ദക്ഷിണാഫ്രിക്കന്‍ മണ്ണില്‍ താളം കണ്ടെത്തി രോഹിത്; അര്‍ധ സെഞ്ചുറി കടന്ന് കുതിക്കുന്നു; ഇന്ത്യന്‍ സ്കോര്‍ ശരവേഗത്തില്‍

ദക്ഷിണാഫ്രിക്കയില്‍ ചരിത്രം കുറിക്കാന്‍ ടീം ഇന്ത്യ അഞ്ചാം പോരാട്ടത്തിനിറങ്ങി. ടോസ് നഷ്ടമായി ഇന്ത്യ ബാറ്റിംഗിനിറങ്ങുകയായിരുന്നു.

ഇന്ത്യക്ക് വേണ്ടി ധവാനും രോഹിതും തന്നെയാണ് ഇന്നിംഗ്സ് തുടങ്ങിയത്. സ്വതസിദ്ധമായ ശൈലിയില്‍ അടിച്ചു തകര്‍ത്ത് മുന്നേറാന്‍ ശ്രമിച്ചെങ്കിലും അമിതാവേശം ധവാന് വിനയായി.

റബാഡയെ സിക്സറിന് പറത്താന്‍ ശ്രമിച്ച ധവാന് പി‍ഴച്ചു. ബൗണ്ടറി ലൈനിന് മുന്നില്‍ വെച്ച് ഫില്‍ക്വായയുടെ കൈകളില്‍ ധവാന്‍റെ ഇന്നിംഗ്സ് അവസാനിച്ചു. 23 പന്തില്‍ 34 റണ്‍സ് നേടിയാണ് ധവാന്‍ പുറത്തായത്.

അതേസമയം ദക്ഷിണാഫ്രിക്കന്‍ മണ്ണില്‍ ഇതുവരെയും ഫോം കണ്ടെത്താന്‍ ക‍ഴിയാത്ത രോഹിത് കരുതലോടെയാണ് കളിക്കുന്നത്. മികച്ച ഷോട്ടുകളുമായി കളം നിറഞ്ഞ രോഹിത് അര്‍ധ സെഞ്ചുറി നേടി കുതിക്കുകയാണ്. 50 പന്തില്‍ 2 സിക്സറുകളും 6 ഫോറും നേടിയാണ് രോഹിത് അര്‍ധശതകം തികച്ചത്.

ഒടുവില്‍ വിവരം ലഭിക്കുമ്പോള്‍ ഇന്ത്യ 34 ഓവറില്‍ 3 ന് 193 എന്ന നിലയിലാണ് . 10000 ക്ലബിലെത്താന്‍ ധോണിക്ക് സാധിക്കുമോയെന്നതാണ് ആരാധകര്‍ ഉറ്റുനോക്കുന്നത്. കേവലം 46 റണ്‍സ് മാത്രമകലെയാണ് ധോണി.