കൊച്ചി: നടിയെ ആക്രമിച്ച കേസിന്റെ വിചാരണയ്ക്ക് വനിതാ ജഡ്ജി വേണമെന്ന ആവശ്യത്തില് ഹൈക്കോടതിയുടെ അനുകുല തീരുമാനം.
എറണാകുളം, തൃശൂര് ജില്ലകളില് വനിതാ ജഡ്ജിമാര് ലഭ്യമാണോ എന്ന് പരിശോധിക്കാന് രജിസ്ട്രാര്ക്ക് ഹൈക്കോടതി നിര്ദ്ദേശം നല്കി.
പീഡന കേസുകള് പരിശോധിക്കാന് സംസ്ഥാനത്ത് മതിയായ കോടതികളില്ലാത്തത് ഗൗരവതരമെന്നും ഹൈക്കോടതി പറഞ്ഞു.
വിചാരണ നടപടികള് തൃശൂരിലെ ഉചിതമായ കോടതിയിലേക്ക് മാറ്റണമെന്നതുള്പ്പെടെ ആവശ്യപ്പെട്ട് നടി നല്കിയ ഹര്ജിയാണ് കോടതി പരിഗണിച്ചത്.
സാധ്യമെങ്കില് പീഡന കേസുകള് വനിതാ ജഡ്ജിയുടെ കോടതിയില് വിചാരണ നടത്തണമെന്ന് ക്രിമിനല് നടപടി ചട്ടത്തില് വ്യവസ്ഥയുണ്ടെന്ന് ചൂണ്ടിക്കാട്ടിയാണ് ഹര്ജി സമര്പ്പിക്കപ്പെട്ടത്.
സ്ത്രീകളും കുട്ടികളും ഇരകളാകുന്ന കേസുകള് പരിശോധിക്കാന് സംസ്ഥാനത്ത് മതിയായ കോടതികള് ഇല്ലെന്നും ഇത് ഗുരുതരമായ സാഹചര്യമാണെന്നും ഹൈക്കോടതി വ്യക്തമാക്കി.
പ്രതിയുടെ മുന്നിലൂടെ ഇരയായ വ്യക്തിക്ക് കോടതിയിലെത്തേണ്ട സാഹചര്യമുണ്ട്. നിര്ഭയമായി ഇരകള്ക്ക് മൊഴി നല്കാന് സാധിക്കുന്നില്ല.
കഴിഞ്ഞ ആറുമാസത്തിനിടയില് സ്ത്രീകള്ക്കും കുട്ടികള്ക്കും എതിരായ കേസുകള് ക്രമാതീതമായി വര്ധിച്ചെന്നും ഹൈക്കോടതി ചൂണ്ടിക്കാട്ടി.
മറ്റ് സംസ്ഥാനങ്ങളില് പീഡനത്തിന് ഇരയാകുന്നവര്ക്ക് മൊഴി നല്കാന് കോടതികളില് പ്രത്യേക സംവിധാനം ഉണ്ട്. ഇവിടുത്തെ സ്ഥിതി ദയനീയമെന്ന് ഹൈക്കോടതി വ്യക്തമാക്കി. ഹര്ജി വ്യഴാഴ്ച പരിഗണിക്കാനായി മാറ്റി
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here