കണ്ണൂര്‍: കോണ്‍ഗ്രസ് നേതാവ് കെ സുധാകരന് സിപിഐഎം വിരുദ്ധ ജ്വരം പിടിപെട്ടിരിക്കുകയാണെന്ന് സിപിഐഎം കണ്ണൂര്‍ ജില്ലാ സെക്രട്ടറി പി ജയരാജന്‍.
ബിജെപി അഖിലേന്ത്യാ നേതൃത്വം ആവശ്യപ്പെട്ടതനുസരിച്ചാണ് സുധാകരന് ഇപ്പോഴും പ്രവര്‍ത്തിച്ചുകൊണ്ടിരിക്കുന്നതെന്നും അദ്ദേഹത്തിന്റെ പ്രസംഗവും പ്രവര്‍ത്തനവുമെല്ലാം ഈ നിര്‍ദേശം അനുസരിച്ചുള്ളതാണെന്നും ജയരാജന്‍ വ്യക്തമാക്കി.
പി ജയരാജന്റെ വാക്കുകള്‍:
സുധാകരന്റെ ഇന്നത്തെ വാര്‍ത്താ സമ്മേളനം മുഴുവനായും ശ്രദ്ധിച്ചാല്‍ ഒരു കാര്യം എല്ലാവര്‍ക്കും വ്യക്തമാകും. അദ്ദേഹത്തിന് സിപിഐ(എം) വിരുദ്ധ ജ്വരം പിടിപെട്ടിരിക്കുകയാണ്.
സിപിഐ(എം) നെ അക്രമകാരികളുടെ പ്രസ്ഥാനമായി മുദ്രകുത്താനാണ് തുടക്കം മുതല്‍ സുധാകരന് ശ്രമിച്ചത്. താന്‍ സാധാരണ പ്രസംഗങ്ങളില്‍ ബിജെപിക്കെതിരായാണ് കൂടുതലും പറയാറുള്ളത് എന്ന് പറഞ്ഞ ഇദ്ദേഹം ആര്‍എസ്എസും ബിജെപിയും രാജ്യത്തുടനീളം നടത്തിക്കൊണ്ടിരിക്കുന്ന കൂട്ടക്കൊലകളെയും വര്‍ഗ്ഗീയ കലാപങ്ങളെയും കുറിച്ച് ഒരു പ്രതികരണവും നടത്തിയിട്ടില്ല എന്നത് പ്രത്യേകം ശ്രദ്ധിക്കേണ്ടതാണ്.
ഇത് തന്നെയാണ് ഞാന്‍ കഴിഞ്ഞ ദിവസം വാര്‍ത്താസമ്മേളനത്തില്‍ പറഞ്ഞത്. സുധാകരന്റെ വാര്‍ത്താ സമ്മേളനം കൂടി കണ്ടവര്‍ക്ക് കാര്യങ്ങള്‍ എളുപ്പം മനസിലാവും.
ബിജെപി അഖിലേന്ത്യാ നേതൃത്വം ആവശ്യപ്പെട്ടതനുസരിച്ചാണ് സുധാകരന് ഇപ്പോഴും പ്രവര്‍ത്തിച്ചുകൊണ്ടിരിക്കുന്നത്. അദ്ദേഹത്തിന്റെ പ്രസംഗവും പ്രവര്‍ത്തനവുമെല്ലാം ഈ നിര്‍ദേശം അനുസരിച്ചുള്ളതാണ്.
കോണ്‍ഗ്രസ്സ് പ്രവര്‍ത്തകന്മാരില്‍ സിപിഐ(എം) വിരുദ്ധ അപസ്മാരം പടര്‍ത്താനാണ് ശ്രമം. ഇങ്ങനെയുള്ള കോണ്‍ഗ്രസ് പ്രവര്‍ത്തകരെ ബിജെപിയില്‍ ചേര്‍ക്കാന്‍ എളുപ്പമാണ്. ഈ രാഷ്ട്രീയ അജണ്ടയാണ് സുധാകരന് നടപ്പിലാക്കിക്കൊണ്ടിരിക്കുന്നത്. ഇത് പ്രബുദ്ധരായിട്ടുള്ള കോണ്‍ഗ്രസ്സ് പ്രവര്‍ത്തകര്‍ തന്നെ തിരിച്ചറിയുന്നുണ്ട്.
കോണ്‍ഗ്രസ്സ് വിട്ടാല്‍ ഞാന്‍ രാഷ്ട്രീയം അവസാനിപ്പിക്കും എന്ന സുധാകരന്റെ വാക്കുകള്‍ കേട്ടപ്പോള്‍ ചിരിയാണ് വന്നത്. കഴിഞ്ഞ ലോക്‌സഭാ തെരഞ്ഞെടുപ്പില്‍ തോറ്റാല്‍ രാഷ്ട്രീയം അവസാനിപ്പിക്കുമെന്ന് പറഞ്ഞ സുധാകരനെ പിന്നീട് നമ്മള്‍ കണ്ടത് ഉദുമയിലാണ്.
പിന്നീട് ഉദുമയില്‍ തോറ്റാല്‍ രാഷ്ട്രീയം അവസാനിപ്പിക്കും എന്നായിരുന്നു വെല്ലുവിളി. ഇതൊക്കെ തോറ്റ എംഎല്‍എയായ സുധാകരന് മറന്നാലും ജനങ്ങള്‍ക്ക് ഓര്‍മ്മശക്തിയുണ്ട്.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
