ബിജെപി സ്ഥാനാര്‍ഥി പട്ടിക ഇന്ന്

ബിജെപി സ്ഥാനാര്‍ത്ഥി പട്ടിക ഇന്ന്. തൃശ്ശൂരില്‍ തുഷാര്‍ വെള്ളാപ്പള്ളി എന്‍ഡിഎ സ്ഥാനാര്‍ത്ഥിയായേക്കും. പത്തനംതിട്ടയില്‍ പിഎസ് ശ്രീധരന്‍ പിള്ളയ്ക്കാണ് മുന്‍തൂക്കം.

കെ സുരേന്ദ്രന്റെ കാര്യത്തില്‍ അനിശ്ചിതത്വം ഇപ്പോഴും നിലനില്‍ക്കുന്നു. ഇഷ്ട സീറ്റില്ലെങ്കില്‍ മത്സരിക്കില്ലെന്ന് നേതാക്കളുടെ കടുംപിടുത്തത്തിനിടെയാണ് പട്ടിക പുറത്തുവരുന്നത്.

പ്രതീക്ഷ വയ്ക്കുന്ന മണ്ഡലങ്ങളില്‍ പോലും വലിയ തര്‍ക്കം നിലനില്‍ക്കുന്നതിനിടെയാണ് ബിജെപി സ്ഥാനാര്‍ത്ഥി പട്ടിക പുറത്തുവരുന്നത്. കഴിഞ്ഞ ദിവസം സംസ്ഥാന നേതാക്കള്‍ കൂടിയാലോചനകള്‍ക്ക് ശേഷം തയ്യാറാക്കി നല്‍കിയ സ്ഥാനാര്‍ത്ഥി പട്ടിക കേന്ദ്ര തെരഞ്ഞെടുപ്പ് സമിതി ഇന്ന് പരിശോധിക്കും.

പത്തനംതിട്ടയില്‍ സംസ്ഥാന അധ്യക്ഷന്‍ പിഎസ് ശ്രീധരന്‍ പിള്ളയ്ക്കാണ് മുന്‍തൂക്കം. തൃശ്ശൂരില്‍ ബിജെപി കേന്ദ്രനേതൃത്വത്തിന്റെ സമ്മര്‍ദ്ധത്തിന്റെ ഭാഗമായി ബിഡിജെഎസ് അധ്യക്ഷന്‍ തുഷാര്‍ വെള്ളാപ്പള്ളി മത്സരിക്കുമെന്ന് ഏറെക്കുറെ ഉറപ്പായി. സംസ്ഥാന ജനറല്‍ സെക്രട്ടറി കെ സുരേന്ദ്രന്റെ സ്ഥാനാര്‍ത്ഥിത്വം അനിശ്ചിതത്വത്തിലാണ്.

പത്തനംതിട്ടയിലും തൃശ്ശൂരിലും ഒരേപോലെ പരിഗണിക്കപ്പെട്ടെങ്കിലും തെരഞ്ഞെടുപ്പ് സമിതിയുടെ പരിഗണനയിലുള്ള പട്ടികയില്‍ സുരേന്ദ്രന്റെ പേരില്ല. സുരേന്ദ്രനെ സ്ഥാനാര്‍ത്ഥിയാക്കിയില്ലെങ്കില്‍ പാര്‍ട്ടിയില്‍ പൊട്ടിത്തെറി ഉണ്ടാകുമെന്നുറപ്പാണ്. അതിനാല്‍ കേന്ദ്രനേതൃത്വം ഇടപെട്ട് അവസാന നിമിഷം പട്ടികയില്‍ മാറ്റം വരുത്താനുള്ള സാധ്യത തള്ളാനാകില്ല.

അങ്ങനെയെങ്കില്‍ കെ സുരേന്ദ്രനെ പത്തനംതിട്ടയില്‍ പരിഗണിക്കുന്ന സാഹചര്യം വീണ്ടുമുണ്ടാകും. പാലക്കാട് സീറ്റ് കിട്ടിയില്ലെങ്കില്‍ മത്സരിക്കില്ലെന്ന് ശോഭാ സുരേന്ദ്രന്‍ വ്യക്തമാക്കിയിട്ടുണ്ട്. എംടി രമേശും മത്സരിച്ചേക്കില്ല.

ഇപ്പോഴുള്ള സാഹചര്യത്തില്‍ മൂന്ന് ജനറല്‍ സെക്രട്ടറിമാരും മറ്റ് ചില മുന്‍നിര നേതാക്കളും പട്ടികയില്‍ ഇടം പിടിക്കില്ലെന്നാണ് സൂചന. കഴിഞ്ഞ ദിവസം ബിജെപിയില്‍ ചേര്‍ന്ന മുന്‍ പിഎസ്‌സി ചെയര്‍മാന്‍ കെ എസ് രാധാകൃഷ്ണന്‍ ആലപ്പുഴയില്‍ മത്സരിച്ചേക്കും.

പ്രവര്‍ത്തകര്‍ക്ക് പോലും പ്രതീക്ഷ നല്‍കാത്ത പട്ടിക അധികാരമോഹം കൊണ്ട് സംസ്ഥാന നേതൃത്വത്തിലെ ഒരു വിഭാഗം തട്ടിക്കൂട്ടുകയായിരുന്നെന്ന് വിമര്‍ശനം പ്രവര്‍ത്തകര്‍ക്കിടയില്‍ ഇപ്പോഴെ ശക്തമായിത്തുടങ്ങിയിട്ടുണ്ട്

whatsapp

കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക

Click Here