തിരുവനന്തപുരം: പ്രളയാനന്തര കേരളത്തിന്റെ പുനര്നിര്മിതിക്കായി സംസ്ഥാന സര്ക്കാര് പുറത്തിറക്കിയ നവകേരള ലോട്ടറിയുടെ ഒന്നാം സമ്മാനങ്ങളിലൊന്ന് പ്രളയബാധിതന്. എറണാകുളം ചിറ്റൂര് കുമ്പനായില് റോയിയാണ് ഒന്നാം സമ്മാനമായ ഒരു ലക്ഷം രൂപ ലഭിച്ച 90 പേരില് ഒരാള്.
പ്രളയം നാടിനെ മുക്കിയപ്പോള് റോയിയുടെ വീടും വെള്ളത്തിലായി, ദുരിതാശ്വാസ ക്യാമ്പിലായിരുന്നു റോയിയും കുടുംബവും. വെള്ളം കയറി വീടിന്റെ വാതില് തകരുകയും വിലപിടിപ്പുള്ള സാധനങ്ങളടക്കം നഷ്ടപ്പെടുകയും ചെയ്തു.
തയ്യല് തൊഴിലാളിയായ റോയ് സര്ക്കാരില്നിന്നു ദുരിതാശ്വാസമായി ലഭിച്ച 10,000 രൂപയും സുഹൃത്തുക്കളില്നിന്നു കടം വാങ്ങിയ പണവും ഉപയോഗിച്ചാണ് അത്യാവശ്യ സാധനങ്ങള് വാങ്ങി ജീവിതം തിരിച്ചുപിടിച്ചത്.
നറുക്കെടുപ്പിനു മിനിറ്റുകള്ക്കു മുമ്പേയാണ് റോയ് ടിക്കറ്റെടുത്തത്. ചെറിയ തുകയ്ക്കുള്ള ടിക്കറ്റുകള് മുമ്പും എടുക്കുമായിരുന്നു.
തന്നെ പോലെ ദുരിതമനുഭവിക്കുന്നവര്ക്ക് ആശ്വാസം പകരാനുള്ള സര്ക്കാര് യജ്ഞത്തില് പങ്കാളിയാകണമെന്ന ഉദ്ദേശ്യത്തോടെയാണ് ടിക്കറ്റെടുത്തതെന്നും ദിവസങ്ങളോളം അനുഭവിച്ച ദുരിതംമാത്രമായിരുന്നു മനസ്സിലെന്നും റോയ് പറഞ്ഞു.
വിദ്യാര്ഥികളായ രണ്ട് മക്കളും ഭാര്യ ജാന്സിയുമടങ്ങുന്നതാണ് റോയിയുടെ കുടുംബം.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here