സുരക്ഷിതം എന്നു കരുതി മണ്പാത്രങ്ങള് ഉപയോഗിക്കുന്നവര്ക്കുള്ള മുന്നറിയിപ്പാണ് ഈ വാര്ത്ത. മണ്പാത്രങ്ങള് പഴയതുപോലെ സുരക്ഷിതമല്ലെന്ന് ശാസ്ത്രീയ പരിശോധനയില് വ്യക്തമായി. ഗുരുതരമായ ആരോഗ്യപ്രശ്നങ്ങള്ക്ക് കാരണമാകുന്ന രാസപദാര്ത്ഥങ്ങളുടെ സാന്നിധ്യം മണ്പാത്രങ്ങളില് വ്യാപകമാകുന്നതായി പരിശോധനയില് കണ്ടെത്തി.
പാത്രങ്ങള്ക്ക് നിറവും തിളക്കവും ഭംഗിയും കൂട്ടാന് റെഡ് ഓക്സൈഡും ബ്ലാക്ക് ഓക്സൈഡും ഉപയോഗിക്കുന്നതാണ് ഭീഷണിയാകുന്നത്. അലുമിനീയം സൃഷ്ടിക്കുന്ന ആരോഗ്യ പ്രശ്നങ്ങള് തിരിച്ചറിഞ്ഞതാണ് കൂടുതല് പേര് അടുത്ത കാലത്തായി മണ്പാത്രങ്ങളിലേക്ക് തിരിഞ്ഞത് . എന്നാല് നിര്മാതാക്കള് കുറുക്കുവഴി തേടിയതോടെ മണ്പാത്രങ്ങളും സുരക്ഷിതമല്ലാതാവുകയാണ്.
പുതിയ മണ്ചട്ടിയില് പാചകം ചെയ്ത കറിക്ക് രുചി വ്യത്യാസം തോന്നിയതാണ് പരിശോധന നടത്താന് പിറവം സ്വദേശിയായ ബെന്നിയെ പ്രേരിപ്പിച്ചത്. ചട്ടി കഴുകിയ വെള്ളം ചുവന്ന നിറത്തിലാകുകയും കൂടി ചെയ്തതോടെ ശാസ്ത്രീയ പരിശോധനയ്ക്ക് തീരുമാനിച്ചു . കാക്കനാട് കെമിക്കല് എക്സാമിനേഴ്സ് ലാബില് നിന്നുള്ള പരിശോധനാഫലം ഞെട്ടിക്കുന്നതായിരുന്നു.
വെള്ളത്തില് രാസപദാര്ത്ഥങ്ങളായ ക്ലോറൈഡ് അയണിന്റെയും ഫെറിക് അയണിന്റെയും സാന്നിധ്യം പരിശോധനയില് കണ്ടെത്തി. ഇവ കരള് വൃക്ക എന്നിവയുടെ പ്രവര്ത്തനങ്ങളെ തകരാറിലാകാനും രക്തസമ്മര്ദ്ദം വര്ദ്ധിപ്പിച്ചു നാഡീവ്യൂഹത്തിന്റെ പ്രവര്ത്തനങ്ങളെ മന്ദീഭവിപ്പിക്കാനും ശേഷിയുള്ളവയാണ്. ജനിതക തകരാറിനു പോലും ചിലപ്പോള് കാരണമാകും.
ചുവന്ന മണ്ണിന്റെയും കളിമണ്ണിന്റേയും ദൗര്ലഭ്യമാണ് മണ്പാത്ര നിര്മ്മാതാക്കളെ മായം ചേര്ക്കാന് പ്രേരിപ്പിക്കുന്നതെന്ന് ഈ രംഗത്തുള്ളവര് പറയുന്നു. പരമ്പരാഗത നിര്മ്മാണ യൂണിറ്റുകള് നിന്ന് പോവുകയും വാണിജ്യാടിസ്ഥാനത്തില് ഉദ്പാദനം വര്ദ്ധിക്കുകയും ചെയ്തതാണ് മായം കലര്ത്തല് വ്യാപകമാവാന് കാരണം .
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here