ശാരീരിക വെല്ലുവിളികളെ അതിജീവിച്ച് ജീവിത വിജയം നേടിയവര്‍ക്കുള്ള കൈരളി പീപ്പിള്‍ ടിവിയുടെ ഫീനിക്‌സ് വേദിയിലായില്‍ പുരുഷ വിഭാഗത്തില്‍ പുരസ്‌കാരം നേടിയ സജിതോമസിനെ ഹൃദയംകൊണ്ട് അഭിനന്ദിക്കുകയായിരുന്നു മലയാളത്തിന്റെ മഹാതാരവും കൈരളി ചെയര്‍മാനുമായ മമ്മൂട്ടി.
സജി തോമസ് വിമാനമുണ്ടാക്കണമെന്ന് ആഗ്രഹിച്ചയാളാണ്. എന്റെ ചെറുപ്പകാലത്ത് ഏറ്റവുമിഷ്ടപെട്ട കളിപ്പാട്ടം ഹെലികോപ്ടറായിരുന്നു. കുട്ടിക്കാലത്ത് പിതാവ് ഉത്സവപ്പറമ്പുകള്‍ പോലുള്ള സ്ഥലങ്ങളില്‍ പോയി വരുന്നതിന്റെ അടുത്ത ദിവസം രാവിലെ അദ്ദേഹത്തിന്റെ മേശപ്പുറത്ത്‌പോയി ഞാന്‍ നോക്കുമായിരുന്നു.
എനിക്ക് എന്ത് കളിപ്പാട്ടമാണ് കൊണ്ടുവന്നിരിക്കുന്നതെന്നറിയാനായിരുന്നു അത്. എല്ലായ്‌പോഴും മൂന്ന് ചക്രമുള്ള നിലത്തുകൂടെ ഉരുട്ടുമ്പോള്‍ മുകളില്‍ അതിന്റെ പങ്കുകള്‍ കറങ്ങുന്ന അരക്കിന്റെ വിമാനമാണ് കിട്ടിയിരുന്നത്.
ജീവിതത്തില്‍ മനുഷ്യന് ഏറ്റവുമധികം സ്വപ്‌നംകാണുന്നതില്‍ ഒന്ന് വായുവില്‍ കൈവീശി പറന്നുപോകുന്നതാകും. മനുഷ്യന്റെ ഏറ്റവും വലിയ മോഹമാണ് പറക്കുകയെന്നത്. മനുഷ്യന് ഇല്ലാത്ത കഴിവും അതാണ്. അതുകൊണ്ടുതന്നെയാണ് മനുഷ്യന് സ്വപ്‌നങ്ങളില്‍ പറക്കുന്നതും വിമാനം കണ്ടുപിടിച്ചതും.
സജി തോമസ് വിമാനം കണ്ടുപിടിച്ചിട്ടില്ല. വിമാനം നേരത്തെ കണ്ടുപിടിക്കപ്പെട്ടിട്ടുണ്ട്. പക്ഷെ സജി തോമസിനെ സംബന്ധിച്ചടുത്തോളം ബധിരനും മൂകനും ഒരു ശാസ്ത്രീയ വിദ്യാഭ്യാസവുമില്ലാത്തൊരാള്‍ സ്വന്തം കഴിവുകൊണ്ടും സ്വന്തം ധാരണകള്‍ കൊണ്ടും വിമാനമുണ്ടാക്കുകയെന്നത് അത്ഭുതമാണ്. അത്യത്ഭുതമാണെന്നും മലയാളത്തിന്റെ മഹാനടന്‍ പറഞ്ഞു. വൈകല്യങ്ങളെ അതിജീവിച്ച് വിജയം നേടിയവര്‍ക്കുള്ള പുരസ്‌കാരവിതരണം നടത്തിയത് മമ്മൂട്ടിയായിരുന്നു.
മമ്മൂട്ടിയുടെ വാക്കുകള്‍ കേള്‍ക്കാം
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
