ഷാജി കൈലാസിനെ ദേശീയമാധ്യമം ‘കൊന്നു’; അന്തരിച്ച ആനന്ദക്കുട്ടന്റെ ഫോട്ടോയ്ക്ക് പകരം ഷാജിയുടേത്; പ്രതിഷേധമറിയിച്ച് ബാലചന്ദ്രമേനോന്‍

പ്രശസ്ത ഛായാഗ്രാഹകന്‍ ആനന്ദക്കുട്ടന്റെ മരണവാര്‍ത്തയില്‍ ഫോട്ടോ മാറിപ്പോയ സംഭവത്തില്‍ പ്രതിഷേധം അറിയിച്ച് നടനും സംവിധായകനുമായ ബാലചന്ദ്രമേനോന്‍. ഒരു ദേശീയ മാധ്യമത്തിലാണ് ആനന്ദക്കുട്ടന്റെ മരണവാര്‍ത്തയില്‍ സംവിധായകന്‍ ഷാജി കൈലാസിന്റെ ചിത്രം അച്ചടിച്ചത്. ഫോട്ടോ മാറിപ്പോയത് നിസാരമായി കാണാന്‍ സാധിക്കില്ലെന്നും ഗുരുതര തെറ്റാണ് സംഭവിച്ചതെന്നും അദ്ദേഹം പറയുന്നു.

അത്യന്തം വേദനയോടെയാണ് ഈ കുറിപ്പ് …..

അടുത്തിടെ അന്തരിച്ച എന്റെ സുഹൃത്തും സഹപ്രവർത്തകനുമായ ആനന്ദക്കുട്ടൻ എന്ന ക്യാമറാമാന്റെ മരണവാർത്ത ഒരു പത്രത്തിൽ വന്നതാണ് നിങ്ങളുടെ ശ്രദ്ധയിൽ പെടുത്തുന്നത് . വാർത്ത മരിച്ചു പോയ ആനന്ദക്കുട്ടനെപ്പറ്റിയാണെങ്കിലും കൊടുത്തിരിക്കുന്ന ഫോട്ടോ ഇപ്പോഴും ആരോഗ്യത്തോടെ ജീവിച്ചിരിക്കുന്ന എന്റെ മറ്റൊരു സുഹൃത്തായ സംവിധായകൻ ഷാജി കൈലാസിന്റെതാണ് …

ഇത് നിസ്സാരമായി കാണാനാവില്ല . ഈ വാർത്ത രണ്ടു കലാകാരന്മാരെ ഒരേ സമയം അധിക്ഷേപി ച്ചിരിക്കുകയാണ്. അക്ഷന്തവ്യമായ ഒരു തെറ്റാണെന്ന് പറയാതെ വയ്യ. ചോദിക്കാനും പറയാനും ആരും ഈ നാട്ടിലില്ല എന്ന മട്ടിൽ കാര്യങ്ങൾ നടക്കുന്നത് കാണുമ്പോൾ അങ്ങേയറ്റത്തെ വിഷമമുണ്ട്. ജഗതി ശ്രീകുമാറും മാമുക്കൊയയും മരിച്ചു എന്ന് കേട്ടപ്പോഴും ഇതേ വിഷമം ഉണ്ടായിട്ടുണ്ട്‌ . എന്നാൽ മരിച്ച വ്യക്തിയെയും മ്രുതദേഹത്തെയും ഒരേപോലെ ആദരിക്കണമെന്ന് ഭരണഘടന കൂടി അനുശാസിക്കുന്ന നമ്മുടെ നാട്ടിൽ , അതും വിരൽത്തുമ്പിൽ വിവരങ്ങൾ അറിയാനുള്ള സൌകര്യങ്ങൾ ഉള്ളപ്പോൾ ഇങ്ങനെ ഒരു വാർത്ത അടിച്ചു വന്നതിൽ ഇത് വായിക്കുന്ന എല്ലാവര്ക്കും വേണ്ടി ഞാൻ ശക്തമായ പ്രതിഷേധം രേഖപ്പെടുത്തുന്നു. മരിക്കുന്നവർ സ്വന്തം ഫോട്ടോ ആരേലും എല്പ്പിക്കാതെ മരിക്കുന്നത് അത്ര സുരക്ഷിതമല്ല എന്ന് തോന്നിപ്പോകുന്നു.