ബാങ്ക് അക്കൗണ്ടുടമകള്ക്ക് കെവൈസി മാനദണ്ഡങ്ങള് പാലിക്കാന് എസ്ബിഐ നല്കിയ സമയപരിധി ഇന്ന് അവസാനിക്കും. ഫെബ്രുവരി 2020 28നകം കെവൈസി മാനദണ്ഡങ്ങള് പാലിച്ചില്ലെങ്കില് ഉപഭോക്താക്കളുടെ ബാങ്ക് അക്കൗണ്ട് പ്രവര്ത്തനരഹിതമാക്കുമെന്ന് എസ്ബിഐ നേരത്തെ മുന്നറിയിപ്പ് നല്കിയിരുന്നു.
കെവൈസി വിവരങ്ങള് പരിഷ്കരിക്കേണ്ടവരും ഈ സമയപരിധിക്കുള്ളില് നടപടി ക്രമങ്ങള് പൂര്ത്തിയാക്കണമെന്നാണ് എസ്ബിഐ മുന്നറിയിപ്പ് നല്കിയിരുന്നത്. കളളപ്പണം വെളുപ്പിക്കല് തടയുന്ന നിയമം അനുസരിച്ച് കെവൈസി മാനദണ്ഡങ്ങള് ഇടപാടുകാര് പാലിക്കുന്നുണ്ടെന്ന് ബാങ്കുകള് ഉറപ്പുവരുത്തണമെന്ന ആര്ബിഐയുടെ നിര്ദേശപ്രകാരമാണ് എസ്ബിഐയുടെ നടപടി.
അക്കൗണ്ടുടമകളെക്കുറിച്ച് അറിയുക എന്നതാണ് കെവൈസി കൊണ്ട് ബാങ്ക് ഉദ്ദേശിക്കുന്നത്. നിങ്ങളുടെ തൊട്ടടുത്തുള്ള എസ്ബിഐ ശാഖയില് പോയി രേഖകള് നല്കിയാല് കെവൈസി നടപടിക്രമങ്ങള് പൂര്ത്തിയാക്കാം. പാസ്പോര്ട്ട്, വോട്ടര് ഐഡി, ഡ്രൈവിങ് ലൈസന്സ്, ആധാര് കാര്ഡ്, പാന് കാര്ഡ് എന്നിവയിലേതെങ്കിലും ഒന്നിന്റെ പകര്പ്പ് മതി വിലാസം തെളിയിക്കാന്.
അതോടൊപ്പം നിങ്ങളുടെ പുതിയ പാസ്പോര്ട്ട് സൈസ് ഫോട്ടോയും മൊബൈല് നമ്പറും നല്കിയാല് മതിയെന്നും ബാങ്ക് നിര്ദേശിച്ചിരുന്നു. ഇന്നായിരുന്നു ഇതിനായി ബാങ്ക് അനുവദിച്ചിരുന്ന അവസാന തീയ്യതി. മാനദണ്ഡങ്ങള് പാലിക്കാത്തവരുടെ ബാങ്ക് അക്കൗണ്ടുകള് നാളെ മുതല് പ്രവര്ത്തനരഹിതമാകും.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here