കണ്ണൂര്‍: കാനം രാജേന്ദ്രന്‍ നയിക്കുന്ന എല്‍ഡിഎഫ് കേരള സംരക്ഷണ യാത്ര വടക്കന്‍ മേഖലാ യാത്രയ്ക്ക് ഇന്ന് കണ്ണൂര്‍ ജില്ലയില്‍ നാല് കേന്ദ്രങ്ങളില്‍ സ്വീകരണം നല്‍കും.

മാമ്പറം പാലത്തിന് സമീപം നിന്നും എല്‍ഡിഎഫ് നേതാക്കളും പ്രവര്‍ത്തകരും ചേര്‍ന്ന് യാത്രയെ സ്വീകരിക്കും. കര്‍ഷക സമരങ്ങളുടെയും തൊഴിലാളി മുന്നേറ്റത്തിന്റെയും ചരിത്രം ഇരമ്പുന്ന കണ്ണൂരില്‍ യാത്ര ജന മുന്നേറ്റത്തിന്റെ കാഹളമാകും.

മമ്പറം എഡ്യൂക്കേഷന്‍ ട്രസ്റ്റ് മൈതാനത്താണ് വടക്കന്‍ മേഖലാ യാത്രയുടെ ചൊവ്വാഴ്ചത്തെ ആദ്യ സ്വീകരണ പൊതുയോഗം. മമ്പറം പാലം പരിസരത്ത് നിന്നും യാത്രയെ സ്വീകരിക്കും. മമ്പറത്തെ സ്വീകരണത്തിന് ശേഷം യാത്ര പാനൂരിലേക്ക് നീങ്ങും. പാനൂര്‍ കെ എസ് ഇ ബി പരിസരത്ത് നിന്നും യാത്രയെ വരവേല്‍ക്കും.

വൈകുന്നേരം മൂന്ന് മണിക്ക് പാനൂര്‍ ബസ്റ്റാന്റിലാണ് സ്വീകരണ പൊതു യോഗം. തലശ്ശേരിയാണ് മൂന്നാമത്തെ സ്വീകരണ കേന്ദ്രം. മഞ്ഞോടിയില്‍ നിന്നും യാത്രയെ തലശ്ശേരിയിലെ സ്വീകരണ കേന്ദ്രത്തിലേക്ക് ആനയിക്കും. വൈകുന്നേരം അഞ്ച് മണിക് കണ്ണൂര്‍ പോലീസ് മൈതാനിയില്‍ നല്‍കുന്ന സ്വീകരണത്തോടെ ചൊവ്വാഴ്ചത്തെ പര്യടനം പൂര്‍ത്തിയാകും.

ബുധനാഴ്ച രാവിലെ പത്ത് മണിക്ക് ഇരിട്ടിയിലാണ് കണ്ണൂര്‍ ജില്ലയിലെ അവസാനത്തെ സ്വീകരണം. ഇരിട്ടിയില്‍ നായനാര്‍ സ്മാരക മുന്‍സിപ്പല്‍ സ്റ്റേഡിയത്തിലെ സ്വീകരണത്തിന് ശേഷം യാത്ര വയനാട് ജില്ലയില്‍ പ്രവേശിക്കും.