ദില്ലി: അയോഗ്യരായ സ്ഥാനാര്‍ത്ഥികളെ വിജയിപ്പിക്കാനായി ബിഷപ്പുമാര്‍ പ്രചരണം നടത്തരുതെന്ന് മാര്‍ ക്രിസോസ്റ്റം വലിയ മെത്രോപ്പോലിത്ത. ഇഎംഎസ് നമ്പൂതിരിപ്പാടും സി.അച്യുത മേനോനുമാണ് കേരളം ഇന്നുവരെ കണ്ടിട്ടുള്ളതില്‍ വച്ച് ഏറ്റവും മികച്ച മുഖ്യമന്ത്രിമാരെന്നും ക്രിസോസ്റ്റം തിരുമേനി പറഞ്ഞു. ദില്ലിയില്‍ മാധ്യമപ്രവര്‍ത്തകരുമായുള്ള മുഖാമുഖം പരിപാടിയിലാണ് രാഷ്ട്രീയ വിഷയങ്ങളില്‍ അദ്ദേഹം നിലപാട് വ്യക്തമാക്കിയത്.
നര്‍മ്മവും ചിന്തയും ആത്മീയതയും രാഷ്ട്രീയവുമെല്ലാം ഉള്‍ക്കൊള്ളിച്ചും അനുഭവങ്ങള്‍ പങ്കുവച്ചും സംസാരിച്ച ക്രിസോസ്റ്റം തിരുമേനി മാധ്യമപ്രവര്‍ത്തകര്‍ക്ക് ചോദ്യങ്ങല്‍ ചോദിക്കാനുള്ള അവസരം കൊടുത്തത്. ചോദ്യങ്ങളേറെയും കേരളത്തിലെ നിയമസഭ തെരഞ്ഞെടുപ്പിനെ കുറിച്ച്. ആര് അധികാരത്തില്‍ വരണമെന്ന ചോദ്യത്തിന് ആലോചനയില്ലാതെ ക്രിസോസ്റ്റം തിരുമേനിയുടെ മറുപടി.
കേരളത്തില്‍ ഇന്നു വരെ വന്ന എല്ലാ മുഖ്യമന്ത്രിമാരും മികച്ചവരായിരുന്നുയെന്ന അഭിപ്രായമില്ല. എന്നാല്‍ ഇഎംഎസ് നമ്പൂതിരിപ്പാടും സി.അച്യതമേനോനും കേരളം ഇന്ന് വരെ കണ്ടിട്ടുള്ളതില്‍ വച്ച് ഏറ്റവും മികച്ച മുഖ്യമന്ത്രിമാരായിരുന്നുവെന്നും അദ്ദേഹം പറഞ്ഞു.
നൂറിന്റെ നിറവിലേക്ക് കടക്കുന്ന ക്രിസോസ്റ്റം തിരുമേനിയെക്കുറിച്ച് സിനിമാ സംവിധായകന്‍ ബ്ലസി തയ്യാറാക്കുന്ന 100 ഇയേര്‍സ് ഓഫ് ക്രിസോസ്റ്റം എന്ന ഡോക്യുമെന്ററിക്കു വേണ്ടിയുള്ള ചിത്രീകരണത്തിനാണ് കൂടിയാണ് ദില്ലിയിലെത്തിയത്. പ്രധാനമന്ത്രി നരേന്ദ്ര മോദി, കോണ്‍ഗ്രസ് അധ്യക്ഷ സോണിയാ ഗാന്ധി, സിപിഐഎം ജനറല്‍ സെക്രട്ടറി സീതാറാം യെച്ചൂരി തുടങ്ങിയവരുമായും ചിത്രീകരണത്തിന്റെ ഭാഗമായി കൂടിക്കാഴ്ച നടത്തി.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
