വീടുകളിൽ പ്രത്യേക തരത്തിലുള്ള കറുത്ത സ്റ്റിക്കറുകള് പതിക്കുന്ന സംഭവത്തിൽ ആശങ്ക വേണ്ടെന്ന് മുഖ്യമന്ത്രി പിണറായി വിജയൻ പറഞ്ഞു. വിഷയം അന്വേഷിക്കുവാൻ പൊലീസിനെ ചുമതലപ്പെടുത്തിയതായും മുഖ്യമന്ത്രി നിയമസഭയിൽ അറയിച്ചു.
ഇത്തരം സ്റ്റിക്കറുകൾ അജ്ഞാത വ്യക്തികള് വീടുകളില് പതിക്കുന്നുവെന്നും കുട്ടികളെ തട്ടിക്കൊണ്ടുപോകുന്ന സംഘത്തില്പ്പെട്ടവരാണ് ഇതിന് പിന്നിലെന്നുമുള്ള പ്രചാരണങ്ങൾ നടക്കുന്നുണ്ട്. പ്രത്യേകിച്ച് സാമൂഹിക മാധ്യമങ്ങളില് വരുന്നുണ്ട്.
തെറ്റിദ്ധാരണയുടെ അടിസ്ഥാനത്തിലുള്ളവയാണ് മിക്ക പ്രചാരണങ്ങളും. ഇത്തരമൊരു സാഹചര്യം കഴിഞ്ഞ വര്ഷം വടക്കന് കേരളത്തില്, വിശേഷിച്ചും മലപ്പുറത്ത് ഒരു വര്ഷം മുമ്പ് ഉണ്ടായിരുന്നു.
അതേത്തുടര്ന്ന് ജില്ലകളിലെ എല്ലാ മുതിര്ന്ന പോലീസ് ഉദ്യോഗസ്ഥര്ക്കും ജാഗ്രതാനിര്ദ്ദേശം നല്കുകയും തുടര്ന്നു നടന്ന പ്രാഥമികാന്വേഷണത്തില് അത്തരമൊരു സംഭവം നടന്നിട്ടില്ലായെന്നും അതുസംബന്ധിച്ച് ആശങ്കകള്ക്ക് അടിസ്ഥാനമില്ലെന്നും വ്യക്തമായിരുന്നതാണ്.
സമീപ ദിവസങ്ങളിലായി ചില വീടുകളില് കറുത്ത സ്റ്റിക്കറുകള് പതിച്ചതായി ശ്രദ്ധയില്പ്പെട്ട ഉടന് സംസ്ഥാന പോലീസ് മേധാവി സംസ്ഥാനത്തെ എല്ലാ പോലീസ് സ്റ്റേഷനുകള്ക്കും കണ്ട്രോള് റൂമുകള്ക്കും സൈബര് സെല്ലുകള്ക്കും ജാഗ്രതാനിര്ദ്ദേശം നല്കിയിട്ടുണ്ട്. അതോടൊപ്പം ഭീതിയുളവാക്കുന്ന സന്ദേശങ്ങള് പ്രചരിപ്പിക്കുന്നത് തടയാനാവശ്യമായ നടപടികളും സ്വീകരിച്ചിട്ടുണ്ട്.
ഇത്തരം ആശങ്കകള് ഏതെങ്കിലും വ്യക്തികള് അറിയിച്ചാല് എത്രയുംവേഗം അതു സംബന്ധിച്ച അന്വേഷണവും തുടര്നടപടികളുമുണ്ടാകണമെന്ന നിര്ദ്ദേശവും നല്കിയിട്ടുണ്ട്. പ്രധാനമായും തിരുവനന്തപുരം, എറണാകുളം, ഇടുക്കി,ആലപ്പുഴ എന്നീ ജില്ലകളിലെ ഏതാനും ചില വീടുകളിലാണ് ഇത്തരം കറുത്ത സ്റ്റിക്കറുകള് പതിച്ചിട്ടുള്ളതായി ശ്രദ്ധയില്പ്പെട്ടത്. ഇത് സംബന്ധിച്ച് അന്വേഷിക്കാന് അതത് റെയ്ഞ്ച് ഐ ജിമാരെ ചുമതലപ്പെടുത്തിയിട്ടുണ്ട്.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here