ഹൈദരാബാദ്: മലയാളിയുവാവിനെ ഹൈദരാബാദിലെ താമസസ്ഥലത്ത് വെട്ടേറ്റ് മരിച്ച നിലയില്‍ കണ്ടെത്തി.
തൊടുപുഴ സ്വദേശിയായ അരുണ്‍ പി ജോര്‍ജി (37) നെയാണ് സെക്കന്തരാബാദിനടുത്ത് രാംനഗറിലെ വീട്ടില്‍ വെട്ടേറ്റു മരിച്ച നിലയില്‍ കണ്ടെത്തിയത്. ചെന്നൈ ആസ്ഥാനമായ സ്വകാര്യ കമ്പനിയുടെ ഹൈദരാബാദിലെ ശാഖാമാനേജര്‍ ആയി പ്രവര്‍ത്തിച്ചു വരികയായിരുന്നു.
ശനിയാഴ്ച രാത്രി ഒമ്പതോടെയാണ് അരുണിന്റെ മൃതദേഹം വീട്ടിലെ കുളിമുറിയില്‍ കണ്ടെത്തിയത്.
ശനിയാഴ്ച്ച നാട്ടില്‍ എത്താനിരുന്നതാണ്‌
ശനിയാഴ്ച നാട്ടിലേക്ക് വിമാനമാര്‍ഗം തിരിക്കാനിരുന്നതാണ് അരുണ്‍. എന്നാല്‍, വൈകുന്നേരമായിട്ടും എത്താത്തതിനെ തുടര്‍ന്ന് വീട്ടുകാര്‍ ഫോണില്‍ ബന്ധപ്പെട്ടെങ്കിലും ലഭിച്ചില്ല.
തുടര്‍ന്ന് സുഹൃത്തുക്കളെ വിളിച്ച് അന്വേഷിക്കാന്‍ പറയുകയായിരുന്നു.
സുഹൃത്തുക്കള്‍ അരുണ്‍ താമസിച്ചിരുന്ന വീട്ടിലെത്തി പൂട്ടുതകര്‍ത്ത് അകത്തു കടക്കുകയായിരുന്നു.
അപ്പോഴാണ് കുളിമുറിയില്‍ തലയ്ക്കും കഴുത്തിലും ആഴത്തിലുള്ള മുറിവേറ്റ് അരുണ്‍ മരിച്ചു കിടക്കുന്നത് കണ്ടത്. അലമാര തുറന്ന നിലയില്‍ ആയിരുന്നു.
തൊടുപുഴ പന്നൂര്‍ പറനിലയം വീട്ടില്‍ ജോര്‍ജിന്റെയും എല്‍സമ്മയുടെയും മകനാണ്.
കൊലപാതകവുമായി ബന്ധപ്പെട്ട് മൂന്നുപേരെ പൊലീസ് കസ്റ്റഡിയില്‍ എടുത്ത് ചോദ്യം ചെയ്തു വരികയാണ്.
കൊലയാളികളെപ്പറ്റി സൂചന ലഭിച്ചെന്നാണ് റിപ്പോര്‍ട്ടുകള്‍.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
