തിരുവനന്തപുരം: കൊച്ചി മെട്രോ രണ്ടാം ഘട്ടത്തിന് ഇന്ന് ചേര്ന്ന മന്ത്രിസഭായോഗമാണ് ഭരണാനുമതി നല്കിയത്. ജവഹര്ലാല് മെഹ്റു സ്റ്റേഡിയം മുതല് കാക്കനാട് വഴി ഇന്ഫോപാര്ക്ക് വരെയുളള രണ്ടാം ഘട്ടത്തിനാണ് പുതുക്കിയ ഭരണാനുമതി നല്കാന് തീരുമാനിച്ചത്. 2577 കോടി രൂപയാണ് രണ്ടാം ഘട്ടത്തിന് ചെലവ് പ്രതീക്ഷിക്കുന്നത്.
നോട്ടുനിരോധന കാലയാളവില് ബാങ്കുകള്ക്കും എടിഎമ്മുകള്ക്കും മുമ്പില് ക്യൂ നിന്ന് മരിച്ചവരുടെ കുടുംബങ്ങള്ക്ക് രണ്ടു ലക്ഷം രൂപ വീതം സഹായം നല്കാനും മന്ത്രിസഭ തീരുമാനിച്ചു. റദ്ദാക്കിയ നോട്ട് മാറ്റിയെടുക്കാന് ബാങ്കിനു മുന്നിലും പുതിയ നോട്ടിനു വേണ്ടി എടിഎമ്മിനു മുന്നിലും ക്യൂ നില്ക്കുന്നതിനിടെ മരിച്ച നാലുപേരുടെ കുടുംബങ്ങള്ക്ക് സഹായം ലഭിക്കും. സി ചന്ദ്രശേഖരന് (68 വയസ്സ്, കൊല്ലം), കാര്ത്തികേയന് (75, ആലപ്പുഴ), പി.പി. പരീത് (തിരൂര് മലപ്പുറം), കെ.കെ. ഉണ്ണി (48, കെ.എസ്.ഇ.ബി, കണ്ണൂര്) എന്നിവരാണ് ക്യൂ നിന്ന് മരിച്ചത്.
സംസ്ഥാന മുന്നോക്ക സമുദായ ക്ഷേമ കോര്പ്പറേഷന് ചെയര്മാനായി മുന് മന്ത്രി ആര്. ബാലകൃഷ്ണ പിളളയെ നിയമിക്കാനും തീരുമാനിച്ചു. ക്യാബിനറ്റ് പദവിയോടെയാകും നിയമനം.
മറ്റ് പ്രധാന തീരുമാനങ്ങള്:
സംസ്ഥാനത്തെ ആശുപത്രികള്, ലാബുകള്, സ്കാനിംഗ് സെന്ററുകള് തുടങ്ങിയവയെ നിയന്ത്രിക്കുന്നതിന് തയ്യാറാക്കിയ കേരള ക്ലിനിക്കല് സ്ഥാപനങ്ങള് (റജിസ്ട്രേഷനും നിയന്ത്രണവും) ബില്ലിന്റെ കരടും മന്ത്രിസഭ അംഗീകരിച്ചു.
ട്രാവന്കൂര് കൊച്ചിന് മെഡിക്കല് കൗണ്സില് ജീവനക്കാര്ക്ക് ശമ്പളപരിഷ്കരണം നടപ്പിലാക്കും.
കേസുകളുടെ ബാഹുല്യം കണക്കിലെടുത്ത് കൊച്ചി റീജ്യണല് ഫോറന്സിക് സയന്സ് ലാബോറട്ടറിയില് 11 തസ്തികകള് സൃഷ്ടിക്കും.
കേരള ഹൈക്കോടതിയില് കോര്ട്ട് മാനേജര്മാരുടെ രണ്ടു തസ്തികകള് സൃഷ്ടിക്കും.
കേരള ഹൈക്കോടതിയില് വിജിലന്സ് കേസുകള് നടത്തുന്നതിനു മാത്രമായി ഒരു സ്പെഷ്യല് ഗവ. പ്ലീഡര് തസ്തിക സൃഷ്ടിക്കും.
ഇപ്പോള് അവധിയിലുളള ഇ. രതീശനെ പഞ്ചായത്ത് ഡയറക്ടറായി നിയമിക്കും.
അവധിയിലുളള വയനാട് കളക്ടര് തിരുമേനിയെ ഗ്രാമവികസന കമ്മീഷണറായി നിയമിക്കും. വയനാട് കളക്ടറുടെ ചുമതല തല്ക്കാലം എ.ഡി.എമ്മിനായിരിക്കും.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here