ലോകകപ്പില്‍ പാകിസ്ഥാന്‍ ശ്രീലങ്കയെ ഇന്ന് നേരിടും. രണ്ടു കളി കഴിഞ്ഞപ്പോള്‍ ഇരു ടീമുകളും ഓരോ ജയം നേടി. വിന്‍ഡിസിന്റെ പേസിനും ബൗണ്‍സിനും മുന്നില്‍ വിറച്ചെങ്കിലും ശക്തരായ ഇംഗ്ലണ്ടിനെ തോല്‍പ്പിച്ചാണ് പാകിസ്ഥാന്‍ തിരിച്ചെത്തിയത്.
അഫ്ഗാനിസ്ഥാനെതിരെ ജയം പിടിച്ചെങ്കിലും ലങ്കയുടെ ബാറ്റിങ് പ്രകടനം ദയനീയമാണ്. ബൗളിങ്ങിലെ മികവാണ് അഫ്ഗാനിസ്ഥാനെതിരെ ലങ്കയുടെ മാനം രക്ഷിച്ചത്. ദിമുത് കരുണരത്‌നയുടേയും, കുസാല്‍ പെരേരയുടേയും കളി മാത്രമാണ് ബാറ്റിങ്ങില്‍ ലങ്കയ്ക്ക് ആശ്വാസം നല്‍കുന്നത്. മധ്യനിരയില്‍ എയ്ഞ്ചലോ മാത്യൂസ് തുടര്‍ച്ചയായ രണ്ട് കളിയിലും പൂജ്യത്തിനാണ് പുറത്തായത്.
ലോകകപ്പില്‍ ഇതുവരെ ശ്രീലങ്ക പാകിസ്ഥാനെ തോല്‍പ്പിച്ചിട്ടില്ല. ഏഴുവട്ടം ലോകകപ്പില്‍ ഇരുവരും ഏറ്റുമുട്ടിയപ്പോള്‍ ഏഴ് തവണയും പാകിസ്ഥാന്‍ ജയം പിടിച്ചു. ഇതോടെ, ആത്മവിശ്വാസം തീരെയില്ലാതെയാവും ലങ്ക ഇന്നിറങ്ങുക. ശക്തരായ ഇംഗ്ലണ്ടിനെതിരെ പുറത്തെടുത്ത മികവിന്റെ കരുത്തിലാണ് പാകിസ്ഥാന്‍ ഇറങ്ങുന്നത്.
Get real time update about this post categories directly on your device, subscribe now.
