തിരുവനന്തപുരം ചികിത്സയുമായി ബന്ധപ്പെട്ട് അമേരിക്കയിലുള്ള കേരള മുഖ്യമന്ത്രി പിണറായി വിജയന്‍ ഇന്ന് ന്യൂയോർക്കിലെ ദ് ക്രൗൺ പ്ലാസയിൽ യുഎസ് മലയാളികളെ അഭിസംബോധന ചെയ്ത് സംസാരിക്കും. പ്രാദേശിക സമയം വൈകിട്ട് 6.30 മുതൽ 8.30 വരെയായിരിക്കും പരിപാടിയെന്ന് സംഘാടകർ അറിയിച്ചു.
ചികിത്സയ്ക്കായി എത്തിയ പിണറായിക്ക് വലിയ രീതിയിലുള്ള സ്വീകരണമൊരുക്കുന്നില്ല ചടങ്ങ് തീര്‍ത്തും ലളിതമായിരിക്കുമെന്നും സംഘാടകര്‍ അറിയിച്ചു.
കേരളം പ്രളയത്തെ അതിജീവിക്കുന്ന ഘട്ടത്തില്‍ ഇതിനെക്കുറിച്ച് അമേരിക്കന്‍ മലയാളികളോട് സംസാരിക്കാതെ പോവുന്നത് ശരിയല്ലെന്നുള്ളതുകൊണ്ടാണ് ഈ പരുപാടിയില്‍ പങ്കെടുക്കുന്നതെന്നും സംഘാടകര്‍ പറഞ്ഞു.
നവകേരള സൃഷ്ടിയെക്കുറിച്ചുള്ള കാര്യങ്ങളും ഇതിന് യുഎസ് മലയാളികളുടെ സംഭാവനയെക്കുറിച്ചുള്‍പ്പെടെ ഇവിടെ മുഖ്യമന്ത്രി സംവദിക്കുമെന്നാണ് കരുതുന്നത്.
യുഎസിലെ എല്ലാ സംഘടനകളുടെയും പ്രതിനിധികൾക്കും പരിപാടിയിലേക്ക് ക്ഷണമുണ്ട്. പ്രളയകാലത്ത് കേരളത്തെ സഹായിക്കാൻ നേതൃത്വം നൽകിയ യുഎസിലെ സംഘടനാ ഭാരവാഹികളും പരിപാടിയിൽ സംസാരിക്കും.
ക്ഷണിക്കപ്പെട്ട അതിഥികൾക്ക് വേണ്ടി മാത്രമാണ് പരിപാടി. ചികിത്സയും അമേരിക്കന്‍ സന്ദര്‍ശനവും പൂര്‍ത്തിയാക്കി മുഖ്യമന്ത്രി 23 ന് കേരളത്തിലേക്ക് മടങ്ങുമെന്നാണ് സൂചന. പ്രളയക്കെടുതികളുടെ സാഹചര്യത്തില്‍ അമേരിക്കന്‍ യാത്ര മുഖ്യമന്ത്രി നീട്ടിവച്ചിരുന്നു.
ഓഗസ്റ്റ് 19 ന് അമേരിക്കയിലേക്ക് പോയി സെപ്റ്റംബര്‍ ആറിന് തിരിച്ചെത്തുന്ന തരത്തിലായിരുന്നു ആദ്യം യാത്ര തീരുമാനിച്ചത്.
പ്രളയം ഉണ്ടായതോടെ യാത്ര സെപ്റ്റംബര്‍ രണ്ടിലേക്ക് മാറ്റി. തിരുവനന്തപുരം വിമാനത്താവളത്തില്‍നിന്ന് പുലര്‍ച്ചെ 4.40നാണ് മുഖ്യമന്ത്രി അമേരിക്കയിലേക്ക് പോയത്
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
