തിരുവനന്തപുരം: ബിനോയി കോടിയേരിക്കെതിരെ മാധ്യമങ്ങള് പടച്ചുവിട്ടത് കള്ളക്കഥകളാണെന്ന് സിപിഐഎം. കോടിയേരി ബാലകൃഷ്ണനും, സിപിഐഎമ്മിനുമെതിരെ ഒരു വിഭാഗം മാധ്യമങ്ങള് ഉയര്ത്തുന്ന ആക്ഷേപങ്ങള് അടിസ്ഥാനരഹിതമാണെന്ന് സിപിഐഎം സംസ്ഥാന സെക്രട്ടറിയേറ്റ് പ്രസ്താവനയില് വ്യക്തമാക്കി.
സിപിഐഎം പ്രസ്താവന ഇങ്ങനെ:
2003 മുതല് ദുബായില് ജീവിച്ചു വരുന്ന ബിനോയിക്കെതിരെ ദുബായില് സ്ഥിതി ചെയ്യുന്ന ഒരു സ്ഥാപനം ഉന്നയിച്ചുവെന്ന് പറയപ്പെടുന്ന ആരോപണത്തെ അടിസ്ഥാനപ്പെടുത്തി സിപിഐ(എം) സംസ്ഥാന സെക്രട്ടറി കോടിയേരി ബാലകൃഷ്ണനും, സിപിഐഎമ്മിനുമെതിരെ ഒരു വിഭാഗം മാധ്യമങ്ങള് ഉയര്ത്തുന്ന ആക്ഷേപങ്ങള് അടിസ്ഥാനരഹിതമാണെന്ന് സിപിഐഎം സംസ്ഥാന സെക്രട്ടറിയേറ്റ് പ്രസ്താവനയില് വ്യക്തമാക്കി.
ബിനോയിക്കെതിരെ സാമ്പത്തിക ഇടപാടിന്റെ പേരില് ഒരു കേസും ഇന്ത്യയിലൊരിടത്തും നിലവില് ഇല്ല. തന്റെ പേരില് ദുബായിലും ഏതെങ്കിലും തരത്തിലുള്ള കേസുകളോ, യാത്രാവിലക്കോ നിലവില് ഇല്ലെന്ന് ബിനോയ് തന്നെ വ്യക്തമാക്കിയതാണ്.
മറിച്ചാണെന്ന് തെളിയിക്കുന്ന ഒരു രേഖയും ഒരു മാധ്യമവും ഉദ്ധരിച്ചിട്ടില്ല. ദുബായില് നടന്ന സാമ്പത്തിക ഇടപാട് സംബന്ധിച്ച് പരാതികള് ഉള്ളതായാണ് മാധ്യമങ്ങള് റിപ്പോര്ട്ട് ചെയ്തത്. ഒരു വിദേശരാജ്യത്ത് നടന്നൂവെന്ന് പറയപ്പെടുന്ന സാമ്പത്തിക ഇടപാടില് കേരള സര്ക്കാരിനോ, കേരളത്തിലെ സിപിഐഎമ്മിനോ യാതൊന്നും ചെയ്യാനില്ല.
ഈ വസ്തുതകള് മറച്ചുവെച്ച് കോടിയേരി ബാലകൃഷ്ണനും സിപിഐഎമ്മിനുമെതിരെ അപകീര്ത്തികരമായ വാര്ത്തകള് പ്രസിദ്ധീകരിക്കുകയും അതിന്മേല് ചര്ച്ച സംഘടിപ്പിക്കുകയും ചെയ്യുന്നത് ദുരുദ്ദേശപരമാണ്. രണ്ട് കക്ഷികള് തമ്മിലുള്ള സാമ്പത്തിക ഇടപാട് സംബന്ധിച്ച ഏതെങ്കിലും തര്ക്കമുണ്ടെങ്കില് അത് സിപിഐ(എമ്മിനെ അടിക്കാനുള്ള വടിയായി ഉപയോഗിച്ചത് രാഷ്ട്രീയ ഗൂഢാലോചനയാണ്.
മാധ്യമങ്ങള് ഉന്നയിച്ച പ്രശ്നങ്ങളില് യാതൊരു ബന്ധവുമില്ലാത്ത, കോടിയേരി ബാലകൃഷ്ണന് എതിരെ ഉന്നയിക്കുന്ന ബാലിശമായ ആരോപണങ്ങള് തള്ളിക്കളയണമെന്ന് സെക്രട്ടറിയേറ്റ് അഭ്യര്ത്ഥിയ്ക്കുന്നു.
സിപിഐഐം ഫേസ്ബുക്ക് പോസ്റ്റ് ഇങ്ങനെ:
‘മനോ’ഹരമായ മറ്റൊരു കള്ളം കൂടി പൊളിയുന്നു
പതിവ് കമ്മ്യൂണിസ്റ്റ് വിരോധം വച്ച് സമ്മേളന കാലയളവില് മലയാള മാധ്യമ തമ്പുരാക്കന്മാര് പടച്ചുവിടുന്ന കള്ളക്കഥയിലെ അവസാനത്തെ ഏടായിരുന്നു ഇന്നലെ മാധ്യങ്ങള് ആവേശത്തോടെ ചര്ച്ചയാക്കിയ കോടിയേരിയുടെ മകന്റെ പേരിലുള്ള സാമ്പത്തിക ക്രമക്കേട് എന്ന ആരോപണം.
ഇത് അടിസ്ഥാനമില്ലാത്ത കള്ളമാണെന്ന് തെളിഞ്ഞിരിക്കുകയാണ് ദുബായ് പോലീസ് ബിനോയ് കോടിയേരിയുടെ പേരില് ഇന്ന് നല്കിയ പോലീസ് ക്ലീയറന്സ് സര്ട്ടിഫിക്കറ്റ്.
ഈ സര്ട്ടിഫിക്കറ്റ് നല്കുന്നത് വരെയുള്ള തിയ്യതിയില് ബിനോയ് കോടിയേരിയുടെ പേരില് യാതൊരു കേസും ദുബായില് നിലവിലില്ലെന്ന് ദുബായ് ക്രിമിനല് ഇന്വെസ്റ്റിഗേഷന് ഡിപ്പാര്ട്ട്മെന്റ് ആക്ടിങ്ങ് ഡയറക്ടര് ജനറല് സലീം ഖലീഫ അലി ഖലീഫ അല് റുമൈത്തി നല്കിയ സര്ട്ടിഫിക്കറ്റില് പറയുന്നു.
Related Stories
ബിനോയിക്കെതിരെ കേസില്ലെന്ന് ദുബായ് പൊലീസ്
നുണക്കഥകള് പൊളിഞ്ഞു; ബിനോയിക്കെതിരെ കേസുകളൊന്നുമില്ലെന്ന് ദുബായ് കോടതി
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here