ലീഗിനെതിരേ മത്സരിച്ചു തോറ്റ വനിതാ സ്ഥാനാര്‍ഥിയെ പ്രതീകാത്മകമായി അവഹേളിക്കുന്ന ദൃശ്യങ്ങള്‍ വൈറല്‍; കേസെടുക്കണമെന്നും ശക്തമായ നടപടിവേണമെന്നും സോഷ്യല്‍മീഡിയ

കണ്ണൂര്‍: മുസ്ലിം ലീഗ് സ്ഥാനാര്‍ഥിക്കെതിരേ മത്സരിച്ചു പരാജയപ്പെട്ട വനിതയെ പ്രതീകാത്മക ബലാത്സംഗത്തിന് ഇരയാക്കി ഒരു സംഘം ലീഗ് പ്രവര്‍ത്തകരുടെ ആഭാസം സോഷ്യല്‍മീഡിയയില്‍ പ്രചരിക്കുന്നു. പര്‍ദയണിഞ്ഞ വനിതാ സ്ഥാനാര്‍ഥിയുടെ ഡമ്മിയുണ്ടാക്കി അതിനെ അപമാനിക്കുന്ന ദൃശ്യങ്ങളാണ് ഫേസ്ബുക്കില്‍ പ്രചരിക്കുന്നത്. കണ്ണൂര്‍ മാട്ടൂല്‍ മടക്കര ഈസ്റ്റില്‍ നിന്നാണെന്ന പേരിലാണ് ചിത്രങ്ങള്‍ പുറത്തുവന്നത്.



വീഡിയോ ശക്തമായ വിമര്‍ശനത്തിനാണ് പാത്രമാകുന്നത്. മുസ്ലിം ലീഗ് പ്രതികരിച്ചിട്ടില്ല. വിജയാഹ്ലാദ പ്രകടനത്തിനിടയിലെ ദൃശ്യങ്ങളല്ല ഇതെന്നും പെണ്‍വേഷം കെട്ടിയയാളെ കെട്ടിടത്തിനു പിന്നില്‍ കൊണ്ടുപോയി വീഡിയോ ഷൂട്ട് ചെയ്തതാണെന്ന വാദവുമായി ഒരു വിഭാഗവും സോഷ്യല്‍മീഡിയയില്‍ എത്തിയിട്ടുണ്ട്.

സ്ത്രീത്വത്തെ അപമാനിക്കുന്നതാണ് ദൃശ്യങ്ങള്‍ എന്നു വ്യക്തമാണ്. പുരുഷന്‍ സ്ത്രീവേഷം കെട്ടിയതാണെങ്കിലും പ്രതീകാത്മകമാക്കിയിരിക്കുന്നത് സ്ത്രീയെയാണ്. പരസ്യമായി സ്ത്രീയെ ബലാത്സംഗം ചെയ്യുന്നതിന്റെ പ്രതീകവല്‍കരണത്തിനെതിരേ സ്ത്രീകള്‍ക്കെതിരായ അതിക്രമങ്ങള്‍ക്കുള്ള കേസെടുക്കണമെന്ന ആവശ്യവും ശക്തമാണ്.