മമ്മൂട്ടി ബ്രഹ്മാണ്ഡ ചിത്രം മാമാങ്കത്തിനെതിരെ സോഷ്യല്‍ മീഡിയയിലൂടെ വ്യാജ പ്രചരണം നടത്തിയ ഏഴ് പേര്‍ക്കെതിരെ പൊലീസ് കേസെടുത്തു.
സിനിമയുടെ തിരക്കഥാകൃത്തായിരുന്ന വിതുര സ്വദേശി സജീവ് പിള്ള, നിരഞ്ജന്‍ വര്‍മ്മ, അനന്തു കൃഷ്ണന്‍, കുക്കു അരുണ്‍, ജഗന്നാഥന്‍, സിബിഎസ് പണിക്കര്‍, ആന്റണി എന്നിവര്‍ക്കെതിരെയും ‘ഈഥന്‍ ഹണ്ട്’ എന്ന ഫേസ്ബുക്ക് അക്കൗണ്ടിനെതിരെയുമാണ് വിതുര പൊലീസ് കേസെടുത്തത്. ചിത്രം നിര്‍മിക്കുന്ന കാവ്യ ഫിലിം കമ്പനി ഡിഐജി സഞ്ജയ് കുമാര്‍ ഗരുഡിന് നല്‍കിയ പരാതിയിലാണ് നടപടി.
മാമാങ്കം മോശം സിനിമയാണെന്ന തരത്തില്‍ സോഷ്യല്‍മീഡിയയില്‍ വ്യാജ അക്കൗണ്ടുകള്‍ ഉപയോഗിച്ച് പ്രചരണം നടത്തിയെന്നാരോപിച്ചാണ് കേസ്. സിനിമയെ തകര്‍ക്കാന്‍ ഗൂഢാലോചന അടക്കം നടന്നെന്ന പരാതിയിലാണ് കേസ്.
പരാതിയില്‍ പ്രാഥമിക അന്വേഷണം നടത്തിയ ജില്ലാ ക്രൈംബ്രാഞ്ച് ഡിവൈഎസ്പിയുടെ റിപ്പോര്‍ട്ട് പ്രകാരം റൂറല്‍ എസ്പി കേസെടുക്കാന്‍ നിര്‍ദേശിക്കുകയായിരുന്നു.
എം പത്മകുമാര്‍ സംവിധാനം ചെയ്യുന്ന മാമാങ്കം നിര്‍മ്മിക്കുന്നത് വേണു കുന്നപ്പിള്ളിയാണ്. ചിത്രത്തിന്റെ തിരക്കഥ ഒരുക്കിയിരിക്കുന്നത് ശങ്കര്‍ രാമകൃഷ്ണനാണ്. ഉണ്ണി മുകുന്ദന്‍, കനിഹ, അനുസിത്താര, സിദ്ദിഖ്, തരുണ്‍ അറോറ, പ്രാചി തെഹ്ലാന്‍ എന്നിവരാണ് ചിത്രത്തിലെ താരങ്ങള്‍. എം ജയചന്ദ്രനാണ് ചിത്രത്തിന്റെ സംഗീതം ഒരുക്കിയിരിക്കുന്നത്.
കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക
Click Here
