തിരുവനന്തപുരം: കൊച്ചിയില് ആക്രമിക്കപ്പെട്ട നടിയെ നുണ പരിശോധനയ്ക്ക് വിധേയമാക്കണമെന്ന പരാമര്ശത്തില് ഖേദം പ്രകടിപ്പിച്ച് നടന് സലിംകുമാര്. പരാമര്ശം സ്ത്രീ വിരുദ്ധവുമാണെന്ന് മനസിലാക്കിയത് കൊണ്ടാണ് നടിയോടും കുടുംബാംഗങ്ങളോടും മാപ്പ് ചോദിക്കുന്നതെന്ന് സലിംകുമാര് പറഞ്ഞു.
സലിംകുമാര് പറയുന്നു: ”ഞാന് ഇന്നലെ ഫേസ്ബുക്കില് ഇട്ടിരുന്ന ഒരു പോസ്റ്റില് ഇരയായ നടിയെ നുണ പരിശോധനയ്ക്ക് വിധേയമാക്കണമെന്നുള്ള എന്റെ പരാമര്ശം പിന്നീട് ആലോചിച്ചപ്പോള് ഒരു തികഞ്ഞ അപരാതവും സ്ത്രീ വിരുദ്ധവുമാണെന്ന് മനസ്സിലാക്കിയതുകൊണ്ടു ഈ നടിയോടും കുടുംബാംഗങ്ങളോടും അതോടൊപ്പം തന്നെ പൊതുജനങ്ങളോടും മാപ്പു ചോദിക്കുന്നു. ഈ പരാമര്ശം ആ പോസ്റ്റില് നിന്നും ഞാന് മാറ്റുന്നതായിരിക്കും.”
നടന് ദിലീപിനെ പിന്തുണച്ചാണ് സലിംകുമാര് ഇന്നലെ ഫേസ്ബുക്കില് പോസ്റ്റിട്ടത്. ദിലീപിന്റെ സ്വകാര്യ ജീവിതം തകര്ക്കാന് ഏഴു വര്ഷം മുന്പ് സിനിമാരംഗത്തെ ചിലര് രചിച്ച ഒരു തിരക്കഥയുടെ ക്ലൈമാക്സ് റീലുകളാണ് ഇപ്പോള് മാധ്യമങ്ങളില് ഓടിക്കൊണ്ടിരിക്കുന്നതെന്നും അതിന്റെ ആദ്യ ട്വിസ്റ്റ് ഡിവോഴ്സ് ആയിരുന്നെന്നും സലിംകുമാര് പറഞ്ഞു. കേസില് ദിലീപ് ആരുടെ മുന്നിലും ഒന്നും ഒളിച്ചു വച്ചിട്ടില്ലെന്നും അദ്ദേഹം പറഞ്ഞിരുന്നു.
പോസ്റ്റിലെ വിവാദപരാമര്ശം ഇങ്ങനെയായിരുന്നു: ”ദിലീപും നാദിര്ഷായും എന്റെ സ്നേഹിതന്മാരാണ്. അതില് ഞാന് അഹങ്കരിക്കുന്നു. ആ അഹങ്കാരം ഉള്ളില് വെച്ചുകൊണ്ട് തന്നെ ഞാന് പറയുന്നു. ഇവരെ രണ്ടു പേരെയും ഒരു ശാസ്ത്രീയ നുണ പരിശോധനക്കായി ഞാന് നിയമത്തിനു മുന്നില് കൊണ്ടുവരാം. ഇവരെ ക്രൂശിലേറ്റാന് ശ്രമിക്കുന്നവര് ചെയ്യേണ്ടത് ഒരു കാര്യം മാത്രം, പള്സര് സുനിയേയും ഇരയായ പ്രമുഖ നടിയെയും ഇതേ നിയമത്തിന്റെ മുന്നില് നുണപരിശോധനക്കായി കൊണ്ടുവരിക. അവിടെ തീരും..അവിടെ തീരും എല്ലാം”
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here