പ്രാണനെപ്പോലെ ചേര്‍ത്തുപിടിച്ച ആ ഷര്‍ട്ടിന് സ്നേഹത്തിന്‍റെ കണ്ണീരുപ്പുണ്ട്; പ്രിയതമന് നീനു അന്ത്യ യാത്രാമൊഴിയേകിയത് ആ നീല ഷര്‍ട്ടുമായി

പ്രിയതമന് നീനു അന്ത്യയാത്രാമോ‍ഴിയേകിയത് ആ നീല ഷര്‍ട്ട് കയ്യില്‍കരുതി. പ്രാണനെപ്പോലെ ചേര്‍ത്തുപിടിച്ച ആ ഷര്‍ട്ടിന് അതി വൈകാരിതയുടെ കണ്ണീരുപ്പുണ്ട്.

കെവിന്‍റെ അന്ത്യയാത്രയിലുടനീളം അവള്‍ നെഞ്ചോടടുക്കിപ്പിടിച്ച ഒരു ഷര്‍ട്ടുണ്ട്. ഒരു നീലഷര്‍ട്ട്. അവരുടെ പ്രണയത്തിന്‍റെ വ‍ഴിത്താര ബന്ധുക്കളുടെ ദുരഭിമാനത്തിനു മുന്നിൽ മുറിഞ്ഞുപോയതിന്‍റെ ഹൃദയഭേദക കാഴ്​ചയായിരുന്നു നീനു.

നട്ടാശേരിയിലെ വീട്ടിൽനിന്ന്​ കെവി​ന്റെ മൃതദേഹം സംസ്​കാരചടങ്ങിന്​ കൊണ്ടുപോകുമ്പോൾ അലമുറയിട്ട്​​​ യാത്രാമൊഴി നേരുന്ന ഭാര്യ നീനു. കെവിന്റെ പിതാവ്​ ജോസഫ്​ ജേക്കബിന്റെ പിന്നിൽ
ആ നീല ഷർട്ട്​ നെഞ്ചോട്​ ചേർത്താണ് നീനു നിന്നത്. രജിസ്​റ്റർ വിവാഹം നടക്കുമ്പോൾ ഇടാൻ വാങ്ങിയ പുതിയ നീല ഷർട്ടായിരുന്നു അത്. ആ ഷർട്ട്​ കെവിൻ ധരിച്ചിരുന്നില്ല.

മൃതദേഹം പള്ളിയിലേക്ക്​ കൊണ്ടുപോകുന്നതിന്​ മുന്നോടിയായി അന്ത്യകർമങ്ങൾക്കിടയിൽ ​കരഞ്ഞുതളർന്ന നീനുവി​ന്റെ കൈയിൽ ആ ഷർട്ട്​ കാണാമായിരുന്നു. മൃതദേഹം വീട്ടിലെത്തിച്ചത്​ മുതൽ വിലാപയാത്രയിലും സംസ്​കാരം നടന്ന ഗുഡ് ഷെപ്പേഡ് ദേവാലയത്തിലും നീനു ആ ഷർട്ട്​ ഒപ്പം കരുതിയിരുന്നു.

മരണമറിഞ്ഞതു മുതൽ നീനുവിന്​ ആ​ശ്വാസമായി ഒപ്പമുണ്ടായിരുന്ന കെവിന്റെ പിതാവ്​ ജോസഫും അന്ത്യനിമിഷങ്ങളിൽ നിയ​​ന്ത്രണംവിട്ടതോടെ കോട്ടയം നട്ടാശേരി വട്ടപ്പാറ വീട്​ കണ്ണീരിലമർന്നു.
മൃതദേഹത്തിലേക്ക്​ വീണുകിടന്ന്​ കരഞ്ഞ നീനുവിനെ ആശ്വസിപ്പിക്കാൻ ഏറെ പണിപ്പെടേണ്ടിവന്നു.

കെവി​​ന്റെ മാതാവ്​ മേരിയുടെയും സഹോദരി കൃപയുടെയും ശബ്​ദം അലമുറകളായി. ഇത്​ കണ്ടുനിന്ന കണ്ണുകളെല്ലാം നനഞ്ഞു.