മുംബൈ: കരീനയോടു സംസാരിക്കാൻ ആഗ്രഹിച്ചു നടന്ന ആരാധന മൂത്ത ആരാധകൻ ഒടുവിൽ ജയിലിലായി. ഇയാൾ ചെയ്തത് എന്താണെന്നോ. താരത്തോടു സംസാരിക്കാൻ അവസരം കിട്ടാൻ വേണ്ടി കരീനയുടെ ഇൻകം ടാക്‌സ് അക്കൗണ്ട് ഹാക്ക് ചെയ്യുകയാണ് ഇയാൾ ചെയ്തത്. മുംബൈ സ്വദേശിയായ പാരാമിലിട്ടറി ഉദ്യോഗസ്ഥൻ മനീഷ് തിവാരി എന്ന 26 കാരനാണ് പൊലീസ് പിടിയിലായത്. ഇയാൾ ഇപ്പോൾ കസ്റ്റഡിയിലാണ്.
ഇൻകം ടാക്‌സ് അക്കൗണ്ട് ഹാക്ക് ചെയ്ത ശേഷം താരത്തിന്റേതായി ഡിക്ലയറേഷൻ ഫോം അപ്‌ലോഡ് ചെയ്യുകയും ചെയ്തു. എന്നാൽ, കരീന മുമ്പു തന്നെ ഡിക്ലയറേഷൻ സമർപിച്ചിരുന്നു. അതുകൊണ്ടു തന്നെ ഇതിൽ സംശയം തോന്നിയ കരീനയുടെ ചാർട്ടേഡ് അക്കൗണ്ടന്റ് പരാതി നൽകുകയായിരുന്നു. തുടർന്ന് സൈബർ ക്രൈം വിഭാഗം നടത്തിയ അന്വേഷണത്തിലാണ് അക്കൗണ്ട് ഹാക്ക് ചെയ്തതാണെന്നു മനസ്സിലായത്. തുടർന്ന് കഴിഞ്ഞ ദിവസം പ്രത്യേക സംഘം മനീഷിനെ അറസ്റ്റ് ചെയ്യുകയായിരുന്നു.
കരീനയുടെ ഫോൺ നമ്പർ ലഭിക്കാൻ ഗൂഗിളിൽ പരതുന്നതിനിടെയാണ് മനീഷ് പാൻ കാർഡിനേക്കുറിച്ചുള്ള വിവരങ്ങളും ശ്രദ്ധിച്ചത്. ഇതു വഴി ഇയാൾ അക്കൗണ്ട് ഹാക്ക് ചെയ്യുകയായിരുന്നു. ജോയിന്റ് കമ്മീഷണർ സഞ്ജയ് സക്‌സേനയുടെ നേതൃത്വത്തിലായിരുന്നു പ്രത്യേക സംഘം. ഛത്തീസ്ഗഢിൽ മനീഷ് ഉണ്ടെന്നു മനസ്സിലാക്കിയ പൊലീസ് അവിടെയെത്തി ഇയാളെ അറസ്റ്റ് ചെയ്യുകയായിരുന്നു.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
