പത്തനംതിട്ട: പത്തനംതിട്ട അടൂരില്‍ പ്രായപൂര്‍ത്തിയാകാത്ത പെണ്‍കുട്ടിയെ വിവാഹവാഗ്ദാനം നല്‍കി പീഡിപ്പിച്ച കേസില്‍ രണ്ട് പേര്‍ അറസ്റ്റില്‍. ഒറ്റപ്പാലം നാലാം മൈല്‍ സ്വദേശി സുനീര്‍ ബാബു, സുഹൃത്ത് ഇടുക്കി കഞ്ഞിക്കുഴി സ്വദേശി ജോബി കാഞ്ഞിരത്തുങ്കല്‍ എന്നിവരാണ് അറസ്റ്റിലായത്.
വിവാഹിതനായ സുനീര്‍ ബാബു ഫേസ്ബുക്കിലൂടെ പരിചയപ്പെട്ട പെണ്‍കുട്ടിയെ സേലം, ട്രിച്ചി, വേളാങ്കണ്ണി എന്നിവിടങ്ങളില്‍ കൊണ്ടുപോയി പീഡിപ്പിക്കുകയായിരുന്നു. കഴിഞ്ഞ 31നാണ് സുനീര്‍ സുഹൃത്തായ ജോബി സംഘടിപ്പിച്ചു കൊടുത്ത ബൈക്കില്‍ പെണ്‍കുട്ടിയുമായി അടൂരില്‍നിന്ന് എറണാകുളത്തേക്ക് പോയത്. ബസില്‍ എറണാകുളത്തെത്തിയ ജോബിയില്‍ നിന്ന് 10,000 രൂപ വാങ്ങിയ സുനീര്‍ പെണ്‍കുട്ടിയുമായി തമിഴ്‌നാട്ടിലേക്ക് കടക്കുകയായിരുന്നുവെന്ന് പൊലീസ് പറഞ്ഞു.
സൈബര്‍ വിഭാഗത്തിന്റെ സഹായത്തോടെ നടത്തിയ അന്വേഷണത്തില്‍ പ്രതിയും പെണ്‍കുട്ടിയും വേളാങ്കണ്ണിയിലുണ്ടന്ന സൂചന ലഭിച്ചു. തുടര്‍ന്ന് ചൊവ്വാഴ്ച രാത്രി നാഗപട്ടണം പൊലീസ് കസ്റ്റഡിയിലെടുത്ത സുനീറിനെയും പെണ്‍കുട്ടിയേയും അടൂര്‍ പൊലീസിനു കൈമാറുകയായിരുന്നു. ജോബിയെ ബുധനാഴ്ച സ്‌റ്റേഷനില്‍ വിളിച്ചുവരുത്തി അറസ്റ്റുചെയ്തു.
സുനീര്‍ബാബുവിന് ഭാര്യയും മൂന്ന് കുട്ടികളുമുണ്ട്.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here
