ശ്രീലങ്കയിൽ നടക്കാനിരിക്കുന്ന ത്രിരാഷ്ട്ര ട്വന്റി 20 ടൂര്ണമെന്റിനുള്ള ഇന്ത്യൻ ടീമിനെ ഹിറ്റ്മാന് രോഹിത് ശർമ നയിക്കും. നായകന് വിരാട് കോഹ്ലി, എം.എസ്. ധോണി, ഭുവനേശ്വർ കുമാർ, ജസ്പ്രീത് ബുംറ, കുൽദീപ് യാദവ്, ഹാർദിക് പാണ്ഡ്യ എന്നിവർക്കു വിശ്രമം അനുവദിക്കാന് ബിസിസിഐ തീരുമാനിച്ചു.
ദീപക് ഹൂഡ, വാഷിംഗ്ടണ് സുന്ദർ, വിജയ് ശങ്കർ, മുഹമ്മദ് സിറാജ്, റിഷഭ് പന്ത് എന്നിവർ ഉള്പ്പെടുന്നതാകും ഇന്ത്യന് സംഘം.
നേരത്തെ ശ്രീലങ്കയ്ക്കെതിരെ രോഹിത് ടീമിനെ നയിച്ചിട്ടുണ്ട്. അന്ന് ഇന്ത്യക്ക് വിജയം സമ്മാനിക്കാന് രോഹിതിന് സാധിച്ചിരുന്നു. ദക്ഷിണാഫ്രിക്കയ്ക്കെതിരായ നിര്ണായക ടി ട്വന്റി പോരാട്ടം ജയിച്ച് ഇന്ത്യ പരമ്പര സ്വന്തമാക്കിയപ്പോഴും രോഹിതായിരുന്നു നായകന്.
ശിഖർ ധവാനാണ് പര്യടനത്തിൽ ടീമിന്റെ ഉപനായകൻ. ശ്രീലങ്കയും ബംഗ്ലാദേശുമാണ് ത്രിരാഷ്ട്ര ടൂര്ണമെന്റില് ഇന്ത്യക്കൊപ്പം മാറ്റുരയ്ക്കുക. മാർച്ച് ആറു മുതൽ 18 വരെയാണ് ടൂര്ണമെന്റ്.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here