ബാഗ്ദാദ്: അമേരിക്കയും ഇറാനും തമ്മില് സംഘര്ഷം നിലനില്ക്കുന്ന സാഹചര്യത്തില് ഇറാഖില് വീണ്ടും ഇറാന്റെ റോക്കറ്റാക്രമണം. ഇറാഖ് തലസ്ഥാനമായ ബാഗ്ദാദില് അമേരിക്കന് നയതന്ത്രകാര്യാലയം സ്ഥിതിചെയ്യുന്ന ഗ്രീന്സോണിലാണ് റോക്കറ്റാക്രമണമുണ്ടായത്. ഇവിടെ രണ്ട് റോക്കറ്റുകള് പതിച്ചതായാണ് വാര്ത്താ ഏജന്സികള് റിപ്പോര്ട്ട് ചെയ്യുന്നത്.
അര്ദ്ധരാത്രിയോടെയാണ് ആക്രമണം നടന്നതെന്ന് ഇറാഖ് സൈന്യം അറിയിച്ചു. എന്നാല് മരണങ്ങളൊന്നും റിപ്പോര്ട്ട് ചെയ്തിട്ടില്ല. സംഭവത്തെക്കുറിച്ച് വൈറ്റ് ഹൗസോ, പെന്റഗണോ പ്രതികരിച്ചിട്ടില്ല. അല് അസദ് സൈനികാസ്ഥാനങ്ങളില് നടത്തിയ ആക്രമണത്തില് ആള് നാശമുണ്ടായില്ലെന്ന യു.എസ്. പ്രസിഡന്റ് ഡൊണാള്ഡ് ട്രംപിന്റെ പ്രതികരണം വന്ന് മണിക്കൂറുകള്ക്കുള്ളിലാണ് ആക്രമണം.
മധ്യബാഗ്ദാദില് 2003-ല് അമേരിക്ക ആക്രമണം നടത്തി സഖ്യസേന പിടിച്ചടക്കിയ ശേഷം നിര്മിച്ച അതീവസുരക്ഷാമേഖലയാണിത്. ഇറാഖില് മറ്റേതൊരു ഇടത്തേക്കാള് സുരക്ഷിതമായ ഇടമാണിതെന്നാണ് കരുതപ്പെട്ടിരുന്നത്. എന്നാല്, കഴിഞ്ഞ കുറച്ച് മാസങ്ങളായി ഈ മേഖലയില് നടക്കുന്നത് തുടര്ച്ചയായ ആക്രമണങ്ങളാണ്.
നേരത്തെ യു.എസിന്റെ രണ്ടു സൈനികതാവളങ്ങള്ക്കുനേരെ ഇറാന് മിസൈലാക്രമണം നടത്തിയിരുന്നു. ഇര്ബില്, അല് അസദ് സൈനികാസ്ഥാനങ്ങളില് നടത്തിയ ആക്രമണത്തില് 80 യു.എസ് സൈനികര് കൊല്ലപ്പെട്ടതായി ഇറാന് അവകാശപ്പെട്ടു. എന്നാല് യു.എസ്. പ്രസിഡന്റ് ഡൊണാള്ഡ് ട്രംപ് ഇത് തള്ളിക്കളഞ്ഞിരുന്നു.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here