വാഷിങ്​ടൺ: ഭീകരസംഘടന അൽ ഖ്വയ്​ദ നേതാവും​ ഒസാമ ബിൻ ലാദ​​ന്റെ മകനുമായ ഹംസ ബിൻ ലാദൻ കൊല്ലപ്പെട്ടതായി റിപ്പോർട്ട്​.

അമേരിക്കന്‍ മാധ്യമമായ എന്‍ബിസി ന്യൂസാണ് ഇക്കാര്യം റിപ്പോര്‍ട്ട് ചെയ്തത്. യുഎസ്​ പ്രതിരോധ ഉദ്യോഗസ്ഥരെ ഉദ്ദരിച്ചുകൊണ്ടാണ്‌ എൻബിസി ന്യൂസ്‌​ ഇക്കാര്യം റിപ്പോർട്ട്​ ചെയ്​തത്. ഒസാമ ബിന്‍ ലാദന് ശേഷം ഹംസയ്ക്കായിരുന്നു അല്‍ഖ്വയ്ദയുടെ ചുമതല.

എന്നാൽ എവിടെ വെച്ചാണ്​ ഹംസ കൊല്ലപ്പെട്ടതെന്നോ തീയതിയോ, അതിൽ യുഎസിനെ പങ്കുണ്ടെന്നോ വ്യക്തമാക്കിയിട്ടില്ല.

നേരത്തെ 30കാരനായ ഹംസ ബിൻ ലാദനെ പിടികൂടുന്നവർക്ക്​ 10 ലക്ഷം ഡോളർ പാരിതോഷികം നൽകുമെന്ന്​ ​അമേരിക്കൻ ആഭ്യന്തര മന്ത്രാലയം ഫെബ്രുവരിയിൽ പ്രഖ്യാപിച്ചിരുന്നു.

2011ലാണ് അമേരിക്കന്‍ സേന ഒസാമ ബിന്‍ ലാദനെ പിടികൂടി വധിക്കുന്നത്. പാകിസ്താനിലെ അബൊട്ടാബാദില്‍ ഒളിവില്‍ കഴിയുകയായിരുന്ന ലാദനെ സൈനിക നടപടിയിലൂടെയാണ് അമേരിക്ക​ ​പിടികൂടിയത്​. അന്ന്​ ഹംസ ബിൻലാദനെ പിടികൂടാൻ കഴിഞ്ഞിരുന്നില്ല.