഡന്റുകളുടെയും കലവറകൂടിയാണ് ഇവ.

ശുദ്ധമായ ജലം
ജലം ശരീരത്തെ ഹൈഡ്രേറ്റാക്കി വയ്ക്കാനും ദഹനപ്രവര്‍ത്തനങ്ങളെ സഹായിക്കാനും ഒപ്പം മധുരത്തോടുള്ള ആസക്തി കുറയ്ക്കാനും സഹായിക്കും. 10 മുതല്‍ 15 ഗ്ളാസ്വരെ ശുദ്ധജലം കുടിക്കണം.

തൈറോയ്ഡ് മെഡിക്കേഷന്റെ ആഗിരണത്തെ പരോക്ഷമായി ബന്ധിക്കുന്നവ
ചില ഭക്ഷ്യവസ്തുക്കളും പോഷകങ്ങളും തൈറോയ്ഡിന്റെ മരുന്നുകള്‍ അവ ഉദ്ദേശിക്കുന്ന ഫലം നല്‍കാതെ അവയുടെ ആഗിരണത്തെ തടസ്സപ്പെടുത്തുന്നു. അതിനാല്‍ തൈറോയ്ഡ് മരുന്നുകള്‍ ഉപയോഗിക്കുന്നവര്‍ ഏകദേശം 3-4 മണിക്കൂറിനുശേഷം മാത്രം ഇത്തരത്തില്‍ ദൂഷ്യമുണ്ടാക്കുന്നവ ഉപയോഗിക്കുക.

ശ്രദ്ധിക്കുക
തൈറോയ്ഡിന്റെ മരുന്നുകള്‍ രാവിലെ വെറുംവയറ്റില്‍ കൃത്യസമയം പാലിച്ച് കഴിക്കേണ്ടതാണ്.
ഇരുമ്പ്, കാത്സ്യം, വിറ്റാമിന്‍ ഡി, ഒമേഗ-3, മഗ്നീഷ്യം തുടങ്ങിയ മരുന്നുകളുടെ പൂര്‍ണമായ ആഗിരണത്തെ തടസ്സപ്പെടുത്തുമെന്നതിനാല്‍ ചായ, കാപ്പി, ഓറഞ്ച്, പാല്‍, കൂരവ്, സോയ, ബദാം, കാഷ്യു, തൈര്, ഇലക്കറികള്‍, ചെറുപയര്‍ തുടങ്ങിയവ നിശ്ചിത സമയത്തിനുശേഷം മാത്രം ഉപയോഗിക്കുക. എന്തെന്നാല്‍ ചില ഭക്ഷ്യവസ്തുക്കള്‍ ലിവോതൈറോക്സിന്റെ ആഗിരണത്തെ തടസ്സപ്പെടുത്തും.

ചിലമരുന്നുകളും (Salmeterol,Asprin,Vitamin-D, Doloxeline, Fursosemide, Alrovastin) ലിവോതൈറോക്സിന്റെ ആഗിരണത്തെ തടസ്സപ്പെടുത്തും. അതിനാല്‍ ഈ ഇനത്തില്‍പ്പെട്ട മരുന്നുകളും നിശ്ചിതസമയത്തിനുശേഷം ഉപയോഗിക്കുക.

ഹൈപ്പോതൈറോയ്ഡ്- ഒഴിവാക്കേണ്ടവ
ക്രൂസിഫെറസ് പച്ചക്കറികളായ കാബേജ്, കോളിഫ്ളവര്‍, ബ്രോക്കോളി തുടങ്ങിയവ, സോയയും സോയാ ഉല്‍പ്പന്നങ്ങളും, പീനട്ട്, ബദാം, വാല്‍നട്ട്, ക്യാഷ്യു, ടര്‍നിപ്പ്, റാഡിഷ്, ഉരുളക്കിഴങ്ങ്, മധുരക്കിഴങ്ങ്, കപ്പ, ബാര്‍ലി, കോണ്‍, കടുക്, കട്ടന്‍, ഗ്രീന്‍ടീ, സ്ട്രോബറി, മുന്തിരി, ജങ്ഫുഡ്, അമിതമായ മധുരം, ഇലക്കറികള്‍ പച്ചയ്ക്ക്.

നിയന്ത്രിക്കേണ്ടവ
ഗോതമ്പ്, റവ, ആട്ട, മൈദ, ഓട്സ്, ചായ, കാപ്പി, പ്രോസസ്ഡ് ഭക്ഷ്യവസ്തുക്കള്‍, സോഡ, എണ്ണയില്‍ വറുത്തവ. പായ്ക്കറ്റ് ജ്യൂസ്.

ഉള്‍പ്പെടുത്തുക
അയഡിന്‍ അടങ്ങിയ ഭക്ഷ്യവസ്തുക്കള്‍, കടല്‍മത്സ്യങ്ങള്‍, ചിക്കന്‍, മുഴുധാന്യങ്ങള്‍, പാല്‍ ഉല്‍പ്പന്നങ്ങള്‍, വെളുത്തുള്ളി, സവാള, പഴങ്ങളും പച്ചക്കറികളും, ഒമേഗ-3 അടങ്ങിയവ, മാംസ്യം ധാരാളം അടങ്ങിയവ, വൈറ്റമിന്‍-ഡി അടങ്ങിയവ എന്നിങ്ങനെയുള്ളവ കൂടുതലായി ഉള്‍പ്പെടുത്താന്‍ ശ്രമിക്കാം.

ഹൈപ്പര്‍തൈറോയ്ഡ് ഒഴിവാക്കേണ്ടവ
അയഡൈസ്ഡ് ഉപ്പ്, പാലും പാല്‍ ഉല്‍പ്പന്നങ്ങളും, കടല്‍മത്സ്യങ്ങള്‍, ബേക്കറി, മുട്ടയുടെ മഞ്ഞ, പാല്‍ചോക്ക്, സോയയും സോയാ ഉല്‍പ്പന്നങ്ങളും, മദ്യം, കൃത്രിമനിറങ്ങള്‍ ചേര്‍ത്ത പാനീയങ്ങള്‍, അയഡിന്‍ ഉള്ള വിറ്റാമിന്‍ സപ്ളിമെന്റുകള്‍ തുടങ്ങിയവ ഉള്‍പ്പെടുത്തുക

അയഡിന്‍ ഇല്ലാത്ത ഉപ്പ്, മുട്ടയുടെ വെള്ള, ബദാം, മുഴുധാന്യങ്ങള്‍, കാപ്പി, ചായ, ഗോതമ്പ്, കാബേജ്, കോളിഫ്ളവര്‍, സോയാചങ്ക്സ്, ഗ്രീന്‍ ടി, പഴങ്ങളും പച്ചക്കറികളും തുടങ്ങിയവ.

മറ്റ് അസുഖങ്ങള്‍ തൈറോയിഡിനൊപ്പം ഉള്ളവര്‍ കുറച്ചുകൂടി കരുതലോടെ ഭക്ഷണകാര്യങ്ങള്‍ ശ്രദ്ധിക്കണം. കാരണം ഓരോ അസുഖത്തിന് വ്യത്യസ്മാണ് അവയുടെ ഭക്ഷണക്രമീകരണം. അത് വിദഗ്ധരുടെ നിര്‍ദേപ്രകാരംമാത്രം ഭക്ഷണക്രമീകരണം വരുത്തുക.

( തിരുവനന്തപുരം ആറ്റുകാല്‍ദേവി ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സസില്‍ ക്ളിനിക്കല്‍ ന്യട്രീഷ്യനിസ്റ്റ് ശുഭശ്രീ പ്രശാന്ത് ദേശാഭിമാനിയിലെ‍ഴുതിയ ലേഖനം)

whatsapp

കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക

Click Here
ksfe-diamond
bhima-jewel

Latest News