തിരുവനന്തപുരം: തീരപ്രദേശത്ത് തിരമാലകള് ശക്തമായതിനാല് കോവളത്തേക്ക് ഇന്ന് വിനോദസഞ്ചാരികളെ കടത്തിവിടില്ലെന്ന് അധികൃതര് അറിയിച്ചു.
ഇന്ന് രാത്രി 11.30വരെ തീരത്ത് 1.5 മീറ്റര് മുതല് 2.2 മീറ്റര് ഉയരത്തില് തിരമാലകള് ഉണ്ടാകുവാന് സാധ്യതയുണ്ടെന്നാണ് കേന്ദ്ര കാലാവസ്ഥാനിരീക്ഷണ കേന്ദ്രത്തിന്റെ മുന്നറിയിപ്പ്.
ഇന്ത്യന് മഹാസമുദ്രത്തിന്റെ ഭൂമധ്യരേഖാ പ്രദേശത്തും തെക്കു പടിഞ്ഞാറന് ബംഗാള് ഉള്ക്കടലിലും ശ്രീലങ്കയുടെ തെക്കുകിഴക്കുമായി ന്യൂനമര്ദ്ദം രൂപംകൊണ്ടു വരുന്നതായി കാലാവസ്ഥാ നിരീക്ഷണ കേന്ദ്രം അറിയിച്ചു.
ഇന്ന് കാറ്റിന്റെ വേഗത മണിക്കൂറില് 30 മുതല് 40 കിലോമീറ്റര് വരെയാവാനും വെള്ളിയാഴ്ച്ച കാറ്റിന്റെ വേഗത മണിക്കൂറില് 40 മുതല് 50 കിലോമീറ്റര് വരെയാവാനും സാധ്യതയുണ്ട്.
മത്സ്യത്തൊഴിലാളികള് ശനിയാഴ്ച്ച മുതല് ഇന്ത്യന് മഹാസമുദ്രത്തിന്റെ ഭൂമധ്യരേഖാ പ്രദേശത്തും തെക്ക് പടിഞ്ഞാറന് ബംഗാള് ഉള്ക്കടലിലും, തമിഴ്നാട് തീരത്തും മത്സ്യബന്ധനത്തിന് പോകരുതെന്നും മുന്നറിയിപ്പ് സന്ദേശത്തില് പറയുന്നു.
കടല് പ്രക്ഷുബ്ധമോ അതിപ്രക്ഷുബ്ധമോ ആകാന് സാധ്യതയുള്ളതിനാല് ആഴക്കടലില് മത്സ്യബന്ധനത്തില് ഏര്പ്പെട്ടിരിക്കുന്നവര് ശനിയാഴ്ച്ച അതിരാവിലെ 12 മണിയോടെ തന്നെ ഏറ്റവും അടുത്തുള്ള തീരത്തെത്തി ചേരണമെന്ന് സംസ്ഥാന ദുരന്ത നിവാരണ അതോറിറ്റി അഭ്യര്ത്ഥിച്ചു.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here