കൊച്ചി: ജസ്നയുടെ തിരോധാനവുമായി ബന്ധപ്പെട്ട് രാഷ്ട്രീയ നേതാക്കള് പ്രസ്താവനകള് നടത്തുമ്പോള് മിതത്വം പാലിക്കണമെന്ന് ഹൈക്കോടതി.
പിസി ജോര്ജ് അപകീര്ത്തിപ്പെടുത്താന് ശ്രമിച്ചതായി ജസ്നയുടെ കുടുംബം ആരോപിച്ചിരുന്നു. ഇതെ തുടര്ന്നാണ് ഹൈക്കോടതിയുടെ നിര്ദേശം.
ജസ്നയെ കണ്ടെത്തണമെന്നാവശ്യപ്പെട്ട് ഷോണ് ജോര്ജ് സമര്പ്പിച്ച ഹേബിയസ് കോര്പ്പസ് ഹര്ജി പരിഗണിക്കുകയായിരുന്നു കോടതി.
അതേസമയം, ജസ്നക്കായി അന്വേഷണം പുരോഗമിക്കുകയാണെന്ന് സര്ക്കാര് ഹൈക്കോടതിയെ അറിയിച്ചു.
ജസ്നയുടെ തിരോധാനത്തില് പിതാവിന്റെ വഴിവിട്ട ജീവിതവുമായി ബന്ധമുണ്ടെന്ന് പിസി ജോര്ജ് കഴിഞ്ഞ ദിവസം ആരോപിച്ചിരുന്നു. ഇതിനു പിന്നാലെ പിസിക്കെതിരെ സഹോദരി ജെഫിയും രംഗത്തെത്തിയിരുന്നു.
അഭിപ്രായം പറയുന്നവര് സത്യാവസ്ഥ അറിഞ്ഞിട്ട് സംസാരിക്കണമെന്നും, സഹായിച്ചില്ലെങ്കിലും ഉപദ്രവിക്കരുതെന്നും ജെഫി പറഞ്ഞിരുന്നു.
അന്ന് ജെഫി പറഞ്ഞത് ഇങ്ങനെ:
‘ജെസ്നയുടെ തിരോധാനത്തെ രാഷ്ട്രീയമായി മുതലെടുക്കാനാണ് ചിലര് ശ്രമിക്കുന്നത്. തങ്ങളെ സഹായിക്കേണ്ടവര് തന്നെ ഇത്തരത്തിലുള്ള ആരോപണങ്ങള് ഉന്നയിക്കുന്നത് ദുഃഖകരമാണ്.’
‘പിതാവിനെതിരെ ആരോപണമുന്നയിക്കുന്നതിന് മുമ്പ് സത്യാവസ്ഥ എന്തെന്ന് ഇങ്ങനെയുള്ളവര് മനസിലാക്കണം. ഞങ്ങള്ക്ക് ഞങ്ങളുടെ പിതാവിന്മേല് ഒരു സംശയവുമില്ല. നൂറു ശതമാനം വിശ്വാസമാണ്.’
‘അമ്മയുടെ മരണ ശേഷം ഞങ്ങള് മക്കളെ അത്തരയേറെ കാര്യമായിട്ടാണ് പപ്പ നോക്കുന്നത്. സഹായിച്ചില്ലെങ്കിലും ആരും ഉപദ്രവിക്കരുത്.’
‘ഊഹാപോഹങ്ങള് ഉണ്ടാകുന്നത് സ്വാഭാവികമാണ്. തങ്ങളെക്കുറിച്ച് എന്തെങ്കിലും പരാതിയുള്ളവര് പൊലീസിന് വിവരം കൈമാറുകയാണ് ചെയ്യേണ്ടത്. ജെസ്നയെക്കുറിച്ച് എന്തെങ്കിലും വിവരം അറിയാവുന്നവരും തങ്ങളെ സഹായിക്കാന് തയാറാകണം.’ ജെഫി പറയുന്നു.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here