തിരുവനന്തപുരം: എഐഎസ്എഫ് മലപ്പുറം ജില്ലാ കമ്മിറ്റി അംഗവും യുവ എഴുത്തുകാരിയുമായ സാഹിറയുടെ ഫേസ്ബുക്ക് അക്കൗണ്ട് മാസ് റിപ്പോര്ട്ടിംഗിലൂടെ പൂട്ടിച്ചു. തന്റെ ഇടതുപക്ഷ കാഴ്ചപ്പാടിനെക്കുറിച്ച് തുറന്ന് സംസാരിച്ചതില് പ്രകോപിതരായ ചിലരാണ് അക്കൗണ്ട് മാസ് റിപ്പോര്ട്ടിംഗിലൂടെ പൂട്ടിച്ചതെന്ന് സാഹിറ പറഞ്ഞു.
വനിതാ ദിനത്തില് അഴിമുഖം എന്ന ഓണ്ലൈന് വെബ്സൈറ്റില് പ്രസിദ്ധീകരിച്ച ലേഖനത്തിലാണ് സാഹിറ മലപ്പുറത്തെ രാഷ്ട്രീയ സാഹചര്യങ്ങളെക്കുറിച്ചും, ഇസ്ലാമിക- സംഘപരിവാര് ഭീകരവാദത്തേയും പറ്റി സംസാരിച്ചത്.
ഫേസ്ബുക്ക് അക്കൗണ്ട് പൂട്ടിച്ചാല് മിണ്ടാതിരിക്കുമെന്നാണ് അവരുടെ വിചാരം. പറയാനുള്ളത് ഇനിയും പറയുക തന്നെ ചെയ്യും. ഞാന് ഇടതുപക്ഷത്തോടൊപ്പം നില്ക്കുന്നതാണ് പ്രശ്നം. മലപ്പുറത്തുകാരി മുസ്ലീം പെണ്കുട്ടികള് എല്ലാവരും മുസ്ലീം ലീഗിനൊപ്പം നില്ക്കണമോ? ഹിന്ദു മതഭ്രാന്തന്മാര്ക്ക് ഒരു മുസ്ലീം പെണ്കുട്ടി അവരെ എതിര്ക്കുന്നതാണ് പ്രശ്നമെന്നും സാഹിറ പറയുന്നു.
തന്നെ നാട്ടില് ഒറ്റപ്പെടുത്താനും, ഭീഷണിപ്പെടുത്താനും ചിലര് ശ്രമിക്കുന്നുണ്ടെന്നും താന് ശരി ചെയ്യുന്നത് കൊണ്ടാണ് അവര് ഇങ്ങനെയൊക്കെ പെരുമാറുന്നതെന്നും സാഹിറ പറയുന്നു. മതങ്ങളേയും ദൈവങ്ങളേയും പറ്റി നിശിതമായി വിമര്ശനങ്ങള് സാഹിറയുടെ കവിതകളിലുണ്ട്. സാഹിറയുടെ കവിതകള്, അവള് കവിത എന്നീ പുസ്തകങ്ങളാണ് സാഹിറയുടേതായി പ്രസിദ്ധീകരിച്ചത്.
‘വിദ്യാര്ഥി സംഘടനയിലേക്കുള്ള കടന്നുവരവ് എന്റെ രാഷ്ട്രീയ പൊതുബോധത്തില് വരുത്തിയ മാറ്റം ചെറുതൊന്നുമല്ല. മലപ്പുറം പോലൊരു രാഷ്ട്രീയ ഭൂമികയില് നിന്ന് ഒരു പെണ്കുട്ടി പുരോഗമന മൂല്യങ്ങള് ഉയര്ത്തി പിടിക്കുന്ന സംഘടനയിലേക്ക് ഇറങ്ങിച്ചെല്ലുക എന്ന് പറയുന്നത് വലിയ കാര്യം തനെയാണ്. അതിന്റെ പേരില് പലയിടത്തു നിന്നും പ്രശ്നങ്ങള് നേരിടേണ്ടി വന്നിട്ടുണ്ട്. കുത്തുവാക്കുകള്, ഭീഷണികള് അങ്ങനെയങ്ങനെ. പക്ഷെ കറുത്ത മുഖപടം കൊണ്ട് മുഖവും മനസും മറച്ചിരിക്കാന് മനസില്ല എനിക്ക്. ജീവനുള്ളിടത്തോളംകാലം മതമേലാളന്മാരുടെ മുന്നില് തോറ്റുകൊടുക്കാനും മനസില്ല. കാരണം എന്റെ ഊര്ജം മഴ നഞ്ഞും വെയിലുകൊണ്ടും നേടിയതാണ്. കോഴി ബിരിയാണി തിന്നുണ്ടാക്കിയതല്ല! സംഘപരിവാരത്തിന് എതിര് ശബ്ദങ്ങളെ ഭയമാണ്. അതുകൊണ്ടാണ് അവര് കള്ളക്കേസുകളില് കുടുക്കുകയും, ആത്മഹത്യ ചെയ്യിക്കുകയും ഒക്കെ ചെയ്യുന്നത്. നമ്മള് ഒറ്റക്കെട്ടായി തിരികെ പ്രതിരോധിച്ചാല് ഒടുങ്ങുന്നതെയുള്ളൂ ഈ പ്രശ്ങ്ങള്. എന്നാല് പ്രതികരിക്കില്ല, മിണ്ടാതിരിക്കും. അവസാനം തന്റെ വീട്ടിലും വന്നു വാളോങ്ങുമ്പോള് പ്രതികരിച്ചിട്ട് കാര്യമില്ല. ഇവിടെ വേറെ ഒന്നുകൂടി ശ്രദ്ധിക്കേണ്ടതുണ്ട്. ഹൈന്ദവ ഫാസിസത്തിനു സമാന്തരമായി ഇസ്ലാമിക ഭീകരവാദവും വളര്ന്നു വരുന്നുണ്ട്. മുന്പത്തേക്കാള് കരുത്തരാണവര്. അവരെ എന്തേ എല്ലാരും കണ്ടില്ലാന്നു നടിക്കുന്നു? അവരെയും നമ്മള് പ്രതിരോധിക്കേണ്ടതുണ്ട്.’– ലേഖനത്തില് സാഹിറ പറയുന്നു.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here