ബാങ്ക് അക്കൗണ്ടുമായി ആധാര് ബന്ധിപ്പിക്കുന്നതിനെതിരെ അഖിലേന്ത്യ ബാങ്ക് കോണ്ഫെഡറേഷന് രംഗത്ത്. ആധാറുമായി ബന്ധിപ്പിക്കുന്ന നടപടികള്ക്ക് കേന്ദ്രസര്ക്കാര് തങ്ങളെ നിര്ബന്ധിക്കരുതെന്നാണ് കോണ്ഫെഡറേഷന്റെ നിലപാട്.
കേന്ദ്രസര്ക്കാര് നയങ്ങള് രാജ്യത്തെ ബാങ്കുകളെ വലിയ സാമ്പത്തിക ബാധ്യതയില് കൊണ്ടെത്തിച്ചെന്നും ഫെഡറേഷന് വ്യക്തമാക്കി. ബാങ്ക് അക്കൗണ്ടുമായി ആധാര് ബന്ധിപ്പിക്കാന് രണ്ട് മാസം മാത്രം ബാക്കിനില്ക്കെയാണ് ആധാര് ബന്ധിപ്പിക്കുന്നതിനെതിരെ ബാങ്ക് ജീവനക്കാര് തന്നെ രംഗത്തെത്തിയത്.
ആധാറുമായി ബന്ധപ്പെട്ട കേസുകള് സുപ്രീംകോടതിയുടെ പരിഗണനയിലാണ്. ഈ സാഹചര്യത്തില് ആധാര് ബന്ധിപ്പിക്കുന്ന നടപടികള്ക്ക് കേന്ദ്രസര്ക്കാര് തങ്ങളെ നിര്ബന്ധിക്കരുതെന്നാണ് അഖിലേന്ത്യ ബാങ്ക് കോണ്ഫെഡറേഷന്റെ നിലപാട്.
ഉത്തരവ് നടപ്പാക്കാനുള്ള കേന്ദ്രസര്ക്കാരിന്റെ തിടുക്കം ജനാധിപത്യത്തിന്റെ അന്തസത്തയ്ക്ക് എതിരാണെന്നും ഫെഡറേഷന് വ്യക്തമാക്കി. ബാങ്കുകളില് ഉദ്യോഗസ്ഥരുടെ കുറവുണ്ട്, കേന്ദ്രസര്ക്കാര് നടപടികള് ഉദ്യോഗസ്ഥര്ക്ക് അമിത ജോലിഭാരമാണ് സൃഷ്ടിക്കുന്നത്.
പ്രധാന് മന്ത്രി ജന്ധന് യോജന നടപ്പിലാക്കിയപ്പോള് രാജ്യത്തെ പൊതുമേഖല ബാങ്കുകളിലും ഗ്രാമീണ് ബാങ്കുകളിലുമായി 29 കോടി അക്കൗണ്ടുകളാണ് പുതുതായി ആരംഭിച്ചത്.
എന്നാല് സ്വകാര്യ ബാങ്കുകളില് ആരംഭിച്ചത് 95 ലക്ഷം അക്കൗണ്ടുകള് മാത്രമാണ്. 80,000 കോടിയോളം രൂപ മുദ്ര ലോണായി നല്കി, കേന്ദ്രസര്ക്കാരിന്റെ ഭീം, ജീവന് ജ്യോതി, ജ്യോതി ഭീമാ, സുരക്ഷാ ഭീമാ തുടങ്ങിയ പദ്ധതികളും രാജ്യത്തെ പൊതുമേഖലാ ബാങ്കുകളെ ഭീമമായ സാമ്പത്തിക ബാധ്യതയില് കൊണ്ടെത്തിച്ചെന്നാണ് ഫെഡറേഷന് ചൂണ്ടിക്കാട്ടുന്നത്.
സ്വകാര്യത മൗലീകാവകാശമാണെന്ന് സുപ്രീംകോടതി വിധിച്ച സാഹചര്യത്തില് ആധാര് കേസില് വിധി വരുന്ന വരെ ചുമതലകള് ഏറ്റെടുക്കേണ്ടെന്നാണ് ഫെഡറേഷന് നിലപാട്.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here