ജിഷക്കേസില്‍ വിധി അല്‍പ്പസമയത്തിനുള്ളില്‍; അമീറുളളിനെ കോടതിയിലേക്ക് എത്തിച്ചു; പ്രതിക്ക് വധ ശിക്ഷ നല്‍കണമെന്ന് ജിഷയുടെ അമ്മ

ജിഷക്കേസില്‍ ഇന്ന് അല്‍പ്പ സമയത്തിനുള്ളില്‍ വിധിയുണ്ടാകും. പ്രതി അമീറുള്‍ ഇസ്‌ളാമിനെ എറണാകുളം പ്രിന്‍സിപ്പള്‍ സെഷന്‍ കോടതിയിലെത്തിച്ചു. പ്രതിക്ക് വധ ശിക്ഷ നല്‍കണമെന്ന് ജിഷയുടെ അമ്മ ആവശ്യപ്പെട്ടു

പ്രോസിക്യൂഷന്റെയും പ്രതിഭാഗത്തിന്റെയും വിശദമായ വാദം കേട്ട ശേഷമാണ് പ്രിന്‍സിപ്പല്‍ സെഷന്‍സ് ജഡ്ജി എന്‍ അനില്‍ കുമാര്‍ കേസ് ഇന്ന് വിധി പറയാനായി മാറ്റിയത്. കഴിഞ്ഞ ഏപ്രില്‍ 3 നാണ് കേസില്‍ വിചാരണ തുടങ്ങിയത്.

74 ദിവസത്തോളം നീണ്ട വിചാരണയില്‍ 100 ഓളം സാക്ഷികളെയാണ് വിസ്തരിച്ചത്. പ്രതിഭാഗം സാക്ഷികളായി 5 പേരെയും വിസ്തരിച്ചു.291 രേഖകളും 36 തൊണ്ടിമുതലുകളും കോടതി പരിശോധിച്ചു.കഴിഞ്ഞ മാസം 21നാണ് കേസില്‍ അന്തിമ വാദം തുടങ്ങിയത്.

അസം സ്വദേശി അമീറുള്‍ ഇസ്ലാമാണ് പ്രതിയെന്ന് തിരിച്ചറിഞ്ഞതിനെ തുടര്‍ന്ന് ജൂണ്‍ 16ന് ഇയാളെ കാഞ്ചീപുരത്തു നിന്ന് പോലീസ് പിടികൂടി. ചോദ്യം ചെയ്യലും തെളിവെടുപ്പും ഉള്‍പ്പടെ അന്വേഷണം അതിവേഗം പൂര്‍ത്തിയാക്കിയ പോലീസ് സെപ്റ്റംബര്‍ 17ന് എറണാകുളം പ്രിന്‍സിപ്പല്‍ സെഷന്‍സ് കോടതിയില്‍ കുറ്റപത്രം സമര്‍പ്പിച്ചു.

2016 ഏപ്രില്‍ 28 നായിരുന്നു പെരുമ്പാവൂര്‍ ഇരിങ്ങോളിലെ ഇരവിച്ചിറ കനാല്‍ പുറമ്പോക്കിലെ ഒറ്റമുറി വീട്ടില്‍ വെച്ച് നിയമവിദ്യാര്‍ത്ഥിനിയെ അതിക്രൂരമായി കൊലപ്പെടുത്തിയ നിലയില്‍ കണ്ടെത്തിയത്. തൊട്ടടുത്ത ദിവസം പോസ്റ്റ്മോര്‍ട്ടത്തിനു ശേഷം രാത്രി തിടുക്കപ്പെട്ട് പോലീസ് സാന്നിധ്യത്തില്‍ മൃതദേഹം സംസ്‌കരിച്ചത് പിന്നീട് വിവാദമായി.

മെയ് 2നാണ് കൊല്ലപ്പെട്ട വിദ്യാര്‍ത്ഥിനി ക്രൂരമായ ലൈംഗിക പീഡനത്തിന് വിധേയയായിരുന്നുവെന്ന പോസ്റ്റ്മോര്‍ട്ടം റിപ്പോര്‍ട്ടിലെ വിവരം പീപ്പിള്‍ ടിവി യിലൂടെ പുറംലോകമറിഞ്ഞത്.

ഇതോടെ കൊലപാതകിയെ ഉടന്‍ പിടികൂടണമെന്നാവശ്യപ്പെട്ട് ജനകീയ പ്രക്ഷോഭം ആരംഭിച്ചു.ഐ ജി മഹിപാല്‍ യാദവിന്റെ മേല്‍നോട്ടത്തിലായിരുന്നു അന്വേഷണം.തെളിവുകള്‍ ശേഖരിക്കുന്നതില്‍ പോലീസ് വീഴ്ച വരുത്തിയെന്ന ആക്ഷേപത്തെ തുടര്‍ന്ന് പ്രക്ഷോഭം ശക്തമായി. എല്‍ ഡി എഫിന്റെ നേതൃത്വത്തില്‍ രാപ്പകല്‍ സമരവും തുടങ്ങി.

ഇതെ തുടര്‍ന്ന് അന്വേഷണ സംഘം വിപുലീകരിച്ചെങ്കിലും പ്രതിയെ കണ്ടെത്താനാവാതെ പോലീസ് നെട്ടോട്ടമോടി. മെയ് 25 ന് എല്‍ ഡി എഫ് സര്‍ക്കാര്‍ അധികാരത്തില്‍ വരികയും കേസന്വേഷണം എഡിജിപി സന്ധ്യയുടെ നേതൃത്വത്തിലുള്ള പുതിയ സംഘത്തിന് വിടുകയും ചെയ്തു.ജൂണ്‍ 2ന് പ്രതിയുടേതെന്ന് കരുതുന്ന കളര്‍ രേഖാചിത്രം അന്വേഷണ സംഘം പുറത്തുവിട്ടു.

ജൂണ്‍ 10ന് ജിഷയെന്ന് സംശയിക്കുന്ന യുവതിയും രേഖാചിത്രത്തിലേതെന്നു കരുതുന്ന യുവാവും ജിഷയുടെ വീട്ടിലേയ്ക്കുള്ള റോഡിലൂടെ നീങ്ങുന്നതിന്റെ സി സി ടി വി ദൃശ്യങ്ങള്‍ പോലീസിന് ലഭിച്ചു.

തൊട്ടടുത്ത ദിവസം വീടിന്റെ പരിസരത്തു നിന്ന് ലഭിച്ച ചെരുപ്പില്‍ ജിഷയുടെ രക്ത കോശങ്ങള്‍ കണ്ടെത്തി. കുറുപ്പംപടിയിലെ ചെരുപ്പ് കടയുടമ പ്രതിയെക്കുറിച്ച് സൂചന നല്‍കി.
അങ്ങനെയാണ് പ്രതിയിലേക്ക് എത്തുന്നത്.