വിദ്വേഷ പ്രസംഗം നടത്തിയ നേതാക്കള്‍ക്കെതിരെ കേസെടുക്കണമെന്ന ഹര്‍ജി ദില്ലി ഹൈക്കോടതി ഇന്ന് വീണ്ടും പരിഗണിക്കും. ദില്ലിയില്‍ വിദ്വേഷ പ്രസംഗം നടത്തിയവര്‍ക്കെതിരെ കേസെടുക്കുന്ന കാര്യത്തില്‍ തീരുമാനമെടുത്ത് ഇന്ന് അറിയിക്കണമെന്ന് കോടതി ഇന്നലെ ഉത്തരവിട്ടിരുന്നു. എല്ലാ വിദ്വേഷ പ്രസംഗങ്ങളിലും തീരുമാനമെടുക്കാനായിരുന്നു ജസ്റ്റിസ് എസ് മുരളീധര്‍ അധ്യക്ഷനായ ബഞ്ചിന്റെ നിര്‍ദ്ദേശം.
അനുരാഗ് താക്കൂര്‍, പര്‍വേഷ് വര്‍മ്മ, കപില്‍ മിശ്ര, അഭയ് താക്കൂര്‍ എന്നിവര്‍ക്കെതിരെ കേസെടുക്കണമെന്നാണ് ഹര്‍ജിയിലെ ആവശ്യം. ചീഫ് ജസ്റ്റിസിന്റെ അഭാവത്തിലാണ് ഹര്‍ജി ജസ്റ്റിസ് മുരളീധറിന്റെ ബഞ്ച് പരിഗണിച്ച് വന്നത്.
ദില്ലി കലാപങ്ങളുടെ പശ്ചാത്തലത്തില്‍ വിദ്വേഷ പ്രസംഗം നടത്തിയ ബിജെപി നേതാക്കള്‍ക്കെതിരെ കേസ് എടുക്കണമെന്ന് ഇന്നലെ കോടതി നിര്‍ദ്ദേശിച്ചിരുന്നു. ഇന്ന് ചീഫ് ജസ്റ്റിസ് തിരികെ എത്തുന്നതിനാല്‍ കേസ് വീണ്ടും ഒന്നാം നമ്പര്‍ കോടതിയിലേക്ക് മാറ്റി.
പൗരത്വ നിയമ ഭേദഗതിയെ ചൊല്ലി കലാപം വ്യാപിച്ച സാഹചര്യത്തില്‍ കപില്‍ മിശ്രയുടെ വിദ്വേഷ പ്രസംഗം കോടതി മുറിയില്‍ പ്രദര്‍ശിപ്പിച്ചിരുന്നു. അനുരാഗ് ഠാക്കൂര്‍, പര്‍വേഷ് വര്‍മ്മ, അഭയ് വര്‍മ്മ എന്നിവരുടെ പ്രസംഗങ്ങളും പരിശോധിച്ച് ഉചിതമായ നടപടി എടുക്കാനും നിര്‍ദ്ദേശമുണ്ട്. ഇവര്‍ക്കെതിരെ എന്ത് നടപടി എടുത്തെന്ന് കോടതിയില്‍ ദില്ലി പൊലീസിന് ഇന്ന് മറുപടി നല്‍കേണ്ടി വരും.
അതേസമയം വിദ്വേഷ പ്രസംഗം നടത്തിയ ബിജെപി നേതാക്കള്‍ക്കെതിരെ കേസ് എടുക്കണമെന്ന് നിര്‍ദ്ദേശിച്ച ജസ്റ്റിസ് മുരളീധറിനെ ദില്ലി ഹൈക്കോടതിയില്‍ നിന്ന് സ്ഥലംമാറ്റിയിട്ടുണ്ട്. പഞ്ചാബ് ഹരിയാന ഹൈക്കോടതിയിലേക്കാണ് സ്ഥലം മാറ്റിയത്. കേസ് പരിഗണിക്കുന്ന ദില്ലി ഹൈക്കോടതി ബെഞ്ചില്‍ മാറ്റം വരുത്തിയതിന് പിന്നാലെയാണ് സ്ഥലം മാറ്റ ഉത്തരവ് കേന്ദ്രസര്‍ക്കാര്‍ വിജ്ഞാപനമായി പുറത്തിറക്കിയത്.
Related Posts
Get real time update about this post categories directly on your device, subscribe now.
