ദില്ലി: ബിജെപി അധ്യക്ഷന് അമിത് ഷാ പ്രതിസ്ഥാനത്തുണ്ടായിരുന്ന വ്യാജ ഏറ്റുമുട്ടല് കൊലപാതകക്കേസ് വിചാരണ നടത്തിയിരുന്ന സിബിഐ പ്രത്യേകകോടതി ജഡ് ജി ബി എച്ച് ലോയയുടെ മരണം ഹൃദയാഘാതം മൂലമല്ലെന്ന് പ്രമുഖ ഫോറന്സിക് വിദഗ്ധന്.
ലോയയുടെ മരണവുമായി ബന്ധപ്പെട്ട മെഡിക്കല് രേഖകള് പരിശോധിച്ചാണ് ഡല്ഹി എയിംസിലെ ഫോറന്സിക് മെഡിസിന് ആന്ഡ് ടോക്സിക്കോളജി വിഭാഗം മുന് മേധാവി ഡോ. ആര് കെ ശര്മ മഹാരാഷ്ട്ര സര്ക്കാരിന്റെ നിലപാടിനെ തള്ളിയത്. ഇന്ത്യന് അസോസിയേഷന് ഓഫ് മെഡികോ ലീഗല് എക്സ്പെര്ട്ട്സ് പ്രസിഡന്റ് കൂടിയായ ഡോ. ആര് കെ ശര്മ രാജ്യത്തെ ഏറ്റവും മികച്ച ഫോറന്സിക് വിദഗ്ധരില് ഒരാളാണ്.
വിഷം അകത്തുചെന്നതിനെ തുടര്ന്നുണ്ടായ മസ്തിഷ്കാഘാതമായിരിക്കാം മരണത്തിനിടയാക്കിയതെന്നാണ് ഡോ. ശര്മയുടെ നിഗമനം. രാസപരിശോധനയ്ക്ക് വിട്ട ആന്തരികാവയവങ്ങളുടെ സാമ്പിള്റിപ്പോര്ട്ടും പോസ്റ്റ്മോര്ട്ടം റിപ്പോര്ട്ടും ഹിസ്റ്റോപാത്തോളജി റിപ്പോര്ട്ടുമാണ് ഡോ. ശര്മ പരിശോധിച്ചത്.
സുപ്രീംകോടതി നിര്ദേശപ്രകാരം ജഡ്ജി ലോയയുടെ മരണവുമായി ബന്ധപ്പെട്ട എല്ലാ രേഖകളും ബന്ധപ്പെട്ട കക്ഷികള്ക്ക് നല്കാന് മഹാരാഷ്ട്ര സര്ക്കാര് നിര്ബന്ധിതരായിരുന്നു. ഈ രേഖകളും വിവരാവകാശനിയമപ്രകാരം ലഭിച്ച രേഖകളുമാണ് കേസില് നിര്ണായകമായ വഴിത്തിരിവാകുന്നത്. സുപ്രീംകോടതി മേല്നോട്ടത്തില് വിദഗ്ധ അന്വേഷണം വേണമെന്ന ആവശ്യത്തിന് ഡോ. ശര്മയുടെ നിഗമനം ബലം പകരും.
ഹിസ്റ്റോപാത്തോളജി റിപ്പോര്ട്ട് പ്രകാരം മയോകാര്ഡിയല് ഇന്ഫര്ക്ഷന്റെ ഒരു ലക്ഷണവുമില്ലാത്തതിനാല് ഹൃദയാഘാതമുണ്ടെന്ന് വാദിക്കാനാകില്ല. രക്തധമനികളില് കാല്സ്യം അടിഞ്ഞുകൂടിയതായി പോസ്റ്റ്മോര്ട്ടം റിപ്പോര്ട്ടിലുണ്ട്. കാല്സ്യം അടിഞ്ഞാല് രക്തപ്രവാഹം തടസ്സപ്പെടാനിടയില്ലെന്നും ഹൃദയാഘാത സാധ്യതയില്ലെന്നും ഡോ. ശര്മ ‘കാരവന്’ മാസികയോട് പറഞ്ഞു.
പുലര്ച്ചെ നാലിന് ബി എച്ച് ലോയയ്ക്ക് ശാരീരികാസ്വാസ്ഥ്യമുണ്ടായെന്നും 6.15ന് മരണം സ്ഥിരീകരിച്ചുവെന്നുമാണ് ദുരൂഹമായ വാദം. ഹൃദയാഘാത സൂചന ഉണ്ടായി 30 മിനിറ്റിനുള്ളില് ഹൃദയത്തില് വലിയ മാറ്റങ്ങള് ഉണ്ടാകേണ്ടതാണ്. എന്നാല്, രണ്ടുമണിക്കൂര് കഴിഞ്ഞിട്ടും ഹൃദയത്തിന് കാര്യമായ മാറ്റമൊന്നും ഉണ്ടായിട്ടില്ലെന്നാണ് പോസ്റ്റ്മോര്ട്ടം റിപ്പോര്ട്ട്.
ലോയയുടെ മസ്തിഷ്കത്തിന്റെ ബാഹ്യാവരണം വല്ലാതെ സങ്കോചിച്ചതായി പോസ്റ്റ്മോര്ട്ടം റിപ്പോര്ട്ടില് പറയുന്നു. മസ്തിഷ്കത്തെ നേരിട്ടോ അല്ലാതെയോ ബാധിക്കാവുന്ന ശാരീരിക ആക്രമണത്തിന്റെ ഭാഗമായിട്ടേ ഇതിന് സാധ്യതയുള്ളൂവെന്നും ഡോ. ആര് കെ ശര്മ ചൂണ്ടിക്കാട്ടി.
മെഡിക്കല് റിപ്പോര്ട്ടിലെ പരാമര്ശങ്ങളും ഔദ്യോഗിക വിശദീകരണവും തമ്മിലുള്ള പൊരുത്തക്കേടുകള് വിശദ അന്വേഷണം അനിവാര്യമാക്കുന്നെന്നും അദ്ദേഹം കൂട്ടിച്ചേര്ത്തു.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here