കൊല്ലത്ത് കാണാതായ ആറ് വയസുകാരി ദേവനന്ദയുടെ മൃതദേഹം കണ്ടെത്തി. വീടിനോട് ചേര്ന്നുള്ള ഇത്തിക്കരയാറ്റിലാണ് മൃതദേഹം കണ്ടെത്തിയത്. മുങ്ങല് വിദഗ്ധര് നടത്തിയ തിരച്ചിലിലാണ് മൃതദേഹം കണ്ടെത്തിയത്. മുങ്ങിമരണമെന്നാണ് പ്രാഥമിക നിഗമനം.
ഇന്ക്വസ്റ്റ് നടപടികള് പൂര്ത്തിയായി. തിരുവനന്തപുരം മെഡിക്കല് കോളേജില് പോസ്റ്റ്മോര്ട്ടം നടത്തും. ദേവനന്ദയുടെ മൃതദേഹത്തില് മുറിവുകളോ ചതവുകളോ ഇല്ല. ശരീരത്തില് ബാഹ്യമായ പരിക്കുകള് ഇല്ലെന്ന് ഇന്ക്വസ്റ്റ് റിപ്പോര്ട്ടില് സൂചിപ്പിക്കുന്നതായാണ് റിപ്പോര്ട്ട്. മൃതദേഹത്തില് വസ്ത്രങ്ങളെല്ലാം ഉണ്ടായിരുന്നു.
മൃതദേഹത്തില് ബലപ്രയോഗത്തിന്റെ ലക്ഷണങ്ങള് ഇല്ലെന്നും ഇന്ക്വസ്റ്റ് റിപ്പോര്ട്ടില് പറയുന്നു. അതേസമയം മരണത്തില് അസ്വാഭാവികത ഉണ്ടോ ഇല്ലയോ എന്നതില് പോസ്റ്റ്മോര്ട്ടത്തിന് ശേഷം മാത്രമേ സ്ഥിരീകരിക്കാനാവൂ എന്നും ഫൊറന്സിക് വിദഗ്ധര് സൂചിപ്പിച്ചു.
വീട്ടുമുറ്റത്ത് കളിച്ചുകൊണ്ടിരുന്ന ആറുവയസ്സുകാരിയെ ഇന്നലെ രാവിലെയാണ് കാണാതായത്. പള്ളിമണ് ഇളവൂര് സ്വദേശികളായ പ്രദീപ് ധന്യ ദമ്പതികളുടെ മകളാണ് ദേവനന്ദ.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here