മലയാള സിനിമാ ലോകത്തെക്കുറിച്ച് ആര്ക്കുമറിയാത്ത കാര്യങ്ങള് വെളിപ്പെടുത്തി നടി പത്മപ്രിയ. ഒരു വനിതാ മാഗസിന് നല്കിയ അഭിമുഖത്തിലാണ് പത്മപ്രിയ ഇക്കാര്യങ്ങള് പറയുന്നത്.
‘ആ നടിയെയും നടനെയും എനിക്കറിയാം. അങ്ങനെയൊരു അനുഭവത്തിലൂടെ കടന്നുപോകുന്ന സ്ത്രീയുടെ മാനസികാവസ്ഥ ആലോചിച്ചിട്ടുണ്ടോ. ഞങ്ങളൊക്കെ ചുറ്റുമുള്ളവരെ വിശ്വസിച്ചാണ് ഒരു മാസമൊക്കെ വേറെ സ്ഥലത്തു പോയി താമസിക്കുന്നത്. കുറ്റമാരോപിക്കപ്പെട്ട നടന്റെ കാര്യമോ? അതൊരു സ്റ്റോറിയാണോ എന്ന് ആര്ക്കറിയാം? എന്തായാലും ഈ സംഭവം കൊണ്ട് ഒരു കാര്യമുണ്ടായി, പല കാര്യങ്ങളും പുറത്തുവന്നു.”-പത്മപ്രിയ പറയുന്നു.
സിനിമയിലെ കാസ്റ്റിംഗ് കൗച്ചിനെ കുറിച്ച് പത്മപ്രിയ പറയുന്നത് ഇങ്ങനെ: ”തിരക്കഥ ചോദിച്ചാല് നമ്മുടെ ഭാഗം മാത്രമേ പറഞ്ഞു തരൂ. അതും ശരിയായ കഥയാണോ? ഉറപ്പില്ല. ഇതൊക്കെത്തന്നെയല്ലേ കാസ്റ്റിംഗ് കൗച്ച്? കാസ്റ്റിംഗ് കൗച്ച് ഉണ്ട് എന്നുള്ളത് സത്യമാണ്. കിടക്ക പങ്കിടാന് തയ്യാറല്ല, മാത്രമല്ല സ്ക്രിപ്റ്റും ചോദിക്കുന്നു. പിന്നെ നിങ്ങള് ആ സിനിമയിലില്ല. അതെന്താ കാസ്റ്റിംഗ് കൗച്ച് അല്ലേ?”-പത്മപ്രിയ ചോദിക്കുന്നു.
”മോശം നടിമാര് കിടക്ക പങ്കിട്ടുണ്ടാവാം എന്നു പറയുന്നു. അപ്പോള് ആ നടിമാരുടെ കൂടെ കിടന്നവരെ കുറിച്ച് എന്തു പറയണം? പുതിയ നടിമാര്ക്ക് മാത്രമാണ് ഈ പ്രശ്നമെന്ന് കരുതരുത്. പേരും പ്രശസ്തിയും ആയിക്കഴിഞ്ഞവര്ക്കാണ് കൂടുതല് പ്രഷര്. കാരണം അവര്ക്ക് ഇനിയും സിനിമയില് നിന്നേ പറ്റൂ. ഒരു കാര്യം ചോദിക്കട്ടേ, അങ്ങനെ കിടക്ക പങ്കിടുന്നവര്ക്ക് എന്തെങ്കിലും ഉറപ്പുണ്ടോ അത് വിജയിക്കുമെന്ന്? പിന്നെ, സിനിമയില് എല്ലാ കാലത്തും ഇതു നടക്കുമെന്ന് പുരുഷന്മാര് കരുതരുത്, പുതിയ ജനറേഷന് അതിനു നിന്നുകൊടുക്കാന് പോവുന്നില്ല. ഇത്തരം അനുഭവങ്ങള് എനിക്ക് ഉണ്ടായിട്ടില്ല. പക്ഷേ ഒഴിവാക്കലുകള് ഉണ്ടായിട്ടുണ്ട്.”-പത്മപ്രിയ പറയുന്നു.
സുഹൃത്തായ ഒരാള് മോശമായി പെരുമാറിയതിനെക്കുറിച്ച് പത്മപ്രിയ പറയുന്നത് ഇങ്ങനെ: അയാള് എന്റെ ഒരു സുഹൃത്താണ്. ഒരു വൈകുന്നേരം മുറിയില് വന്നു. ഞാന് അല്പചീനോയുടെ സിനിമ കാണുന്നു. ജയിലില്നിന്നു വരുന്ന കാമുകന് അയാളുടെ പഴയ ഗേള്ഫ്രണ്ടിനെ കാണുന്ന ഒരു സീന്. അവള് ഒരു സ്ട്രിപ്റ്റീസ് ഷോ ചെയ്യുന്നു. ഞാന് സുഹൃത്തിനോട് പറഞ്ഞു, നോക്കൂ എന്തു മനോഹരമായാണ് ആ സ്ട്രിപ്റ്റീസ് കഥാപാത്രത്തെ പ്രൊജക്റ്റ് ചെയ്തിരിക്കുന്നത്. എന്റെ ആ കമന്റ്, അത് അയാള് ഒരു ക്ഷണമായി എടുത്തു. ഞാന് പറഞ്ഞു. അയ്യോ, ചേട്ടാ, എനിക്ക് താല്പര്യമില്ല. ഞാന് ഒരു നടിയാണ്. സിനിമയിലുണ്ട്. അതുകൊണ്ട് മാത്രം ഒരാള്ക്ക് ഞാന് നിന്റെ കൂടെ കിടക്ക പങ്കിട്ടോട്ടെ എന്നു ചോദിക്കാനുള്ള അവകാശമുണ്ടോ, ഇല്ല.”-പത്മപ്രിയ പറയുന്നു.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here