കൊല്‍ക്കത്ത: ട്വന്റി20 ലോകകപ്പ് കിരീടം വെസ്റ്റ് ഇന്‍ഡീസിന്. കൊല്‍ക്കത്ത ഈഡന്‍ ഗാര്‍ഡന്‍സില്‍ നടന്ന ത്രില്ലര്‍ ഫൈനലില്‍ നാല് വിക്കറ്റിനാണ് വിന്‍ഡീസ് ഇംഗ്ലണ്ടിനെ പരാജയപ്പെടുത്തിയത്. ആദ്യം ബാറ്റ് ചെയ്ത് ഇംഗ്ലണ്ട് മുന്നോട്ടുവെച്ച 156 റണ്‍സ് വിജയലക്ഷ്യം പിന്തുടര്‍ന്ന വിന്‍ഡീസ് 19.4 ഓവറില്‍ ലക്ഷ്യം കണ്ടു. മര്‍ലോണ്‍ സാമുവല്‍സിന്റെ പോരാട്ടവും അവസാന ഓവറില്‍ ബ്രാത് വെയിറ്റ് അടിച്ച തുടര്‍ച്ചയായ നാലു സിക്‌സറുമാണ് വിന്‍ഡീസിനെ കിരീടത്തിലെത്തിച്ചത്.
സ്‌കോര്‍ ഇംഗ്ലണ്ട്: 20 ഓവറില്‍ ഒമ്പത് വിക്കറ്റിന് 155. വെസ്റ്റിന്‍ഡീസ് 19.4 ഓവറില്‍ ആറ് വിക്കറ്റിന് 161.
ഇംഗ്ലണ്ട് പടുത്തുയര്‍ത്തിയ 155 റണ്‍സിന്റെ വിജയലക്ഷ്യം എത്തിപ്പിടിക്കാന്‍ അവസാന ഓവറില്‍ 19 റണ്‍സ് വേണ്ടിയിരുന്ന വിന്‍ഡീസിന് വേണ്ടി തുടര്‍ച്ചയായി നാല് കൂറ്റന്‍ സിക്‌സറുകള്‍ പറത്തി ബ്രെത്ത്വെയ്റ്റ് വിജയവും കൂടെ കിരീടവും എത്തിപ്പിടിക്കുകയായിരുന്നു. ബ്രെത്ത്വെയ്റ്റ് 10 പന്തില്‍ നിന്ന് 34 റണ്‍സ് നേടി. 66 പന്തില്‍ 85 റണ്‍സെടുത്ത മാര്‍ലോണ്‍ സാമുവല്‍സാണ് വിന്‍ഡീസ് വിജയത്തിന് അടിത്തറ പാകിയത്. 25 റണ്‍സെടുത്ത ഡ്വെയ്ന്‍ ബ്രാവോ മാത്രമാണ് വിന്‍ഡീസ് നിരയില്‍ തിളങ്ങിയ മറ്റൊരു ബാറ്റ്‌സ്മാന്‍.
ആദ്യം ബാറ്റുചെയ്ത ഇംഗ്ലണ്ട് നിശ്ചിത 20 ഓവറില്‍ ഒന്‍പത് വിക്കറ്റ് നഷ്ടത്തില്‍ 155 റണ്‍സ് എടുത്തു. ടൂര്‍ണമെന്റില്‍ ഇംഗ്ലണ്ടിന്റെ കുതിപ്പിന് ഊര്‍ജം പകര്‍ന്ന ഓപ്പണര്‍മാര്‍ ഇരുവരെയും ഒന്‍പത് റണ്‍സിനിടെ പുറത്താക്കി വിന്‍ഡീസ് തുടക്കം മികച്ചതാക്കിയെങ്കിലും നാലാം വിക്കറ്റില്‍ അര്‍ധസെഞ്ചുറി കൂട്ടുകെട്ട് (61) തീര്‍ത്ത ജോ റൂട്ട്‌ജോസ് ബട്‌ലര്‍ സഖ്യമാണ് ഇംഗ്ലണ്ടിന് ഭേദപ്പെട്ട സ്‌കോര്‍ സമ്മാനിച്ചത്. ജോ റൂട്ട് അര്‍ധസെഞ്ചുറി (36 പന്തില്‍ 56) നേടി. ജോസ് ബട്‌ലര്‍ 22 പന്തില്‍ ഒരു ബൗണ്ടറിയും മൂന്നു സിക്‌സുമുള്‍പ്പെടെ 36 റണ്‍സെടുത്ത് പുറത്തായി. വെസ്റ്റ് ഇന്‍ഡീസിനായി ബ്രാത്ത്‌വയ്റ്റ്, ബ്രാവോ എന്നിവര്‍ മൂന്നും ബദ്രി രണ്ടും വിക്കറ്റ് വീഴ്ത്തി.
വനിതാ ട്വന്റി20 കിരീടവും വിന്‍ഡീസ് നേടിയിരുന്നു. ഇതോടെ പുരുഷ-വനിതാ കിരീടം നേടുന്ന ആദ്യ രാജ്യമായി വിന്‍ഡീസ്.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
