മുംബൈ: നടിയെ ആക്രമിച്ച കേസില്‍ നടന്‍ ദിലീപ് നിര്‍ഭാഗ്യവാനായത് കൊണ്ടാണ് പിടിക്കപ്പെട്ടതെന്നും സിനിമയില്‍ ഇത്തരം പ്രവണതകള്‍ എപ്പോഴും ഉള്ളതാണെന്നും പ്രശസ്ത സംവിധായകന്‍ ശ്രീകുമാരന്‍ തമ്പി. മുംബൈയില്‍ ഓണാഘോഷ പരിപാടിയില്‍ പങ്കെടുത്ത ശേഷം കൈരളി ടി വി യോട് സംസാരിക്കുകയായിരുന്നു അദ്ദേഹം.
ജയിലില്‍ കഴിയുന്ന ദിലീപിന് പിന്തുണയുമായി പ്രൊഡ്യൂസര്‍ അസോസിയേഷന്‍ അടക്കം പലരും മുന്നോട്ടു വന്നു തുടങ്ങിയെന്നും ശ്രീകുമാരന്‍ തമ്പി പറഞ്ഞു. എന്നാല്‍ ഇതെല്ലം ജനങ്ങളും മാധ്യമങ്ങളും മറക്കുമെന്നും ദിലീപിനെ വീണ്ടും സൂപ്പര്‍ താരമായി സമൂഹം വാഴിക്കുമെന്നും ശ്രീകുമാരന്‍ തമ്പി കൂട്ടി ചേര്‍ത്തു.
അതേസമയം മോഹന്‍ലാലിന്റെ സന്തതസഹചാരിയും നിര്‍മാതാവുമായ ആന്റണി പെരുമ്പാവൂരും ഗണേഷ്കുമാറും ഇന്ന് നടന്‍ ദിലീപിനെ കാണാന്‍ ആലുവ സബ് ജയിലിലെത്തി. ഉച്ചകഴിഞ്ഞ് 2.30ഓടെയാണ് ആന്റണി ജയിലില്‍ എത്തിയത്. ഗണേഷ്‌കുമാര്‍ എംഎല്‍എ മടങ്ങിയതിന് പിന്നാലെയാണ് ആന്റണിയുടെ സന്ദര്‍ശനം.
അച്ഛന്റെ ശ്രാദ്ധച്ചടങ്ങുകളില്‍ പങ്കെടുക്കാന്‍ ദിലീപിന് അങ്കമാലി മജിസ്‌ട്രേറ്റ് കോടതി അനുമതി നല്‍കിയതിന് പിന്നാലെ നിരവധി താരങ്ങളാണ് ആലുവ ജയിലില്‍ എത്തിയത്. ഗണേഷ് കുമാര്‍, നിര്‍മ്മാതാവ് ഹംസ, തിരക്കഥാകൃത്ത് ബെന്നി പി നായരമ്പലം, നടന്‍ സുധീര്‍ എന്നിവര്‍ ഇന്ന് ജയിലില്‍ എത്തിയിരുന്നു.
താരസംഘടനയായ അമ്മയുടെ എക്‌സിക്യൂട്ടീവ് കമ്മിറ്റി അംഗം കലാഭവന്‍ ഷാജോണ്‍, സംവിധായകന്‍മാരായ രഞ്ജിത്ത്, നാദിര്‍ഷാ, നടന്മാരായ സുരേഷ് കൃഷ്ണ, ഹരിശ്രീ അശോകന്‍, ഏലൂര്‍ ജോര്‍ജ് എന്നിവരും കഴിഞ്ഞ ദിവസങ്ങളില്‍ ജയിലില്‍ എത്തിയിരുന്നു. ഭാര്യയും നടിയുമായ കാവ്യാ മാധവനും മകളും ജൂലൈ പത്തിന് ജയിലില്‍ എത്തി.
നാളെ രാവിലെ എട്ടു മുതല്‍ 10 വരെ വീട്ടിലും ആലുവ മണപ്പുറത്തും നടക്കുന്ന ബലിതര്‍പ്പണ ചടങ്ങുകളില്‍ പങ്കെടുക്കാനാണ് ദിലീപിന് കോടതി അനുമതി നല്‍കിയത്. മാധ്യമങ്ങളോട് സംസാരിക്കില്ലെന്നും സമയത്തിന് ജയിലില്‍ മടങ്ങി എത്താമെന്ന ഉറപ്പിലുമാണ് ദിലീപിന് താത്കാലിക പരോള്‍ കോടതി അനുവദിച്ചത്.
അതേസമയം, ജാമ്യം തേടി വീണ്ടും ഹൈക്കോടതിയെ സമീപിക്കാനാണ് ദിലീപിന്റെ തീരുമാനം. ഓണാവധിക്ക് ശേഷം ഹൈക്കോടതി തുറക്കുമ്പോള്‍ ഒരു ജാമ്യഹര്‍ജി കൂടി സമര്‍പ്പിക്കാനാണ് തീരുമാനം. അന്വേഷണം പൂര്‍ത്തിയായ കാര്യവും, സാഹചര്യങ്ങള്‍ മാറിയ വിവരവും, ചൂണ്ടിക്കാട്ടിയാകും പുതിയ ഹര്‍ജി സമര്‍പ്പിക്കുക. അച്ഛന്റെ ശ്രാദ്ധത്തില്‍ പങ്കെടുക്കാന്‍ കോടതി അനുമതി നല്‍കിയ കാര്യവും പുതിയ ജാമ്യഹര്‍ജിയില്‍ ചൂണ്ടിക്കാട്ടും.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
