കുണ്ടറയില്‍ വീണ്ടും പീഡനക്കേസ്, തൂങ്ങി മരിച്ച നിലയില്‍ കണ്ടെത്തിയ പെണ്‍കുട്ടി നിരന്തരമായി പീഡിപ്പിക്കപ്പെട്ടിരുന്നുവെന്ന് അന്വേഷണത്തില്‍ വ്യക്തമായി.
കുമ്പളത്തെ ഒരു സ്‌കൂളിലെ പ്‌ളസ് ടു വിദ്യാര്‍ത്ഥിനിയാണ് മരിച്ചത്. തിരുവനന്തപുരം മെഡിക്കല്‍ കോളേജ് ആശുപത്രിയില്‍ നടത്തിയ പോസ്റ്റുമോര്‍ട്ടത്തില്‍ പെണ്‍കുട്ടി പീഡിപ്പിക്കപ്പെട്ടതിന്റെ സൂചനകള്‍ ലഭിച്ചിരുന്നു.
ഇതുമായി ബന്ധപ്പെട്ട കുണ്ടറ സി.ഐ ജയകുമാര്‍, എസ്.ഐ നൗഫല്‍ എന്നിവരുടെ നേതൃത്വത്തില്‍ നടത്തിയ അന്വേഷണത്തിലാണ് പ്രതി ചന്ദനത്തോപ് സ്വദേശി തെറ്റിച്ചിറവിള വീട്ടില്‍ അനന്ദു(21)നെ അറസ്റ്റ് ചെയ്തത്.
ഇയാളെ കൊല്ലം കോടതിയില്‍ ഹാജരാക്കി റിമാന്റ് ചെയ്തു. അനന്ദുവും ഹരിയും അടുപ്പത്തിലായിരുന്നു. പെണ്‍കുട്ടിയുടെ വീട്ടില്‍ ഇയാള്‍ മിക്കപ്പോഴും ചെല്ലാറുണ്ടെന്ന് അയല്‍ക്കാര്‍ മൊഴി നല്‍കിയിരുന്നു.
ഇതിന്റെ അടിസ്ഥാനത്തില്‍ അനന്ദുവിനെ കസ്റ്റഡിയില്‍ എടുത്ത് ചോദ്യം ചെയ്തതില്‍ ഒരു വര്‍ഷത്തിനിടയില്‍ നിരവധി തവണ പെണ്‍കുട്ടിയെ പീഡിപ്പിച്ചതായി ഇയാള്‍ സമ്മതിച്ചു.
അനന്ദുവിനെ സ്ഥലത്ത് കൊണ്ടുപോയി തെളിവെടുപ്പു നടത്തി. പോക്‌സോ വകുപ്പ് പ്രകാരമാണ് ഇയാള്‍ക്കെതിരെ കേസ് രജിസ്റ്റര്‍ ചെയ്തത്.
നിരന്തരമുള്ള പീഡനത്തില്‍ മനംനൊന്താണ് പെണ്‍കുട്ടി മുറിയ്ക്കുള്ളിലെ ഫാനില്‍ ഷാള്‍ കുരുക്കി കെട്ടിത്തൂങ്ങി മരിച്ചതെന്നാണ് പൊലീസ് വിലയിരുത്തല്‍ ആത്മഹത്യാ പ്രേരണാ കുറ്റവും പ്രതിയ്‌ക്കെതിരെ ചേര്‍ത്തിട്ടുണ്ട്.
14ന് വൈകിട്ട് 5 മണിയോടെയായിരുന്നു വീട്ടിനുള്ളില്‍ മൃതദേഹം കണ്ടെത്തിയത്. കുണ്ടറ നാന്തിരിയ്ക്കലില്‍ പെണ്‍കുട്ടി തൂങ്ങി മരിച്ച സംഭവത്തിലും ഏറെ നാളുകള്‍ക്ക് ശേഷമാണ് പീഡനം നടന്നിരുന്നുവെന്ന വിവരം പുറത്ത് വന്നത്.
ആ കേസില്‍ മരിച്ച കുട്ടിയുടെ അപ്പൂപ്പനെ ഒന്നാം പ്രതിയാക്കി കേസെടുത്തിരുന്നു. ഈ സംഭവത്തില്‍ നാടിന്റെ നടുക്കം മാറിവരും മുമ്പെയാണ് അടുത്ത പീഡനക്കേസ്.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
