ദില്ലി: ഐഎസ് ഭീകരര് തട്ടിക്കൊണ്ടു പോയ ഫാദര് ടോം ഉഴുന്നാലിന് മോചനം ലഭിച്ചത് പണം നല്കിയ ശേഷമാണെന്ന് റിപ്പോര്ട്ടുകള്. ഒരു കോടി ഡോളര് മോചനദ്രവ്യമായി നല്കിയെന്നാണ് സൂചന. മൂന്ന് കോടി ഡോളര് ഭീകരര് ആവശ്യപ്പെട്ടിരുന്നതായും റിപ്പോര്ട്ടുകള് പറയുന്നു.
അതേസമയം ഒമാന് സര്ക്കാരിന്റെ ഇടപെടലിനെത്തുടര്ന്നാണ് ഉഴുന്നാലിന് മോചനം ലഭിച്ചത്. ഒമാന് ഭരണാധികാരി സുല്ത്താന് ഖാബൂസ് ബിന് സഈദിന്റെ നിര്ദേശത്തെ തുടര്ന്ന് ഒമാന് വിദേശകാര്യ മന്ത്രാലയം വിഷയത്തില് ഇടപെട്ടാണ് മോചനം സാധ്യമാക്കിയത്. ആരോഗ്യനില മോശമായതിനാല് ഫാ.ടോമിനെ മസ്കറ്റിലെ ആശുപത്രിയില് പ്രവേശിപ്പിച്ചിരിക്കുകയാണ്. ഉടന് തന്നെ അദ്ദേഹത്തെ കേരളത്തില് എത്തിക്കുമെന്നാണ് വിവരങ്ങള്.
2016 മാര്ച്ച് നാലിനാണ് ഫാ. ടോമിനെ ഭീകരര് തട്ടിക്കൊണ്ടുപോയത്. ഏദനിലുള്ള വൃദ്ധപുനരധിവാസ കേന്ദ്രത്തിലെ കന്യാസ്ത്രീകള് ഉള്പ്പെടെ 16 പേരെ കൊലപ്പെടുത്തിയ ശേഷമായിരുന്നു തട്ടിക്കൊണ്ടുപോകല്. തന്നെ മോചിപ്പിക്കണമെന്ന് ആവശ്യപ്പെടുന്ന ഫാദറിന്റെ വീഡിയോകളും സോഷ്യല്മീഡിയ വഴി പുറത്ത് വന്നിരുന്നു. കഴിഞ്ഞ മെയ് മാസത്തിലാണ് അവസാന വീഡിയോ പുറത്ത് വന്നത്. സലേഷ്യന് വൈദികനും പാലാ രാമപുരം സ്വദേശിയുമാണ് ഫാം. ടോം.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here