കോഴിക്കോട്: കൈരളി പീപ്പിള്‍ ടിവി ജ്വാലാ അവാര്‍ഡുകള്‍ വിതരണം ചെയ്തു. സാമൂഹ്യോന്മുഖ യുവസംരംഭകയ്ക്കുള്ള അവാര്‍ഡ് ദിവ്യാ തോമസും നവാഗത യുവസംരംഭകയ്ക്കുള്ള പുരസ്‌കാരം പൂര്‍ണിമാ വിശ്വനാഥും മുഖ്യധാര യുവസംരംഭകയ്ക്കുള്ള പുരസ്‌കാരം ബിസ്മി ബിനുവും ഏറ്റുവാങ്ങി. മമ്മൂട്ടിയുടെ പ്രത്യേക പുരസ്‌കാരത്തിന് രേഖ കാര്ത്തികേയന് അര്‍ഹയായി.
കൈരളി പീപ്പിള്‍ ജ്വാല പുരസ്‌കാര വിതരണച്ചടങ്ങ് നന്മനിറഞ്ഞ നിരവധി മുഹൂര്‍ത്തങ്ങള്‍ക്ക് വേദിയായി. പുരസ്‌കാര ജേതാക്കള്‍ നാലുപേരും മഹാനടനില്‍നിന്ന് അംഗീകാരം ഏറ്റുവാങ്ങാനായതിന്റെ സന്തോഷത്തിലായിരുന്നു.
കൈരളി ചെയര്‍മാന്‍ പത്മശ്രീ ഭരത് മമ്മൂട്ടിയില്‍നിന്ന് പുരസ്‌കാരം ഏറ്റുവാങ്ങിയതിനേക്കാള്‍ മാഹാനടനെ നേരില്‍ക്കാണാന്‍ കഴിഞ്ഞതാണ് ജീവിതത്തിലെ വലിയ ഭാഗ്യമെന്ന് പ്രത്യേക പുരസ്‌കാരത്തിനര്‍ഹയായ രേഖ പറഞ്ഞപ്പോള്‍ സദസ്സ് ഒന്നടങ്കം ഏറ്റെടുത്തു.
സാമൂഹ്യോന്മുഖ യുവ സംരഭക്കുള്ള പുരസ്‌കാരത്തിന് അര്‍ഹയായ ദിവ്യതോമസ് നെറ്റിപ്പട്ടം ആലേഖനം ചെയ്ത പേപ്പര്‍ ബാഗ് മമ്മൂട്ടിയ്ക്ക് സമ്മാനിച്ചു.
പ്രളയ അതിജീവനത്തിന്റെ പ്രതീകമായ ചേക്കുട്ടിപ്പാവ ആദ്യ ജ്വാലാ അവാര്‍ഡ് ജേതാവും വ്യവസായ സംരഭകയുമായ ലക്ഷ്മി മേനോന്‍ സമ്മാനിച്ചത് കരഘോഷത്തോടെയാണ് സദസ്സ് സ്വീകരിച്ചത്.
മമ്മൂട്ടിയുടെ രണ്ട് ചിത്രങ്ങളുമായി ബന്ധപ്പെട്ട ഓര്‍മകള്‍ മുഖ്യധാരാ യുവസംരഭകക്കുള്ള പുരസ്‌കാരത്തിനര്‍ഹയായ ബിസ്മി ബിനു പങ്കുവെച്ചത് മഹാനടനും കൗതുകമുണര്‍ത്തി.
രേഖാ കാര്‍ത്തികേയന്റെ മക്കളുടെ വിദ്യാഭ്യാസ ചെലവിലേക്കായി ഒരുലക്ഷം രൂപ ഒ വി മുസ്തഫ വേദിയിലെത്തി പ്രഖ്യാപിച്ചത് ചടങ്ങിന്റെ നന്മപൂക്കുന്ന കാഴ്ചയായി.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
