ബോക്സ് ഓഫീസില് തരംഗമായി പ്രഭാസ് ചിത്രം ‘സാഹോ’ പ്രദര്ശനം തുടരുന്നു. ചിത്രം മൂന്നു ദിവസം കൊണ്ട് ഇരുനൂറ്റി തൊണ്ണൂറ്റി നാല് കോടി നേടി മുന്നൂറു കോടി ക്ലബിലേക്ക് കുതിക്കുകയാണ്. ചിത്രത്തിന്റെ നിര്മാതാക്കളായ യുവി ക്രിയേഷന്സ് ട്വിറ്ററിലൂടെയാണ് കളക്ഷന് വിവരങ്ങള് പുറത്തു വിട്ടത്.
യുവ സംവിധായകന് സുജീത്തിന്റെ സംവിധാനത്തില് ഒരുങ്ങിയ സാഹോ കേരളത്തിലും മികച്ച ബോക്സ് ഓഫീസ് പ്രതികരണം നേടി. ചിത്രത്തിന്റെ പുതിയ ടീസറും അണിയറ പ്രവര്ത്തകര് പുറത്തിറക്കി.
പ്രശസ്ത ഹോളിവുഡ് ആക്ഷന് കോ-ഓര്ഡിനേറ്റര് കെന്നി ബേറ്റ്സാണ് സാഹോയുടെ തകര്പ്പന് ആക്ഷന് രംഗങ്ങള് ഒരുക്കിയിരിക്കുന്നത്. ബാഹുബലിയുടെ ആര്ട്ട് ഡയറക്ടറായിരുന്ന സാബു സിറിലാണ് കലാസംവിധായകന്. ഗിബ്രാന് പശ്ചാത്തല സംഗീതവും, ഛായാഗ്രഹണം ആര്. മഥിയും, എഡിറ്റിങ് ശ്രീകര് പ്രസാദുമാണ് നിര്വഹിക്കുന്നത്.
യുവി ക്രിയേഷന്സിന്റെ ബാനറില് നിര്മിക്കുന്ന സിനിമയില് മലയാള താരങ്ങളായ ലാലും ദേവനും ശ്രദ്ധേയമായ കഥാപാത്രങ്ങളെ അവതരിപ്പിക്കുന്നു. ശ്രദ്ധ കപൂറാണ് നായിക. ജാക്കി ഷ്രോഫ്, നീല് നിതിന് മുകേഷ്, ചങ്കി പാണ്ഡേ, മഹേഷ് മഞ്ജറേക്കര്, അരുണ് വിജയ്, മുരളി ശര്മ, മന്ദിര ബേദി, തുടങ്ങിയവരും ചിത്രത്തില് വേഷമിടുന്നു. സംവിധായകന് ബി. ഉണ്ണികൃഷ്ണന്റെ ആര്.ഡി. ഇല്യുമിനേഷന് ആണ് സാഹോ കേരളത്തില് വിതരണം നിര്വഹിച്ചത്.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here