കുട്ടികളുടെ അശ്ലീല വീഡിയോകളും ചിത്രങ്ങളും ഇന്റര്‍നെറ്റില്‍ പ്രചരിപ്പിക്കുന്ന ഗ്രൂപ്പുകള്‍ അപ്രത്യക്ഷമാകുന്നു. മൂന്ന് വമ്പന്‍ ഗ്രൂപ്പുകളാണ് കഴിഞ്ഞ ദിവസം പൂട്ടി അംഗങ്ങള്‍ അപ്രത്യക്ഷരായത്. കേരള പോലീസ് സൈബര്‍ ഡോം ഇന്റര്‍പോളിന്റെ സഹായത്തോടെ നടത്തിയ ഓപ്പറേഷന്‍ പി ഹണ്ടിലൂടെ നടത്തിയ തിരച്ചിലിലും നിരീക്ഷണത്തിലും ചിലര്‍ അറസ്റ്റിലായിരുന്നു.

അശ്ലീലം പ്രദര്‍ശിപ്പിക്കുന്ന ഒരു ഗ്രൂപ്പിന്റെ അഡ്മിന്‍ പാക്കിസ്ഥാന്‍ സ്വദേശിയും ചില മലയാളികളുമാണ്. മറ്റ് രണ്ട് ഗ്രൂപ്പുകളിലും മലയാളികള്‍ ഉള്‍പ്പെട്ടതാണെന്ന് സൈബര്‍ ഡോം നോഡല്‍ ഓഫീസര്‍ എഡിജിപി മനോജ് എബ്രഹാം വ്യക്തമാക്കി.

കുട്ടികളുടെ അശ്ലീല ചിത്രങ്ങളും വീഡിയോകളും കാണുകയും പ്രചരിപ്പിക്കുകയും ചെയ്ത 12 പേരെ ഓപ്പറേഷന്‍ പി ഹണ്ടിന്റെ ഭാഗമായി സൈബര്‍ പോലീസ് വിവിധ ജില്ലകളില്‍ നിന്നും അറസ്റ്റ് ചെയ്തിരുന്നു. ഇന്റര്‍പോളിന്റെ കൂടി സഹായത്തോടെ 126 മലയാളികളെ തിരിച്ചറിഞ്ഞിട്ടുണ്ട്. ഇവരിലുള്ള പലരും കേരളത്തിന് പുറത്താണ്. മറ്റ് സംസ്ഥാനങ്ങളിലുള്ള 45 പേരയും തിരിച്ചറിഞ്ഞിട്ടുണ്ട്.